ކޮވިޑްގެ ސަބަބުން ކަރަންޓީނުވެފައިވާ މީހަކު ދިރިއުޅޭގެ މިސްކިތަކާއި ވަރަށް ކައިރިއެވެ. މިސްކިތުގައިކުރާ ނަމާދު ތާޅަފިލިން ރަނގަޅަށް އަޑުއިވެއެވެ. އެޙާލަތުގައި އެމީހާއަށް ތާޅަފިލިން އިވޭ އަޑަށް ބަލައިގެން އިމާމާއިއެކުގައި ނަމާދުކުރެވިދާނެތޯއެވެ؟ އެގޮތަށްކުރާ ނަމާދު ޞައްޙަވާނެތޯއެވެ؟
ޖަވާބު:
އިމާމާގެ އަޑު ރަނގަޅަށް އިވޭނަމަ އެގޮތަށް ކުރާ ނަމާދު ޞައްޙަވާނެއެވެ! އެމީހާ ހުރި ޙާލަތު ﷲ ތަޢާލާ މޮޅަސް ދެނެވޮޑިގެންވެއެވެ. ޖަމާޢަތުގައި ބައިވެރިވެވުނުކަމުގެ ޘަވާބު ދެއްވެވުން ވަނީ ﷲ ތަޢާލާއަށެވެ. ޖަމާޢަތުގައި ބައިވެރިވިކަމުގެ ޘަވާބު ނުދެއްވަވާނެ ކަމަކަށް ވެސް ނުބުނެވޭނެއެވެ!
ޖަވާބު ދެއްވެވީ: ޑރ. މުޙައްމަދު އިޔާޟް ޢަބްދުއްލަޠީފް
ކޮވިޑްގެ ސަބަބުން މާލެ ސަރަހައްދުގައި ގިނަ ބައަކަށް ކަރަންޓީނުވެގެން ތިބެންޖެހިފައިވާ މިޙާލަތުގައި މިއީ ނަމާދުކުރެވެން އޮތް ގޮތެކެވެ. މީހާގެ ޙާލަތުގެ މައްޗަށް ބައްލަވައި ސަވާބު ދެއްވަވާނެ މިންވަރު ﷲ ތައާލާއަށް ވަކީލްކުރާށެވެ!
މައްކާގެ ޙަރަމްފުޅު ކައިރީގައި ހުންނަ ހޮޓާތަކުގައި ނަމާދުކުރަން ހަދާފައިވާ ތަންތަނުގައިވެސް އަދި ކޮޓަރިތަކުގައިވެސް ޙަރަމްފުޅުގެ ތާޅަފިލީގެ އަޑަށް ނަމާދުކުރެއެވެ. ރާއްޖޭގެ މަޝްހޫރު ދީނީ ޢިލްމުވެރިޔާ ޑރ.ޢަބްދުލްމަޖީދު ޢަބްދުލްބާރީ ޢާއިލާގެ ގިނަ ބޭފުޅުންތަކަކާއިއެކު ޙައްޖަށް ވަޑައިގެންނެވި ފަހަރަކު (2013 ވަނަ އަހަރު) ބައެއް ނަމާދުތައް ހޮޓަލުގައި ހުންނަވައިގެން މިފަދައިން ކުރެއްވެވިއެވެ.
