އިންސާނުންގެ ދިރިއުޅުމުގައި ކުރިމަތިވާ މައްސަލައަކީ ކަމެއް ކުރިމަތިވުމުން އެއީ ތިމާށއަށް ގެއްލުންހުރި، ނުވަތަ ދެރަކަން ލިބޭ ކަމެއްކަމަށް ޤަބޫލުކުރެވުމެވެ. އެކަމަށް ކަންބޮޑުވެ މާޔޫސްވެވުމެވެ. ދެރަވެ ހިތާމަކުރުމެވެ.
ނަމަވެސް ޙަޤީޤަތަށް ބަލައިފިނަމަ އެއްވެސް މުސްލިމަކު ދެރަވެ މާޔޫސްވެ ހިތާމަކުރަންޖެހޭނެ އެއްވެސް ޙާލަތެއް ކުރިމައްޗެއް ނުވާނެއެވެ. އެހެނީ އެފަދަ ކަމެއްކަމަށް ތިމާއަށް ޤަބޫލުކުރެވޭ ކަމެއް ކުރިމަތިވުމުން ޝުކުރުކޮށް ކެތްތެރިވެއްޖެނަމަ އެކަމަސް ދެއްވަވާ ޘަވާބާއި ދަރުމަ އެހައި ގިނައެވެ. އެހައި މަތިވެރިވެސްމެއެވެ.
ދެވަނަ ގޮތަކީ އެފަދަ ކަންކަން މެދުވެރިވުމުން ތިމާ އާއި ﷲ ތަޢާލާ އާއި އިތުރަށް ގުޅުންބަދަހިވެގެންދެއެވެ. ﷲ ތައާލާ އާއި ކުއްތަންވުމަށް އިތުރަށް މަސައްކަތްކުރެވެއެވެ. ތައބާވެ ހެޔޮ ޢަމަލުތައް ކުރެވެއެވެ. އެކަމުގެ ސަބަބުން އެމީހަކަށް ދެދުނިޔޭގެ ބާއްޖަވެރިކަން ލިބިގެންދެއެވެ.
ވީމާ ކިތަންމެ ބޮޑަށް ކަންބޮޑުވާންޖެހޭ ކަމެއް ކުރިމަތިވިނަމަވެސް ހިތާމަކުރުމެއް ނެތެވެ. އޮތީ އުފާކުރުމެވެ. އެކަމަކުން އެމީހަކަށް ކުރާނެ ފައިދާގެ ބޮޑުކަން ހިތަށް އެރުވުމުން ދެރަވެ މާޔޫސްވާކަށް ނުޖެހޭނެއެވެ! އަދި އެކަމެއް ކުރިމަތިކުރެއްވެވީތީ އުފާވެސް ކުރެވޭނެއެވެ! ޝުކުރުވެރިވެސްވެވޭނެއެވެ!
- މުފްތީ މެންކުގެ ދަރުސަކުން
