މިއަދު އެންމެ ގިނަބައަކު އެންމެ ބޮޑަށް ކަންބޮޑުވެގެން އުޅެނީ އެމީހުންނަށް ނުބައިބަސްތައް ބުނާތީއެވެ. އެމީހުންގެ އަބުރަށް އަރައިގަނެ ދޮގު ވާހަކަތައް ފަތުރާތީއެވެ. ނަމަވެސް މިއީ އެއްވެސް ޙާލެއްގައި ކަންބޮޑުވާންޖެހެންވީ ކަމެއް ނޫނެވެ. އުފާކުރަންޖެހޭ ކަމެކެވެ.
ދުނިޔެއަށް ﷲ ތަޢާލާ ފޮނުއްވެވި އަދި ފޮނުއްވަވާނެ މީހުންގެ ތެރެއިން ވެސް އެންމެ މާތް، އެންމެ މަތިވެރިކުރައްވަވާފައިވަނީ އަހަރެމެންގެ ލޮބުވެތި ނަބިއްޔާ މުޙައްމަދު ﷺ އެވެ. އެމަތިވެރި ޞާޙިބާ އާއިމެދުގައިވެސް މީސްތަކުން އެގޮތަށް ކަންތައް ކުރިއެވެ. ނުބައިބަސްތައް ބުނެ ދޮގުވާހަކަތައް ފެތުރިއެވެ.
ރަސޫލް ﷺ ގެ ސުންނަތަށް ފުރިހަމައަށް ތަބަޢަވެވިއްޖެ މީހަކު ވާނީ ސުވަރުގޭގައި ރަސޫލް ﷺ ގެ އެންމެ އަރިއަހުގައެވެ. ވީމާ މިކަމުގައިވެސް ބަލައިލަންޖެހޭނީ ރަސޫލް ﷺ ޢަމަލުފުޅު ކުރެއްވެވި ގޮތަށެވެ. ވީމާ ފުރިހަމަ ގޮތުގައި ސުންނަތަށް ތަބަޢަވުމަށްޓަކައި الحمد لله ކިޔައި ﷲ ތައާލާއަށް ޝުކުރުއަދާކުރާށެވެ! ޝުކުރު އަދާކުރަންވީ އެފަދަކަމަކަށް ކެތްތެރިވެ الحمد لله ކިޔުމުގެ ފުރުޞަތު ދެއްވެވިކަމަށްޓަކައެވެ.
އަހަރެމެންނަށް ގިނައިން ކަންތައް ކުރެވޭ ގޮތަކީ މީހަކު ތިބާއަކީ މޮޔައެއް ކަމަށްބުނެފިނަމަ "އޭނާ އާ އޭނާގެ އަނބިދަރިންނާ މުޅި ޢާއިލާޢަކީވެސް މޮޔައިން" ކަމަށް ބުނުމެވެ. މިއަދުން ފެށިގެން އެގޮތަށް ކަންތައް ނުކުރާށެވެ! ސުންނަތުގައިވާފަދައިން الحمد لله ކިޔައި އޭނާއަށްޓަކައި ހެޔޮދުޢާކުރާށެވެ!
އެއިރުން ޤިޔާމަތް ދުވަހު އޭނާގެ ކިބައިން ބަދަލިބޭނެތެވެ. އެއިގެ އިތުރުން އެފަދަ ވަގުތެއްގައިވެސް ސުންނަތަށް ޢަމަލުކުރިކަމުގެ މަތިވެރި ޘަވާބު ދެއްވަވާނެތެވެ! އިން ޝާ ﷲ
- މުފްތީ މެންކުގެ ދަރުސަކުން
