އެބޭކަލަކަށް ރުއްސުން ލެއްވެވި އަނަސްގެފާނުގެ އަރިއަހުން ރިވާވެގެންވެއެވެ. އެކަލޭގެފާނު ވިދާޅުވިއެވެ. ރަސޫލް ﷺޙަދީޘްފުޅު ކުރެއްވެވިއެވެ.
"ތިމަންކަލޭގެފާނާއިގެން މިޢްރާޖް އަރައިވަޑައިގެންނެވުނު ރޭ، ތިމަންކަލޭގެފާނު ބައަކު މީހުންގެ ކައިރިން ވަޑައިގަތީމެވެ. އެބައިމީހުނެ ނިޔަފަތިތައްވަނީ، ރަތުލޮއިންނެވެ. އެއިން އެބައިމީހުންގެ މޫނުތަކާއި މޭތަކުގައި (ވަކިއަޅައި) ނޮޅަމުން) ގެންދެއެވެ. ފަހެ ތިމަންކަލޭގެފާނު ވިދާޅުވީމެވެ. އޭ ޖީބްރީލްގެފާނެވެ! މިއީ ކޮން ބައެއްތޯއެވެ؟ އެކަލޭގެފާނު (ޖިބްރީލްގެފާނު ވިދާޅުވިއެވެ. މިބައިމީހުންނަކީ، މީސްތަކުންގެ (މުޅަ) މަސްކައި، އެބައިމީހުންގެ އަބުރަށް އަރައިގަތް މީހުންނެވެ!"
(ރިޔާޟުއްޞާލިޙީން: 1526)
މިއަދު ޣީބަބުނުމާއި މީސްތަކުންގެ ޢަބުރަށް އަރައިގަތުން މިވަނީ އެއްވެސް ބިރެއް ނެތި ކުރާ ފާފައަކަށް ހަދައިފައެވެ. އެމީހަކާއިމެދު ރުޅިވެރިކަން އޮތްނަމަ ހިތަށް އެރިހައި ވާހަކަތައް ހަދައި ފަތުރަނީއެވެ. ފޮޓޯތަކާއި ވީޑިއޯތަކާއި އަދި އަޑުވެސް ގޮތްގޮތަށް ބަދަލުކޮށްގެން މުޅި ދުނިޔެއަށް ހާމަކުރަނީ އެއްވެސް ބިރެއްނެތިއެވެ.
ކިތަންމެ އެކުގައި އުޅެފައި ނަމަވެސް ރުޅިއަތުވެއްޖެނަމަ އޭނާއާއިމެދު ދޮގު ވާހަކަތައް ފެތުރުމަކީ ޢާންމުކަމަކަށް ވެއްޖެއެވެ. ޙަދީޘްފުޅުގައި އޮތީ އެއީ ތެދުވާހަކައެއް ނަމަވެސް އަޚާގެ ޣައިރު ޙާޒިރުގައި އޭނާ ނުރުހޭނެ ވާހަކަތައް ދެއްކުމަކީ ޣީބަބުނުންކަމަށެވެ. ވީމާ އެކެވެނީ އަޚާގެ މުޅަމަހެވެ.
މިފަދަ ކޮންމެ ޢަމަލެއްކުރުމަކީ އަޚާގެ މުޅަމަސް ކެއުމެވެ. ބިރުވެތިވާށެވެ! ޙަދީޘްފުޅުގައި އެވަނީ ޤިޔާމަތްވެ ހިސާބު ބެއްލެވި އޭނާއަށް ޙައްޤު ޖަޒާ ލިބެންދެން ބަރުޒަޚުގެ ޢާލަމުގައި ހޭދަކުރަންޖެހޭނެ ދިގު މުއްދަތުގައި ވެސް އެފަދަ ޢަމަލުކުރުމުން އެމީހަކަށް ލިބިލިބި ހުންނާނެ ޢަޛާބުގެ ވާހަކައެވެ.
- އިސްލާމީ ތިލަފަތުގެ ދަރުސަކުން
