މާތް ﷲ އެކަލޭގެފާނަށް ރުއްސުން ލެއްވެވި ވާޘިލަތު ބުނުލް އަސްޤައުގެ ކިބައިން ރިވާވެގެންވެއެވެ. އެކަލާގެފާނު ވިދާޅުވިައެވެ. ރަސޫލް ﷺ ޙަދީޘް ކުރެއްވެވިއެވެ.
"ތިބާގެ އަޚާއަށް މެދުވެރިވާ ދަތި، އުނދަގޫ ކަމެއްގެ މައްޗަޗަށް ތިބާ އުފާނުކުރާހުށިކަމެވެ. (އެއީ) ﷲ އޭނާއަށް ރަޙްމަތް ލައްވަވައި، (އެބަހީ އޭނާ އުނދަގުލުން ސަލާމަތްކުރައްވަވައި) އެކަލާނގެ ތިބާ ހައްޔަރުކުރައްވަވައިފާނެ ކަމެކެވެ."
(ރިޔާޟުއްޞާލިޙީން: 1577)
ރިޔާޞުއްޞާލިޙީންގައި މިޙަދީޘްފުޅު ބަޔާންކޮށްފައިވަނީ މުސްލިމުންނަށް ދިމާވާ ގެއްލުމާއިމެދު އުފާކުރުމަކީ ނަހީކުރައްވަވާފައިވާ ކަމެއްކަން ބަޔާންކުރުމުގެ ބާބުގައެވެ.
ބައެއް މީހުން ﷲ ތަޢާލާ ޙަރާމްކުރެއްވެވި ކަމަކަށް ތިމާ އަރަައިނުގަންނަ ކަމަށް ބުނާއިރު ކޮންމެވެސް ސަބަބެއް މެދުވެރިވެގެން ތިމާ އެމީހަކަށް ނަފްރަތުކުރާ މީހަކަށް ދެރައެއް ލިބިއްޖެނަމަ އެކަމަށް އުފާކުރެއެވެ. ތިމާ ނަފްރަތުކުރާ މީހެއްގެ ކައިވެނި ރޫޅުން، އަތްމަތިދަތިވުން، ވަޒީފާ ގެއްލުން، ކުރެވުނު ކުށަކާއި ގުޅިގެން ނަމަވެސް ބަންދުކުރުން، އަދަބެއް ލިބުން ފަދަ ކަމެއް މެދުވެރިވި ނަމަވެސް އުފާކުރެއެވެ.
މީހަކު ކުރި ކުށަކަށް އެމީހަކަށް ދުނިޔޭގައި އަދަބުލިބުމަކީ އެމީހަކަށް ލިބޭ ދެރައެއްވެސް ނޫނެވެ. އެހެނީ އެއަދަބުގެ ސަބަބުން އިޞްލާޙްވެ ޢަމަލުތައް ހެޔޮގޮތުގައި ބަހައްޓަން އެމީހަކަށް ފުރުޞަތުލިބިގެންދިއުމަކީ އެމީހަކަށް ލިބިގެންދާ ބޮޑު ނިޢްމަތެކެވެ. މީގެއިތުރުން ބައެއް މީހުން އަދަބުގައި ހޭދަކުރާ މުއްދަތުގައި އަޅުވެރިވެ، މީސްތަކުންނަށް ފައިދާކުރާނެ ބޮޑެތި ފޮތްތައް ލިޔުންފަދަ ކަންކަންވެސް ކުރެއެވެ. އެފަދަ ކަމެއް ކުރެވިއްޖެނަމަ އެކަންވެގެންދާނީ އެކަމެއްގެ ފައިދާ މީސްތަކުންނަށް ކުރަމުންދާހައި ދުވަހަކު އެމީހަކަށް ޘަވާބުލިބިގެންދާނެ ޢަމަލަކަށެވެ.
އެންމެ ބޮޑަށް ވިސްނަން ޖެހޭ ކަމަކީ ""ތިބާގެ އަޚާއަށް މެދުވެރިވާ ދަތި، އުނދަގޫ ކަމެއްގެ މައްޗަޗަށް ތިބާ އުފާނުކުރުމަށް" ޙަދީޘްފުޅު ކުރައްވަވައި ތިބާ އެފަދަ ކަމެއް ކޮށްފިނަމަ އެއީ "ﷲ އޭނާއަށް ރަޙްމަތް ލައްވަވައި، (އެބަހީ އޭނާ އުނދަގުލުން ސަލާމަތްކުރައްވަވައި) އެކަލާނގެ ތިބާ ހައްޔަރުކުރައްވަވައިފާނެ ކަމެއް" ކަމަށް ޙަދީޘްފުޅުކުރައްވަވާފައި އޮތުމުންނެވެ.
މުސްލިމުންނަކީ އަޚުންނަށް ރުޅިވެރިކަން ބާއްވައި ހަސަދަލައިގެން އުޅުން ހުއްދަ ބައެއް ނޫނެވެ. އަދި އެފަދަ ކަމެއް ހިތުގައި އޮތްނަމަވެސް އަޚާއަށް ހިތާމައެއް ނުވަތަ ދެރައެއް ލިބޭހިނދު އުފާކުރުން ހުއްދަވެގެން ނުވާކަމާއި އެއީ ނަހީކުރައްވަވާފައިވާ ކަމެއް ކަމާއި އެފަދަ ކަމެއް ކޮށްފިނަމަ އެކަމުގެ ސަބަބުން ތިމާއަށް މުޞީބާތެއް ކުރިމަތިކުރައްވަވައިފާނެކަން މިޙަދީޘްފުޅުން އެއޮތީ އެނގޭށެވެ!
- އިސްލާމީ ތިލަފަތުގެ ދަރުސަކުން
