މިއުޅެނީ ކޮވިޑްބަލީގެ ވާހަކަ ދައްކާކަށް ނޫނެވެ. ފެތރެމުންދާ ޢާންމު ބަލިތަކުގެ ވާހަކަ ދައްކާށެވެ. ދުނިޔޭގެ ތާރީޚުގައިވެސް ކުރިނާރާވަރަށް ސައިންސް ކުރިއަރައިފިއެވެ. ސައިންސްގެ އެހީގައި ބަލިތަކަށް ބޭސް ފަރުވާ ހޯދައިފިއެވެ. ބަލިވާ ސަބަބުތަކާއި ސަބަބުތައް ދެނެގަންނާނެ ގިޮތް ހޯދައިފިއެވެ. ޓެސްޓްތައް ކުރެވޭނެ ގޮތް ވެސް ހޯދައިފިއެވެ. ބޭސްކުރާ ޑޮކްޓަރުންގެ އަދަދު ދަނީ ދުވަހެއް ދުވަހަކަށް ގިނަވަމުންނެވެ. ހޮސްޕިޓަލްތަކާއި ކްލިނިކްތައް ދަނީ އިތުރުވަމުންނެވެ. އެތަންތަނުގައި ދެވެންހުރި ޚިދުމަތްތައް ދަނީ ދުވަހުން ދުވަހަށް އިތުރުވަމުންނެވެ.
އެހެންކަމާއިއެކުވެސް ބޮޑެތި ބަލިތަކުގައިވާ ބަލިވާ މީހުންގެ އަދަދު ދަނީ ދުވަހުން ދުވަހަށް ބާރުސްޕީޑުގައި އިތުރުވަމުންނެވެ. ޢާއިލާއެއްގެ ތެރޭގައި ކެންސަރު، ހަކުބަލިބަލި، ލޭމައްޗަށް ދިއުން ހިތުގެ ބަލި ތައް ބޮޑެތި ބަލިތައް ނެތް ޢާއިލާއެއް އޮތްކަމަށް ބުނެވޭކަށް ނެތެވެ.
ޑޮކްޓަރުންގެ އަދަދު އިތުރުވަމުން އަންނައިރު ޑޮކްޓަރުންގެ އެޕޮއިންޓްމަންޓްތައް އޮންނަނީ ފުރިފައެވެ. ކޮންމެ އަގެއް ކިޔައިގެން ފަރުވާ ދިން ނަމަވެސް މެއެވެ. ވީއިރު މިވަނީ ކިހިނެއް ކަމާއިމެދު އިތުރަށް ވިސްނާކަށް ނުޖެހޭ ހެއްޔެވެ؟
ފެތުރޭ ޢާންމު ރޯގާތަކުގެ އިތުރުން ބަލި ކަމުގައި ފާހަގަކުރެވޭ ބަލިތައް އިތުރުވާ މައިގަނޑު ސަބަބާއިމެދު ޑޮކްޓަރުންވެސް، ސައިންސްވެރިންވެސް އަދި އިސްލާމް ދީންވެސް ބުނަނީ ހަމަ އެއް ވާހަކައެކެވެ. ދެނީ އެއް ނަޞޭޙަތެކެވެ. ކުރަނީ ހަމަ އެއް އިލްތިމާސެކެވެ. ތަފާތުވަނީ ބުނާ ޢިބާރާތެވެ!
ޑޮކްޓަރުން ބުނާނީ އިތުރަށް ނުކާށެވެ! ހަށިގަނޑަށް ގެއްލުން ލިބޭ ބާވަތްތައް ބޭނުން ނުކުރާށެވެ. ސާފުތާހިރުކަން ކަށަވަރުކުރާށެވެ! ދެން ބަލައިލަންވީ ކީރިތި ޤްރުއާނަށެވެ. ފުރަތަމަ ބަލައިލަންވީ އަލްއަޢްރާފް ސޫރަތުގެ 31 ވަނަ އާޔަތަށެވެ.
"އޭ އާދަމްގެ ދަރިންނޭވެ! ތިއަބައިމީހުން، ނަމާދުކުރާ ކޮންމެ ހިނދެއްގައިމެ، ޒީނަތްތެރިކަން ހިފާށެވެ! އަދި ތިއަބައިމީހުން ކައިބޮއި އުޅޭށެވެ! އަދި އިސްރާފް ނުކުރާށެވެ! ހަމަކަށަވަރުން، އިސްރާފް ކުރާ މީހުންދެކެ އެކަލާނގެ ލޯބިވެ ވޮޑިގެނެއް ނުވެތެވެ."
މިއާޔަތުގައި ﷲ ތަޢާލާ އަންގަވާފައި އެވަނީ އިސްރާފް ނުކުރުމަށެވެ. އިސްރާފް ކުރުމަކީ ހަމައެކަނި ނަގުތު ފައިސާ އިސްރާފްކުރުމެއް ނޫނެވެ. ކާބޯތަކެތި ވެސް އިސްރާފް ނުކުރުމަށެވެ. ކާބޯތަކެތި އިސްރާފްކުރުމުގެ ހަމައެކަނި މާނައަކީ ނުކެވޭ ވަރަށް ކައްކައި ބާކީ ކޮށްފައި ކާބޯތަކެތި ކުނިވަށިގަނޑަށް އެޅުމެއް ނޫނެވެ. ހަށިގަނޑަށް ބޭނުން ނުވާ ވަރަށް ކެއުމަކީ ވެސް އިސްރާފްކުރުމެވެ. އެއިރުން އަމިއްލަ ހަށިގަނޑު އެ ހެދެނީ ކުނިވަށިގަނޑަކަށެވެ.
