މިހާރަކަށް އައިސް ގޭގޭގެ ސިޓިންގ ރޫމްތަކަށް ވަދެވޭއިރު ގިނައިން ފެންނަނީ ގޭގެ އެންމެންއެކުގައި ތިބެގެން ސިޓިންގ ރޫމަށް ޝައިޠޯނުން ޖަމާވާނެ ކަންކަން ކުރަމުން ގެންދާތަނެވެ. ޝައިޠޯނުން ގެއާއި އޮޅުވާނެ މަންޒަރުތައް ޓީވީން ބަލަމުން ގެންދާތަނެވެ. އެއިގެ ބަދަލުގައި މަސައްކަތްކުރަންވީ ގެއަށް ވީހައި ގިނަ މަލާއިކަތުން ވެއްދޭތޯއެވެ!
އެކަމަސްޓަކައި ރާވައި ހިންގަންވީ ހެޔޮ އަމަލު ކުރުމުގެ ޕްރޮގްރާމްތަކެވެ. ހަމަ ގައިމުވެސް އެމީހަކަށް އެމީހެއްގެ ގޭގައި ޕްރޮގްރާމްތައް ރާވައި ހިންގޭނެއެވެ. ދީނީ ޢިލްމުވެރިންނަށް ދައުވަތުދީގެން ކަންކަން ނުކުރެވޭނެ ނަމަ ޢާއިލާ އެކުގައި ތިބެގެން ދީނީ ދަރުސްތައް އަޑުއެހޭނެއެވެ. ކީރިތި ޤުރްއާން އަޑުއެހޭނެއެވެ. މާނަ އުނގެނެވޭނެއެވެ. ތަޖުވީދުމަގުން ކިޔަވަން ދަސްކުރެވޭނެއެވެ.
މިފަދަ ކޮންމެ ކަމަކީ ﷲ ތަޢާލާ މަތިވެރިކުރަން ކުރެވޭ ކަންކަމެވެ. މިފަދަ ކޮންމެ ކަމެއް ކުރެވުނުކަމުގައިވީނަމަވެސް މަލާއިކަތުންގެ ފައުޖުތައް ގެއަށް ޒިޔާރަތްކުރައްވަވައި އެކަމުގައި ބައިވެރިވެވަޑައިގަންނަވާނެތެވެ.
ހަމަގައިމުވެސް ޢާއިލާ އެކުގައި ތިބެ ކިތަންމެ ގިނަ ފިލްމްތަކެއް ބެލި ނަމަވެސް ސަވާބެއް ނުލިބޭނެއެވެ. ނަމަވެސް ދަރުސް އަޑުއެހުން ފަދަ ކަންކަން ކުރުމުން ދީނީ ހޭލުންތެރިކަން އިތުރުވެ އަދި ސަވާބުވެސް ލިބޭނެއެވެ. އެކަމުގެ ފައިދާ މުޅި ޢާއިލާއަށް ކުރާނެއެވެ.
ފާފަ ކުރަން ހިތަށް އެރުވުމަކީ އިބިލީސް ކުރާ ކަމެކެވެ. މިޒަމާނުގެ ޓެކްނޮލޮޖީން ބަލާނަމަ އެއީ މީހުންގެ ޝައުޤުވެރިކަން ހޯދަން ކުރާ އިޝްތިހާރެކެވެ. ރަނގަޅު ފެންވަރުގެ އިޝްތިހާރު ގިނަގިނައިން ފެންނަން ފެށުމުން އެ އެއްޗެއް ގަންނަ ހިތް ޖެހޭ ފަދައިން ޝައިޠާނާގެ މިފަދަ ވަސްވާސްތަކުގެ ސަބަބުން ފާފަކުރުމަށް މީސްތަކުންގެ ޝައުޤުވެރިކަން އިތުރުވެ ފާފަކުރެވެއެވެ. ވީމާ މިއީ ވަރަށް ނުރައްކައުތެރި ކަމެކެވެ.
ފާފައެއް ކުރަން ހިތަށް އެރުމަކުން ޢަޛާބެއް ނުލިބޭނެއެވެ. ޢަޛާބް ލިބޭނީ ފާފަކުރުމުންނެވެ. ނަމަވެސް ފާފަކުރަން ގިނަގިނައިން ހިތަށް އަރާނަމަ އެއީ މައްސަލައެކެވެ. އެކަމަށް ﷲ ތައާލާގެ ޙަޟްރަތުގައި ޖަވާބުދާރީވާންވެސް ޖެހޭނެއެވެ. މިކަމުން އެނގެނީ ޝައިޠާނާގެ ވަސްވާސްތަކުން ސަލާމަތްކުރަން މަސައްކަތްކުރަން ޖެހޭ މިންވަރެވެ.
ހަމައެފަދައިން ފާފައެއް ކުރަން ރޭވުމަށްފަހު ﷲ ތަޢާލާއަށް ބިރުން އެފާފައެއް ނުކުރިނަމަ، އެކަން ތަންފީޒު ނުކުރިނަމަ އެކަމަށް ސަވާބުވެސް ލިބޭނެއެވެ. މީގެ މާނައަކީ ފާފަކުރަން ގިނަގިނައިން ރާވާފައި އެކަން ތަންފީޒު ނުކުރުމެއް ނޫނެވެ. އެއީ ސަވާބު ހޯދަން ކުރަން ޖެހޭ ކަމެއް ނޫނެވެ. ސަވާބު ހޯދަން ކުރަންވީ ކަމަކީ ހެޔޮ އަމަލުތައް ކުރަން ގިނަގިނައިން ރާވައި އެ އަމަލުތައް ކުރުމެވެ. ހެޔޮ އަމަލުތައް ކުރުން ވީހައި ގިނަކޮށް އެކަމުގެ މަތީގައި ދެމިތިބުމެވެ!
- އިސްލާމީ ތިލަފަތުގެ ދަރުސަކުން
