އެންމެ ކާމިޔާބު މީހަކީ ކޮބާ؟ އެންމެ ކާމިޔާބު މީހަކަށް ވެވޭނީ ކިހިނެއް؟ ކަމާއިމެދު ގިނަބައަކު ސުވާލުކުރެއެވެ!
ކާމިޔާބު މީހަކަށްވެވޭނީ ކޮންމެ ދުވަހަކީވެސް ކުރީ ދުވަހަށްވުރެ ގިނައިން ހެޔޮ ޢަމަލުކުރާ ދުވަހަކަށް ހަދައިގެންނެވެ. އެންމެ ކާމިޔާބު މީހުންނަކީ އެގޮތަށް ކޮންމެ ދުވަހަކީވެސް ރަނގަޅުކަންކަން ކުރުން ގިނަކުރާ ދުވަހަކަށް ހެދޭ މީހުންނެވެ. އެކައުންޓަށް އެންމެ ގިނައިން ފައިސާޖަމާކުރެވޭ މީހެއް ނޫނެވެ. ވީމާ ފައިސާ ހޯދަން މަސައްކަތްކުރަންވާނީވެސް ކުރަންޖެހޭ އަޅުކަންކުރަމުންނެވެ. އެހެނީ ތަޢާލާގެ ޙަޟްރަތުގައި ހުއްޓިތިބެންޖެހޭ ދުވަހު އެންމެ ބޮޑު މުއްސަންޖަކަށްވާނީ ބޭންކަސް ވީހައި ގިނަ ފައިސާ ޖަމާކުރެވުނު މީހެއް ނޫނެވެ! ހުއްޓިހުންނަޖެހޭނެ އެދުވަހަށް ވީހައި ގިނަ ހެޔޮ ޢަމަލުތައް ކުރެވުނު މީހެކެވެ!
އެއްވެސް މީހަކީ އެންމެ ފުރިހަމަ އިންސާނެއް ނޫނެވެ. އުނިކަންތައްތަ ހުންނާނެއެވެ. އެއީ އިންސާނުންކަމުގައިވީތީއެވެ. އަަހަރެމެންނަށް އޮތީ އެކަން ޤަބޫލުކޮށް ކޮންމެ ދުވަހަކުވެސް 1،2 ކަންތައް އިޞްލާޙްކުރަން މަސައްކަތްކުރުމެވެ. ހެޔޮ ޢަމަލުކުރުން ކޮންމެވެސް މިންވަރަކަށް ކޮންމެ ދުވަހަކުވެސް މަސައްކަތްކުރުމެވެ!
މީސްތަކުންނޭވެ! ހަމައެކަނި ހުކުރުނަމާދަށްދާ މީހަކަށްނުވާށެވެ! ހުރިހާ ނަމާދަކަށްދާށެވެ! ހުރިހާ ނަމާދެއް ޖަމާޢަތުގައި ކުރާށެވެ! އެއިގެ އިތުރުންވެސް ވީހައި ގިނައިން މިސްކިތަށްދާށެވެ! މިސްކިތަށް ގިނައިން ދިއުމަކީވެސް އެމީހަކު ދެކެ ﷲ ތަޢާލާ ލޯބިވެވޮޑިގަތުން އިތުރުވާކަމެކެވެ.
މިސްކިތުގައި އިތުރު ބައަކު ނެތުމުން ކަންބޮޑުނުވާށެވެ! އެކަނި ނަމަވެސް މިސްކިތުގައި މަޑުކޮށްލައި މަސްޖިދު ސުންނަތްކޮށް ޤުްރްއާން ކިޔަވައިލާށެވެ! ކޮންމެވެސް ފޮތެއް ނަގައިގެން ކިޔައިލާށެވެ! މިހިރީ ހައްތާވެސް ﷲ ތަޢާލާގެ ރުހިވޮޑިގަތުން އިތުރުވެގެންދާނެ ޢަމަލުތަކެވެ!
- މުފްތީ މެންކުގެ ދަރުސަކުން
