ކޮންމެ މީހަކުވެސް މިޙަޔާތް ވޭތުކުރަންވާނީ އެމީހަކަށް ފައިދާހުރި ކަމެއްގައެވެ. އޭނާގެ ދިރިއުޅުމުގެ ކަންކަން އިޞްލާޙުކުރުމުގައެވެ. އާޚިރަތަށް ގެންދާނެ ޘަވާބު އެއްކޮށް ޖަމާކުރުމުގައެވެ.
މީސްތަކުންގެތެރޭގައި އޭނާގެ ދުނިޔަވީ ޙަޔާތާއެކު އޭނާގެ ދީން އިޞްލާޙުކުރާ މީހުން ވެއެވެ. އެއީ ﷲ ތަޢާލާ އެބައަކަށް ދުނިޔެއާއި އާޚިރަތުގެ ހެޔޮކަން މިންވަރުކުރައްވަވާ، އަދި ނަރަކައިން ދިންނަވާފައިވާ މީހުންނެވެ.
ދީން އިޞްލާޙްކުރުމަކީ ދީނުގައިވާ ކަންކަން އިޞްލާޙްކުރުމެއް ނޫނެވެ! ދީނުގައި ބަޔާންވެގެންވާ ހެޔޮ ޢަމަލުތައް ކުރުމުގައި ކުރިއަރައިދިއުމެވެ. ނަހީކުރައްވަވާފައިވާ އެންމެހައިކަންކަމުން ދުރުހެލިވެ ހުރުމެވެ.
މަސްޖިދުއްނަބަވީގެ އިމާމް الشيخ علي بن عبد الرحمن الحذيفي – حفظه الله ވިދާޅުވެފައިވާ ބަސްފުޅެއްގައިވެއެވެ.
"ދުނިޔެއާއިގެން ކުރިއަށް ގޮސް އާޚިރަތް ހަލާކުކުރި މީހުންވެސް އޭގެ ތެރެއިން ވެއެވެ. އެއީ އުފަލުގެ މަސްތުގައި، ނަޢަމްސޫފި ފަދައިން ކައިބޮއެ އުޅުނު މީހުންނެވެ. އަދި އެމީހުން ދާނޭ ތަނަކީ ނަރަކައެވެ."
ނަޢަންސޫފި ކައިބޮއިހަދާކަށް ވަކިއެއްޗެއްނެތެވެ. އަތުޖެހުނުހައި އެއްޗެއް ކައިބޮއިހަދައެވެ. މީސްތަކުންގެ ތެރޭގައިވެސް އެފަދަ މީހުން އެބަތިއްބެވެ. ޙަރާމް ޙަލާލެއް ނުބަލައި ކައިބޮއިހަދާ މީހުންނެވެ. ހޯދުނުގޮތަކަށް ހޯދައިގެން އަނބިދަރީންނަށް ކާންބޯންދޭ މީހުންނެވެ. ޝައިޚް ވިދާޅުވެފައި އެވަނީ އެފަދަ މީޙުން ދާނީ ނަރަކައަށް ކަމަށެވެ. ޤުރްއާނާ ޙަދީޘުން އެކަން އެނގެން އޮތުމުންނެވެ.
- އިސްލާމީ ތިލަފަތުގެ ދަރުސަކުން