އެވަރަކުންވެސް ނުނިމެއެވެ. ގިނަގިނައިން އިސްރާފް ނުކުރުމަށްވެސް ވަނީ އަނގަވައިފައެވެ. އަދި އިސްރާފް ކުރުމަކީ ޝައިޠާނުންގެ އަޚުންގެ އަމަލެއް ކަމަށް ވެސް މިވަނީ އަނގަވައިފައެވެ. (އިސްރާ: 26،27)
"ގާތްތިމާގެ މީހާއަށް، އޭނާގެ ޙައްޤު ދޭށެވެ! އަދި މިސްކީނުންނަށާއި ދަތުރުވެރިޔާއަށްވެސްމެއެވެ. އަދި ގިނަގިނައިން އިސްރާފް ނުކުރާހުށިކަމެވެ!
ހަމަކަށަވަރުން، އިސްރާފް ކުރާ މީހުންނީ، ޝައިޠާނުންގެ އަޚުން ކަމުގައިވޫއެވެ. އަދި ޝައިޠާނާ، އޭނާގެ ވެރިރަސްކަލާނގެއަށް ވަރަށް ބޮޑަށް كافر ވާ ކަމުގައިވިއެވެ."
ދެން ބަލައިލަންވީ ބަޤަރާ ސޫރަތުގެ 195 ވަނަ ޢާޔަތަށެވެ.
"ﷲ ގެ މަގުގައި ތިއަބައިމީހުން ހޭދަކުރާށެވެ! އަދި ތިއަބައިމީހުންގެ އަތްތަކުން ތިއަބައިމީހުންގެ ނަފްސްތައް ހަލާކުގެ ތެރެއަށް އެއްލާނުލާށެވެ! އަދި އިޙްސާން ތެރިވާށެވެ! ހަމަކަށަވަރުން، އިޙްސާންތެރިންދެކެ ﷲ ލޯބިވެވޮޑިގެންވެއެވެ."
މިއާޔަތުގައި ﷲ ތަޢާލާ އަންގަވާފައި އެވަނީ "ތިއަބައިމީހުންގެ އަތްތަކުން ތިއަބައިމީހުންގެ ނަފްސްތައް ހަލާކުގެ ތެރެއަށް އެއްލައިނުލުމަށެވެ." އެއީ ހަށިގަނޑަށް ގެއްލުން ލިބިދާނެ އެއްވެސް ކަމެއް ނުކުރުމެވެ. ދުންފަތުގެ އިސްތިޢްމާލް ކުރުން ފަދަ ޞިއްހަތަށް ގެއްލުން ލިބޭ ކަންކަން ޙަރާމް ކަމުގައި ޢިލްމުވެރިން އެ ބަޔާން ކުރައްވަވަނީ މި ފަދަ ދަލީލުތަކުގެ މައްޗަށެވެ. ވީމާ ހަށިގަނޑަށް ބޭނުން ނުވާ ވަރަށް ކައި ހަށިގަނޑަށް ގެއްލުން ދިނުން އަހަރެމެންނަށް ހުއްދައެއް ނުވާނެއެވެ.
މުސްލިމުންގެ 4 ވަނަ ޚަލީފާ ޢުމަރުގެފާނު ވަނީ ޖެހިޖެހިގެން 2 ދުވަހު އެއްގަމު މަސް ކެއުން މަނާ ކުރައްވަވައިފައެވެ. ނަމަވެސް މިއަދު މިއުޅެނީ އެއްގަމު މަހާއި ނުލައި އެންމެ ފަހަރަކުވެސް ނުކެވިގެންނެވެ. މީގެ އިތުރުން ފޮނިގަދަ ކާތަކެތި ވެދުމަށް އެރުވުމުން އެތަކެތި ފަރިއްކުޅުވެވުމުން އަމިއްލަފުޅަށް ދުރުވެވަޑައިގެންނެވިއެވެ.
މީސްތަކުންނޭވެ! މީގެ ދެއަހަރުކުރިންވެސް ހަމަ މިމިސްކިތުގައި މިފަދައިން ވާހަކަދެއްކީމެވެ. މިބަޔާންކުރި ކަންކަމަށް ވިސްނުމުން ގިނަ ބައަކު ބަލިވާ ސަބަބުތައް އެނގުމަށް މިވަރުން ފުދޭނެ ކަމަށް އުންމީދުކުރަމެވެ! އަދި އެ ސަބަބަކީ ކެއުމުގައި އިސްރާފްކުރުމާއި (ހަށިގަނޑަށް ބޭނުން ނުވާވަރަށް ކެއުމާއި) ހަށިގަނޑަށް ގެއްލުން ހުރި ތަކެތި ކެއުންކަން އެނގޭނެ ކަމަށްވެސް އުންމީދުކުރަމެވެ.
އަދި އެއްކަންތައް ފާހަގަކޮށްލާނަމެވެ! މިއީ ހަމައެކަނި އަހަރެންފަދަ ޢިލްމުވެރިއަކު ބުނިބަހަކަށް ނުހަދައި އެކުވެރިންގެ މެދުގައި ނިކަން ދިރާސާކޮށްލައިބަލާށެވެ! ސުންނަތުގައިވާފަދައިން ކައިބޮއިހަދާ މީހުން ބަލިވާ މިންވަރާއި ކައެުމުން އިސްރާފްކުރާ މީހުން ބަލިވާ މިންވަރު ނިކަން އަޅުވައި ބަލައިލަބަލާށެވެ! އެއިރުން މިދެއްކި ވާހަކައިގެ ޙަޤީޤަތް ވަރަށް ބޮޑަށް އެނގިގެންދާނެއެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
