ޤިޔާމަތް ދުވަހު ރަސޫލް ﷺ އަށް އެބައަކު ފާހަގަކުރެއްވެވޭނެ، އަދި އެބައަކަށް ރަސޫލް ﷺ ފާހަގަކުރެވޭނެ މީހުންގެތެރޭގައި ރަސޫލް ﷺ އާއި ހަމައަށް ވާޞިލުނުވެވޭނެ ބައަކު ތިބޭނެކަން ޙަދީޘްފުޅުން އެނގެން އެބައޮތެވެ. ރަސޫލް ﷺ ގެ ފެންއާރުން ފެންބޯން އެމީހުން އާރާއި ކައިރިވާން މަސައްކަތްކުރުމުން މަލާއިކަތުން އެމީހުން ކައިރިވިއަނުދީ ދުރުކުރައްވަވާނެކަންވެސް ޙަދީޘުން އެނގެން އެބައޮތެވެ.
އެއީ ރަސޫލް ﷺ ސުވަރުގެވަޑައިގަތުމަށްފަހު ދީނުގެ ކަންކަން އެމީހުން ބޭނުން ގޮތަކަށް ބަދަލުކޮށްގެން އުޅުނު މީހުންނެވެ. ސުންނަތަށް ޢަމަލުނުކުރި މީހުންނެވެ. ދީނުގެތެރެއަށް އިތުރު އައުކަންކަން ވެއްދި މީހުންނެވެ. މުނާފިޤުންނެވެ. މިފަދަ ޢަމަލުތައްކުރި މީހުންނެވެ.
ޢިލްމުވެރިން ބަޔާންކުރައްވާ ގޮތުގައި އެމީހުން ވަކިކުރައްވަވަން ރަސޫލް ﷺ އަށް އެނގިވަޑައިގަންނަވާނީ މީސްމީހުން ވަކިވަކިން އެއީ ކޮންބައެއްކަމެއް ނޫނެވެ. އެމީހުން ވުޟޫކޮށް އުޅުމުން އެމީހުންގެ ގުނަވަންތަކުގައިވާ ނޫރުންނެވެ.
ބައެއް ޢިލްމުވެރިން ބަޔާންކުރައްވަވާ ގޮތުގައި ބޮޑެތި ފާފަތައްކޮށް އުޅުނު މީހުންނަށާއި ފާފަކުރަން އެހީތެރިވި މީހުންނަށާއި ފާފަކުރުވި މީހުންނަށްވެސް ރަސޫލް ﷺ އާއި ކައިރިއެއް ނުވެވޭނެއެވެ.
މޮޅަށް ދެނެވޮޑިގެންވަނީ ﷲ ތަޢާލާއެވެ!
- އިސްލާމީ ތިލަފަތުގެ ދަރުސަކުން
