އެއިރު އަހަރެންގެ އުމުރަކީ އެންމެ 32 އަހަރެވެ. ކައިވެންޏަށް 8 އަހަރެވެ. 3 ދަރިން ލިބިފައިވެއެވެ. ދިރިއުޅެމުންދިއައީ ވަރަށް އުފަލުގައެވެ. ފިރިމީހާކުރާ މަސައްކަތުން ލިބޭ އާމްދަނީން ދެކޮޅުޖެހެނީ ކިރިޔާއެވެ. ނަމަވެސް އެއީ އެއްވެސް މައްސަލައެއްކަމަށް ދެކެ ދުވަހަކުވެސް އެއްވެސް ޝަކުވާއެއް ނުކުރަމެވެ.
ދަރިން ގޮވައިގެން ޕާކްތައް ފަދަ ތަންތަނަށް ގޮސްއުޅެނީވެސް އެތަންތަނުން ތަކެތި ނުގަނެވޭނެތީ ގޭގައި ތަކެތި ތައްޔާރުކޮށްގެންނެވެ. ޢާއިލާއެކުގައި ވަގުތު ހޭދަކޮށްލެވުމުން އަގުބޮޑުކެއުން ކައިހެދުމަށްވުރެ މާބޮޑަށް އުފާވެރިކަން ލިބެއެވެ.
ކުއްލިއަކަށް ކަންކަން ބަދަލުވާން ފެށިއެވެ. ފިރިމީހާއަށް ބަދަލުތަކެއް އަންނަންފެށިއެވެ. ޢާއިލާ އާއިއެކުގައި ހޭދަކުރާ ވަގުތު މަދުކުރިއެވެ. އަހަރެންގެ އިތުރުން އިތުރުން ދަރިންނަށް ދޭ ސަމާލުކަން ކުޑަކުރިއެވެ. އެންމެފަހުން ގެއަކީ އޭނާއަށް އެއްވެސް މުހިންމު ތަނަކަށްވެސް އޮތީ ނުވެފައެވެ.
އެގޮތުގައި ހައަކަމަސްފާއިއތުވިފަހުން އިވުނީ 2 ވަނަ ކައިވެންޏެއްކުރިކަމުގެ ޚަބަރެވެ. އެއްވެސް ޝަކުވާއެއް ނުކުރަމެވެ. އެއްވެސް ސުވާލެއްވެސް ނުކުރަމެވެ. ބެލީ ކެތްތެރިވެވޭތޯއެވެ. އެގޮތަށް މަސައްކަތްކުރަމުންދަނިކޮށް އަހަރެން ބަލިވާންފެށިއެވެ. ބޮލުގައި ރިއްސަންފެށިއެވެ. މޭނުބައިކޮށް ހޮޑުލެވެން ފެށިއެވެ. އަހަރެންނަށް ކަމެއް މެދުވެރިވެއްޖެކަން އަހަރެންގެ ޢާއިލާއަށް އެނގުނީ އެހިސާބުންނެވެ.
އެހިސާބުން ޢާއިލާގެ އެހީތެރިކަން ލިބެންފެށިއެވެ. އަހަރެން ހިތްހަމަޖައްސައިދޭން ކަންކަންކުރަންފެށިއެވެ. ގެއިން ބޭރަށް ގެންގޮސް އުފާކޮށްދޭން މަސައްކަތްކުރިއެވެ. ޑޮކްޓަރުންނަށްވެސް ދެއްކިއެވެ. ނަމަވެސް އެއްވެސް ނަތީޖާއެއް ނުފެނުނެވެ. އެމީހުންނާއިއެކު ހޭދަކުރެވޭ ވަގުތުތަކުގައި ލުއިކަން ލިބެއެވެ. ނަމަވެސް ގެއަށް އާދެވުމާއިއެކު ކަންކަން ބަދަލުވެއެވެ. ބޭސްކާވަގުތު ލުއިކަންލިބެއެވެ. ބޭހުގެބާރުކެނޑޭއިރު ކަންކަން އޮންނަނީ ގޯސްވެ ކުރީ ޙާލަތަށް ގޮސްފައެވެ.
