"ގިނައިން ދެކެވިފައި ހުންނަނީ ފިރިން ކުރާ ގޯސްކަންކަމުގެ ވާހަކައެވެ. އަނބިންކުރާ ކަންކަމުގެ ވާހަކަ ދެކެވޭއަޑު ވަރަށް ނުއިވެއެވެ. އެފަދަ ލިޔުންވެސް ފެންނަނީ ވަރަށް ވަދުންނެވެ.
އަޅުގަނޑަށް ކައިވެނިކުރެވިފައި މިވަނީ ވަރަށް އާދައާ ޚިލާފް އަންހެނަކާއެވެ! ކިރިޔާ ކަމެއްވާއިރަށް އަނބިމީހާ އަޅުގަނޑުގެ މޫނަށް ކުޅުވެސް އެބަޖަހައެވެ! އަތުންނާ ކޮޅުފައިންވެސް ތަޅައެވެ! ނަޞޭޙަތްދޭވަރަކަށް ވަނީ ނުބައެވެ!
ނަޞޭޙަތްދޭން ދީނީ ޢިލްމްވެރިއަކު ގެއަށް ގެނެސްފިނަމަ އެވަގު ކިޔަމަންތެރިކަން ބޮޑުކަމުންނާއި ދައްކާ ވާހަކަތައް ރީތިކަމުން އެއީ ހަމަ އެއަނބިމީހާކަން ޤަބޫލުކުރަންވެސް އުނދަގޫވާނެއެވެ. 2 ދަރިން އެބަ ތިއްބެވެ. ވަކިވެވޭކަށްވެސް ނެތެވެ. އެކުގައި ދިރިއުޅެވޭކަށްވެސް ނެތެވެ.
މިކަންކަމަށް ޙައްލެއް ލިބޭނެ އެއްވެސް ގޮތެއް އެނގިލައްވާނަމަ އަނަގަވާށލަދެއްވުން އެދެމެވެ.
މިފަދަ ޙާލަތެއްގައި ޢަމަލުކުރަންވީ ގޮތް-
"ރުޅިއައި ނަމަވެސް އަނިޔާކުރުމަކީ އޮންނަ ގޮތެއް ނޫނެވެ. އަނިޔާ ކޮށްގެން ނުވާނެއެވެ. އިޞްލާޙްވޭތޯ ނަޞޭޙަތްދީ ކުރެވެންހުރި ކަންކަން ކުރާށެވެ! އެވަރުންވެސް ރަނގަޅު ނުވެއްޖެ ނަމަ ތަންމަތި ވަކިކުރާށެވެ! އެވަރުންވެސް އިޞްލާޙް ނުވެއްޖެ ނަމަ އަނިޔާ ނުވާނެ ގޮތަށް ޖަހާށެވެ!
އެވަރުންވެސް އިޞްލާޙް ނުވެއްޖެ ނަމަ ދެފަރާތުގެ ޢާއިލާ މީހުން ގެނެސް ވާހަކަ ދައްކައި އިޞްލާޙްކުރެވޭތޯ ބަލާށެވެ! އެވަރުންވެސް އިޞްލާޙް ނުވެއްޖެނަމަ ވަރިކުރުން ނޫން ގޮތެއް ނެތެވެ."
މިއީ މިފަދަ ޙާލަތާއި ގުޅީގެން ޢަމަލުކުރަން ޑރ. މުޙައްމަދު އިޔާޟް ޢަބްދުއްލަޠީފް ދެއްވާފައިވާ އިރުޝާދެވެ!
