އުފާވެރިކަން ލިބޭފަދައިން ހިތްދަތިކަންވެސް ތަޙައްމަލްކުރަންޖެހޭނެއެވެ. އުފާވެރިކަމާއި ހިތްދަތިކަންވެސް މިންވަރުކުރައްވަވަނީ ހަމަ ﷲ ތަޢާލާއެވެ. އިމްތިޙާން ކުރެއްވެވުމަށްޓަކައެވެ. ވީމާ ހިތްދަތިކަން ލިބޭހިނދު އެއީ މާބޮޑުކަމެއް ކަމަށް ނުދެކޭށެވެ! ހިތްދަތި ޙާލަތަކީވެސް އަދި ކޮންމެ މުޞީބާތަކީވެސް ހަމަ ވަގުތީ ކަމެކެވެ. ދާއިމީކަމެއް ނޫނެވެ. ﷲ ތަޢާލާ ކަނޑައަޅުއްވަވާފައިވާ މުއްދަތު ހަމަވުމުން އެކަމަކުން ސަލާމަތްކުރައްވަވާނެތެވެ. އަދި ހިތްހަމަޖެހުމާއި އުފާވެރިކަންވެސް މިންވަރުކުރައްވަވާނެތެވެ.
ތަޤްވާވެރިވެ ތިމާއަށް ކިތަންމެ ބޮޑު ދަތިކަމެއް ކުރިމަތިވިނަމަވެސް ހިތާމަނުކުރަން ހިތުގައިލައިގެން ހުންނަ މީހާއަށްވެސް ކަންކަން ކުރިމަތިވުމުން ކަންބޮޑުވެވެއެވެ. ދެރަވެސްވެވެއެވެ. އެއީ ކޮންމެ މީހަކީވެސް އިންސާނަކުކަމުގައިވީތީއެވެ. ނަމަވެސް އެމީހަކީ ތަޤްވާވެރިއެއް ނަމަ ތިމާއަށް ދަތިކަން ކުރިމަތިވަނީ ﷲ ތައާލާ މިންވަރުކުރެއްވެވުމުން ކަމާއި އެއްވެސް ދަތިކަމަކީ ދާއިމަށް ތިމާއާއިއެކުވާނެ ކަމެއް ނޫންކަން ޤަބޫލުކުރެވުމުން އޭނާގެ ކަންބޮޑުވުންތަކާއި ހިތާމަތައް ފިލައިގެންދެއެވެ.
ފިކުރު ބޮޑުވާންޖެހޭ ނުވަތަ ހިތްދަތި ކޮންމެ ކަމަކާއި އަދި ކޮންމެ ޢަމަލަކަށްވެސް އަޖަލެއްވެއެވެ. އެއަޖަލު ޖެހުމުން އެކަމެއް ނިމޭނެއެވެ. ދާއިމަށް ދެމިއެއް ނުހުންނާނެއެވެ. ހަމައެއާއިއެކު ޔަޤީންކުރަންވީ އެއްވެސް އެހެން މީހަކަށް ތިމާއަށް އެއްވެސް ދެރައެއް ނުދެވޭނެކަމެވެ. ކޮންމެ ކަމެއްވެސް ތިމާއަށް ކުރިމަތިވާނީ ﷲ ތަޢާލާ އެކަމެއް މިންވަރުކުރެއްވެވުމުން ކަމެވެ. އެކަން ޤަބޫލުކުރާ މީހާއަށް ގޮތް ހުސްވެ މާޔޫސްވާކަށް ނުޖެހޭނެއެވެ.
މި 2 އާޔަތުން ހިތްވަރުލިބިގަންނާށެވެ!
﴿وَأَنَّ إِلَى رَبِّكَ الْمُنْتَهَى﴾ [النجم: 42]
މާނައީ: "އަދި (ހުރިހާކަމެއްގެ) ނިމުންވަނީ، ކަލޭގެފާނުގެ ވެރިރައްބުގެ ޙަޟްރަތަށެވެ."
ފަހެ، އަޅަމެންގެ ވެރިރައްބުގެ ހުސްޠާހިރުވަންތަކަމާއެވެ. އެއީ ކޮންމެ ހިތެއްގައިމެ މަޝްޣޫލުވާނެ ކަންތައްތަކަކާއި އެދުންތަކެއްލެއްވި އަދި ކޮންމެ މީހަކަށްމެ ޢަޒުމްތަކެއް ޚަލްޤުކުރެއްވި ފަރާތެވެ. އެއިލާހު އިރާދަކުރެއްކަމެއް ކުރައްވައެވެ. އަދި އިރާދަކުރެއްވިކަމެއް ދޫކޮށްލައްވައެވެ. ﷲ تبارك وتعالى ގެ އިރާދަފުޅާލައިގެން މެނުވީ އެއްވެސްކަމެއް ނުކުރެވެއެވެ.
﴿وَمَا تَشَاءُونَ إِلَّا أَنْ يَشَاءَ اللَّهُ رَبُّ الْعَالَمِينَ﴾ [التكوير: 29]
މާނައީ: ” ޢާލަމްތަކުގެ ވެރި ﷲ އިރާދަކުރެއްވުމުން މެނުވީ، ތިޔަބައިމީހުންނަކަށް (އެއްވެސް ކަމެއް) ނޭދެވޭނެތެވެ."
ﷲ ތަޢާލާ އިރާދަކުރެއްވެވިކަމެއް ވެއެވެ. އަދި އެއިލާހު އިރާދަނުކުރައްވާކަމެއް ނުވާނެއެވެ. ﷲ ތައާލާގެ އިރާދަފުޅާލައިގެން މެނުވީ އެއްވެސް މީހަކަށް އެއްވެސް ކަމެއް ނުކުރެވޭނެއެވެ. ވީމާ މީހަކު ކުރިކަމަކުން ނަމަވެސް ދެރައެއް، ހިތާމައެއް ލިބިއްޖެނަމަ އެމީހާގެ ރުހުން ހޯދަން އުޅުމުގެ ބަދަލުގައި ﷲ ތަޢާލާގެ ރުހިވޮޑިގަތުން ހޯދަން ގަދައަޅައި މަސައްކަތްކުރާށެވެ! އެމީހަކަށް ރަޙްމަތް ލައްވަވާނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