އެހެންކަމުން އެހިސާބުން ނިންމީ އަމިއްލައަށް ކަންކަން ޙައްލުކުރަން މަސައްކަތްކުރުމަށެވެ. ކީރިތި ޤުރްއާނަކީ ހުރިހާ ކަމެއްގެވެސް ޙައްލުކަމަށް ބުނެވޭ ބުނުމުގެ މައްޗަށް ބުރަވެ ޤުރްއާނާއި ގުޅުންބަދަހިކުރަންފެށީމެވެ. އެމަސައްކަތުގެ ތެރެއިން ފެނުނު އެއް އާޔަތަކީ:
"ހަނގުރާމަކުރުން ތިއަބައިމީހުންގެ މައްޗަށް ފަރުޟުކުރައްވަވައިފިއެވެ. އެއީ، (އެކަމަކީ) ތިއަބައިމީހުންނަށް ނުރުހެވޭ ކަމެއްކަމުގައިވަނިކޮށެވެ. އަދި ތިއަބައިމީހުން ނުރުހޭކަމެއް އެއީ ތިއަބައިމީހުންނަށް ލާބަހުރިކަމެއް ކަމަށް ވެދާނެތެވެ. އަދި، ތިއަބައިމީހުން ރުހޭކަމެއް އެއީ ތިއަބައިމީހުންނަށް ގެއްލުންހުރި ކަމެއް ކަމަށްވެދާނެތެވެ. އަދި ﷲ ހުރިހާ ކަމެއް ދެނެވޮޑިގެންވެއެވެ. ތިއަބައިމީހުންނަކަށް ނޭނގެއެވެ." (އަލްބަޤަރާ: 216)
މިއާޔަތްފެނުމާއިއެކު މާނަމުޅިން ބަދަލުކޮށްލެވުނެވެ. "ހަނގުރާމަކުރުން ތިއަބައިމީހުންގެ މައްޗަށް ފަރުޟުކުރައްވަވައިފިއެވެ." އޮތްއޮތުން އަހަރެން މާނަކުރީ ކަނޑިބަޑީން ކުރާ ހަނގުރާމައަކަށް ނޫނެވެ. އަހަރެންނަށް އަހަރެންގެ ދިރިއުޅުމާއި ކުރަންޖެހިފައިމިވާ ހަނގުރާމައަށެވެ.
"އެއީ، (އެކަމަކީ) ތިއަބައިމީހުންނަށް ނުރުހެވޭ ކަމެއްކަމުގައިވަނިކޮށެވެ." އަހަރެން މާނަކުރީ އަހަރެން ކިތަންމެ ބޭނުންނުވިނަމަވެސް ހިތްދަތިކަމާއި މުޞީބާތްތައް ކުރިމަތިކުރައްވަވާނެކަމެވެ. ތަކްލީފްތައް ޖައްސުވާނެކަމެވެ.
"އަދި ތިއަބައިމީހުން ނުރުހޭކަމެއް އެއީ ތިއަބައިމީހުންނަށް ލާބަހުރިކަމެއް ކަމަށް ވެދާނެތެވެ. އަދި، ތިއަބައިމީހުން ރުހޭކަމެއް އެއީ ތިއަބައިމީހުންނަށް ގެއްލުންހުރި ކަމެއް ކަމަށްވެދާނެތެވެ. އަދި ﷲ ހުރިހާ ކަމެއް ދެނެވޮޑިގެންވެއެވެ. ތިއަބައިމީހުންނަކަށް ނޭނގެއެވެ." އާޔަތުގެ މިބައި އަހަރެން މާނަކުރީ ކުރިމަތިވާ މުޞީބާތާއި ތަކްލީފްތަކުގެ ފައިދާ އަހަރެމެންނަށްް ނުއެނގޭނެކަމާއި އަހަރެމެންނަށް ނުރުހެވޭ ކަމެއްގައިވެސް ކުރާނެ ބޮޑު ފައިދާއެއް އޮންނާނެ ކަމެވެ. އެކަންކަން ދެނެވޮޑިގެންވަނީ ﷲ ތަޢާލާކަމާއި އަހަރެމެންނަށް ނުއެނގޭނެކަމެވެ.
