ބައެއް މީހުން ނަމާދުކުރެއެވެ. ނަމަވެސް ކުރަނީ އެމީހަކަށް ކުރަން ފަސޭހަވަގުތަކު އެމީހަކަށް ކުރަން ފެނުނު ނަމާދެކެވެ. މިފަދަ މީހުންނަކީ ނަމާދު ޤާއިމުކުރާ ބައެއް ނޫނެވެ. ނަމާދު ޤާއިމުކުރުމަކީ ނަމާދުވަގުތުވުމުން ނަމާދު ކުރަން އަވަސްވެގަތުމާއިއެކު ފަރުޟު 5 ނަމާދު ޤަވާއިދުން ކުރަމުން ގެންދިއުމެވެ.
ނަމާދު ވަގުތުޖެހުމުން ނުކޮށް ލަސްކުރުމަކީ ކޮންމެފަހަރަކު ކޮށްގެންވާނެ ކަމެއް ނޫނެވެ. ލަސްކުރަންވާނީ ޚާއްޞަޙާލަތެއް ޖެހުމުންނެވެ. އެއްވެސް ޙާލެއްގައި ކޮންމެ ނަމާދަކީ އެމީހަކަށް ފަސޭހަވަގުތަކު ކުރާ ނަމާދަކަށް ހަދައިގެން ނުވާނެއެވެ.
ނަމާދުގެ ވަގުތުތައް ދެމިގެންވަނީ މީހަކަށް ކަމެއް ދިމާވެގެން ފަހަރެއްގައި ވަގުތު ޖެހުމުން ނުކުރެވިދާނެކަމަށްޓަކައެވެ. ނަމާދުގެ ފުރިހަމަ ޘަވާބުލިބިގަތުމަށްޓަކައިވެސް އޮތީ ޖަމާޢަތުގައި ކުރުންކަމަށް އޮތީވެސް އެސަބަބަށްޓަކައެވެ. ޖަމާޢަތުގައި ކުރުމުން 27 ގުނަ އިތުރުވެފައި (ފިރިހެނުން) އެކަނިކުރުމުން އެންމެ ޘަވާބެއް ދެއްވަވަނީ އެސަބަބަށްޓަކައެވެ. އަދި އަންހެނުންނަށްވެސް އޮތީ ވަގުތުޖެހުމުން ވީހައި އަވަހަކަށް ނަމާދުކުރުމެވެ.
ހަމައެއާއިއެކު މަޑުމައިތިރިކަމެއް ނެތި އަވަސްއަރުވާލައިގެން ނަމާދުކުރުމުން އެއީ ނަމާދަކަށް ނުވާނެކަން ޙަދީޘުން އެނގެން އެބައޮތެވެ. ނަމާދުގައި ކިޔާތަކެތި ކިޔަންވާނީ ލަސްލަހުންނެވެ. ކިޔާތަކެއްޗަށާއި މާނައަށް ވިސްނައިގެންނެވެ. ޤުރްއާން ކިޔަވަންވާނީ ލަސްލަހުންނެވެ. އަކުރު އަކުރަށް ނުކިޔާނަމަ ކިޔެވުން ފުރިހަމައެއް ނުވާނެއެވެ. ނަމާދުގައި ކިޔާ ތަކެއްޗާއި ކިޔަވާ އާޔަތްތައް ފުރިހަމަނުވާނަމަ އެނަމާދު ނަމާދަކަށްނުވާނެއެވެ.
ހަމައެއާއިއެކު ރުކޫޢާއި ސުޖޫދާއި އިޢްތިދާލާއި ދެސަޖިދަމެދުގައި އިނުމުގައި އެކަށީގެންވާވަރަށް މަޑުކޮށްލަންވާނެވެ. ފުންމަފުންމައިގެންދަމުން ކުރާ ނަމާދަކީ ނަމާދަކަށް ނުވާނެއެވެ. ވީމާ ކުރާނަމާދަކީ ﷲ ތަޢާލާ ޤަބޫލުފުޅު ކުރިއްވަވާ ފެންވަރުގައި ކުރާ ނަމާދަކަށް ހަދަން އެމީހަކަށް ކުރެވެން ހުރި ހުރިހާ މަސައްކަތެއް ނުކުރާނަމަ ނަމާދު ފުރިހަމައެއް ނުވާނެއެވެ.
ރަސޫލް ޙަދިޘްފުޅުކުރައްވަވާފައިވަނީ ކޮންމެ ނަމާދެއްކުރިނަމަވެސް އެއީ ތިމާއަށް އެންމެފަހުން ކުރެވޭނެ ނަމާދުކަމަށްވެދާނެކަމަށް ބަލައިގެން ނަމާދުކުރުމަށެވެ. ރަސޫލް ﷺ ގެ މިޙަދީޘް ބަސްފުޅުންވެސް އެނގިގެންދަނީ ނަމާދުކުރާއިރު ވީހައި ފުރިހަމައަށް ނަމާދުކުރަން ސަމާލުކަންދޭންޖެހޭނެ މިންވަރެވެ! ހިތާމައަކީ މިކަންކަމަކީ އެންމެންނަށްވެސް ވަރަށް ރަނގަޅަށް އެނގޭ ކަންކަން ނަމަވެސް ސަމާލުކަންދެވޭ މިންވަރުކުޑަކަމެވެ. ނުވަތަ ސަމާލުކަން ނުވެސްދެވޭކަމެވެ.
ތިބާ ދުނިޔޭގައި ހުރެ ނަމާދުކުރިއެވެ. ނަމަވެސް ތިބާ ނަމާދަށް ފަރުވާކުޑަކުރުމުގެ ސަބަބުން ޤިޔާމަތްދުވަހު ތިބާއަކީ ނަމާދުނުކުރާ މީހަކު ކަމުގައިވެއްޖެނަމަ ކުރިމަތިވާނެ ޙާލަތާއިމެދު ވިސްނައިލާށެވެ!
- އިސްލާމީ ތިލަފަތުގެ ދަރުސަކުން
