ﷲ ތަޢާލާގެ ރަޙްމަތަށް އެދޭ މީހުންނަށް އެކަން ހިންމަވައިދެއްވެވުން ވީހައި ފަސޭހަކުރައްވަވައި ދެއްވެވުމުގެ ގޮތުން ﷲ ތައާލާވަނީ ވަރަށް ވަރަށް ލުއިފަސޭހައިން ކަންކަން ޙާޞިލުކުރެވޭނެ މަގު ތަނަވަސްކުރައްވަވައި ދެއްވަވައިފައެވެ.
މިސާލަކަށް:
- ޢީޝާ ނަމާދާއި ފަތިސްނަމާދު ޖަމާދު ޖަމާޢަތުގައި ކުރުމުން މުޅި ރޭއަޅުކަންކުރުމުގެ ޘަވާބު ދެއްވަވަތެވެ.
- އެންމެ ދެރަކްޢަތްކުރަންޖެހޭ ފަތިސްނަމާދުން ދުވަސްފެށުމުން މުޅި ދުވަހު އެމީހާއަށް ރައްކައުތެރިކަން ދެއްވަވަތެވެ. ކުރާ މަސައްކަތުގައި ބަރަކާތް ލައްވަވައިދެއްވަވަތެވެ.
- އެންމެ ދެރަކްޢަތްކުރަންޖެހޭ ފަތިސްނަމާދުގެ އިހުސުންނަތުގެ 2 ރަކްޢަތް ލައްވަވާފައިވަނީ ދުނިޔެއާއި ދުނިޔޭގައިވާހައި އެއްޗަކަށްވުރެ އެކަލާނގެ ޙަޟްރަތުގައި މަތިވެރި 2 ރަކްޢަތް ކަމުގައެވެ.
- ފަރުޟް ނަމާދު ޖަމާޢަތުގައި ކޮށްލުމުން 27 ދަރަޖަ ދެއްވަވަތެވެ.
- ދުލުން އެންމެ ދެކަލިމަ ކިޔައިލުމުން ސުވަރުގޭގައި އެމީހަކަށްޓަކައި ރުކެއް އެބަ އިންދަވައި ދެއްވަވަތެވެ.
މިފަދަ އެތައް މިސާލުތަކެއް ދެއްކިދާނެއެވެ. ދެން މިބަލައިލަނީ އެމީހަކު ކުރަން ބޭނުންވާ ޙާޞިލުނުކުރެވޭ ކޮންމެކަމަކަށް އޮތް ތަޅުގަނޑިއެވެ. އެއީ ގިނަގިނައިން އަސްތަޣްފިރުﷲ ކިޔުމެވެ. މިއީ ކޮށްލަން ކިހައި ފަސޭހަކަމެއް ހެއްޔެވެ؟ ދުވާލަކު އެތައް ހާސްފަހަރަކުވެސް ކިޔައިލުމަކީ ނުހަނު ފަސޭހަކަމެކެވެ.
ދެނަ ބަލައިލަންވީ މިހައި ފަސޭހައިން ކަންކަން ޙާޞިލުކުރެވެން އޮންނައިރުވެސް ނުކުރެވޭ ސަބަބަށެވެ. އެސަބަބަކީ "ތިހައި ކުޑަކުޑަކަމަކުން ތިހައި ބޮޑުކަމެއް ޙާޞިލުނުކުރެވޭނެ" ކަމަށް އިބިލީސްދޭ ވަސްވާސްތަކެވެ. އިބިލީހުގެ ވަސްވާސް ޤަބޫލުނުކުރެވި އެކަންކަން ނުކުރެވެނީއެވެ.
މީސްތަކުންނޭވެ! އިބިލީހުގެ ވަސްވާސްތައް ޤަބޫލުނުކުރާށެވެ! ތިމާއަށް ބޮޑުވެއްޖެ ކޮންމެ ކަމެއް ޙާޞިލުކުރުމުގެ ތަޅުދަނޑިއަކީ ގިނަގިނައިން އަސްތަޣްފިރުﷲ ކިޔުމެވެ. އެއީ ހިތްދަތިކަންނަމަވެސް، ކަންބޮޑުވުން ނަމަވެސް މާލީ ދަތިކަމަކުން އަރައިގަތުން ނަމަވެސް، ބަލިމަޑުކަމަކުން އަރައިގަންނަން ނަމަވެސް އަސްތަޣްފިރުﷲ ކިޔުން ގިނަކުރާށެވެ! ކިޔުމުގައި ސާބިތުވެހުންނާށެވެ! އެކަމެއް ހިންމަވައި ދެއްވަވާނެތެވެ! އިން ޝާ ﷲ
ވީމާ އެކުވެރިއަކަށް ކަމެއް ޙާޞިލުނުކުރެވިގެން އުޅޭކަން އެނގުނު ނަމަވެސް އަވަހަށް މިތަޅުދަނޑިހަވާލުކުރާށެވެ! ކާމިޔާބީގެ ދޮރު ހުޅުވޭނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