ކޮންމެއަކަސް މިއާޔަތް މިގޮތަށް މާނަކޮށްލެވުމުން މިކުރެވުނު ކަންތަކާއި ބެހޭގޮތުން، މިއީ ހަމަ ރަނގަޅު ވިސްނުމެއްތޯ ޢިލްމުވެރި އަންހެނަކާއި މަޝްވަރާކޮށްލީމެވެ. އަހަރެންގެ ވިސްނުމަށް އޭނާ ވަރަށް ބޮޑަށް ތަޢްރީފްކުރިއެވެ. އޭނާ ބުންޏެވެ. "ކީރިތި ޤުރްއާނަކީ ކިތަންމެ ވަރަކަށް ފީނިނަމަވެސް އަޑި ނުހޯދޭނެ ޚަޒާނާއެކެވެ. ފީނިވަރަކަށް ކަންކަން ދާނީ ވިސްނެމުންނެވެ. ކީރިތި ޤުރްއާން ކިޔަވަންވާނީ ކޮންމެ އާޔަތަކީ ޚުދު ތިމާއަށް ނުވަތަ ތިމާއަށް ކުރިމަތިވެފައިވާ ޙާލަތަށް ވަޙީކުރައްވަވާފައިވާ އާޔަތެއްކަމަށް ބަލައިގެންނެވެ. އެގޮތަށް ކިޔެވުމުން ހީވެސް ނުކުރެވޭވަރުގެ ބޮޑެތި ފައިދާތައް ދިރިއުޅުމުގެ ހުރިހާ ކަންކަމަށްވެސް ކުރާނެއެވެ."
ދެން އޭނާ އަހަރެންނަށް ކީރިތި ޤުރްއާނުން ވިސްނައިދިނެވެ.
"ﷲ ތައާލާ މީހަކުދެކެ ލޯބިވެވޮޑިގެންފިނަމަ އެމީހަކަށް ކުރިމަތިކުރައްވަވާ އިމްތިޙާންތައް ވަރުގަދަވާނެކަމެވެ." (29:2)
"އެއްވެސް ނަފްސަކަށް ނުއުފުލެވޭނެވަރުގެ ތަކްލީފެއް ނުޖައްސަވާނެކަމެވެ." (2:286)
"އެމީހާ އެމީހާގެ ކަންކަން ބަދަލުކުރަން މަސައްކަތްކުރުމުން ނޫނީ ﷲ ތަޢާލާ އެމީހާގެ ޙާލަތު ބަދަލުނުކުރައްވަވާނެކަމެވެ." (13:11)
އަދި ﷲ ތަޢާލާ މީހަކުދެކެ ލޯބިވޮޑިގެންފިނަމަ އެމީހަކަށް ދަތި އުނދަގޫ ޙާލަތު މެދުވެރިކުރައްވަވާނެކަމަށް އޮތް ޙަދީޘްފުޅު ކިޔައިދީ އެންމެ ދަތި ޙާލުކޮޅުގައި އުޅުއްވެވީ ރަސޫލްބޭކަލުންކަންވެސް ވިސްނައިދިނެވެ.
މިއީ ބުނާ ޙައްޤު ތެދުބަހެވެ. އަހަރެންނަށް ކުރިމަތިވެފައިހުރި ހުރިހާ ކަންބޮޑުވުންތަކެއް ވަގުތުން ފިލައިގެންދިއަފަދައެވެ. އަހަރެންނަށް އެލިބުނު ބާރާއި ހިތްވަރު ބުނެދޭންވެސް ނުއެނގެއެވެ. ފުރަތަމަވެސް ހިތަށް އެރިއެވެ. "ﷲ ތަޢާލާ އަހަރެންނަށް ރުހިވޮޑިގެންފިއެވެ. މިހުރިހާ ކަންކަން ކުރިމަތިކުރެއްވެވީ އަހުރެން ދެކެ ލޯބިވެވޮޑިގަތުމުންނެވެ. ފިރިމީހާ ބޭނުންނަމަ އަދިވެސް އިތުރު މީހުންނާއި ކައިވެނިކުރަންވީއެވެ. އަހުރެންގެ އެއްވެސް ކަންބޮޑުވުމެއް ޝަކުވާއެއް ނެތެވެ. އަހުރެންގެ ކަންކަން ﷲ ތަޢާލާ ބަލަހައްޓަވާނެތެވެ! ދެރަވާނެ ގޮތަކަށް އެއްވެސް ކަމެއް މިންވަރު ނުކުރައްވަވާނެތެވެ!"
އަހުރެން މަސައްކަތްކުރީ ވީހައި ގިނަ އަޅުކަންކުރެވޭތޯއެވެ! ﷲ ތަޢާލާ އާއި ކުއްތަންވެވޭތޯއެވެ! އެގޮތަށް އުޅެމުންދަނިކޮށް އެއްދުވަހަކު މީހަކު ގެއަށް އައިސް ދިއްކޮށްލި ސިޓީއެއްގައި އޮތީ އަހަރެން ވަރިކޮށްފި ކަމަށެވެ. ހމަތެދެކެވެ. އެކަން އެނގުމުންވެސް އެއްވެސް އަސަރެއް ނުކުރެއެވެ. ކަންބޮޑެއްވެސް ނުވެއެވެ. ހަމައެކަނި ދުލުން ބުނެލީ ﷲ ތަޢާލާއަށް ވަކީލްކޮށްފީމެވެ.
ގެއަކީ އަހަރެންގެ މައިންބަފައިންގެ ގެއެކެވެ. ގެ ދީފައިހުރީ އަހަރެމެން ދިރިއުޅޭށެވެ! ވީމާ ގެއިން ނުކުންނަން ޖެހޭނީވެސް އޭނާއެވެ.
އެހިސާބުން އަހަރެންނަށް ޢާއިލާގެ އެހީތެރިކަން ލިބެންފެށީ ވަކިމިނަކަށް ނޫނެވެ. ހަމައެކަނި އަޚުންނާއި އުޚުތުންނެއް ނޫނެވެ. ދެބެންގެ ދެދަރި ހިސާބުކުދިންވެސް އަހަރެންނަށް އެހީތެރިވިއެވެ. އަހަރެންގެ އަތްމަތި ކުރިއަށްވުރެ މާބޮޑަށް ތަނަވަސްވެގެންދިއައެވެ.
ޢިއްދަ ހަމަވިތާ މަހެއްހައިދުވަހުގެ ތެރޭގައި އަހަރެންގެ އުޚުތަކު ދެއްކި މީހަކާއި ކައިވެނިކުރީމެވެ. އޭނާގެ ކިބައިން އަހަރެންނަށް ލޯބިލިބެންފެށީ ހީވެސް ނުކުރެވޭ ވަރަށެވެ. އަދި އޭނާއަކީ މެދުމިނުގެ ތަނަވަސްމީހަކަށްވުމުން އެއްވެސް ދަތިކަމެއް ނެތެވެ. އަދި ފުރަތަމަ ފިރިމީހާއަށްވުރެ ތަޤްވާވެރިކަމުގައި ކުރިއަރާފައިވާ މީހަކަށްވުމުން ލިބޭ އުފާވެރިކަން މާބޮޑެވެ.
އަހަރެންނަށް ކުރިމަތިވިފަދަ ޙާލަތުގައިވާ ހުރިހާ އުޚުތުންނަށް ބުނަމެވެ. ތިއަ ކަނބަލުންނަށް ފައިދާކުރާނީ ކޮން އާޔަތަކުންކަން ބުނެދޭކަށް ނުއެނގެއެވެ. ނަމަވެސް އަހުރެންގެ ހުރިހާ މައްސަލަތައް ފިލައި "މަރުވެފައިވަނިކޮށް" އަލުން ދިރުން ލިބުނީ މިއާޔަތުންނެވެ. ޢުޚުތު ވިސްނައިދިން އާޔަތްތަކާއި ޙަދީޘުންނެވެ. މިބަސް ޤަބޫލުކުރެވޭނަމަ ތިއަ އުޚުތުންވެސް ބޭނުންހިފައި ހިތްވަރުލިބިގަންނާށެވެ! ﷲ ތަޢާލާ ހިތްވަރާއި މަދަދުވެސް ދެއްވަވާނެތެވެ! ރަޙްމަތްވެސް ލައްވަވާނެތެވެ. އިން ޝާ ﷲ
- ޙަސީނާ / ލާހޯރު، ޕާކިސްތާން
