ﷲ ތައާލާ ފުއްސަވައިދެއްވަވަނީ އެމީހަކާއި އެކަލާނގެއާއި ދެމެދުގައި ހުރި މައްސަލަތަކެވެ. 3 ވަނަ ފަރާތަކާއި ގުޅުން ނެތް ފާފަތެކެވެ. މީހާއަށް ކުރެވޭ ފާފަތަކުގެ ތެރެއިން 3 ވަނަ ފަރާތަކާއި ގުޅުންހުރި ފާފައެއް ނަމަ (އެކަމުގައި މީހަކަށް އަދާކުރަންޖެހޭ ޙައްޤެއްވާނަމަ) އެމީހާ އެކަމަށް މާފުކުރުމުން މެނވީ އެމީހަކަށް ﷲ ތަޢާލާ ފާފަފުއްސަވައި ނުދެއްވަވާނެތެވެ!
މީހަކާއިމެދު ކުށެއް ކުރެވިފައިވާނަމަ، އަދި އެންމެ ކުޑަމިނުން ނުބައި ބަހެއް ބުނެވިފައިވީނަމަވެސް އެމީހެއްގެ ކިބައިން މަޢާފަށް އެދެން ޖެހޭކަން އެއީ ޔަޤީންކަމެކެވެ. ނޫން ނަމަ އެމީހަކު ޤިޔާމަތް ދުވަހު އެމީހާގެ ޙައްޤު ހޯދަން ތިބާ އާއި ކުރިމަތިލާނެއެވެ. އަދި ޖެހޭނީވެސް ބަދަލު ދޭށެވެ. މިއީ އަބަދުހެން ކިޔައިދެވޭ ދިގު ޙަދީޘަކަށްވުމުން މިފަހަރު މިވަރަށް ކުރުކޮށްލާނަމެވެ!
މިކަން ހުރިހާ މުސްލިމުންވެސް ޤަބޫލުކުރެއެވެ. އަދި އެފަދަ ކަމެއް ކުރެވިފައިވާނަމަ މާފަށް އެދެން ބޭނުންވެސް ވެއެވެ. ނަމަވެސް ހިތާމައަކީ މާފަށް އެދުމުގެ ފުރުޞަތު ބައެއް މީހުންނަށް ނުލިބޭ ކަމެކެވެ. އެހެން އެކަން މެދުވެރި އެވަނީ އެދެމެދަށް ޝައިޠާނާ ވަދެގަންނާތީއެވެ. ތިއަކަން ކުރުމުން ތިމާގެ އަގު ވެއްޓޭނެ ކަމަށް ބުނެ ބިރު ދައްކާތީއެވެ. ޝައިޠާނާގެ ބޭނުމަކީ އެ މައްސަލަ ދުނިޔޭގައި ހައްލުކުރިއަ ނުދިނުމެވެ. ދެމީހުންގެ މައްސަލަ ޤިޔާމަތް ދުވަހަށް ބޭއްވުމެވެ.
އެގޮތަށް ބޭނުންވަނީ ކީއްވެގެންކަން އެނގޭ ހެއްޔެވެ؟ އެއީ އެމީހާއަށް ބަދަލުދޭން ޖެހުމުން ތިބާގެ ހެޔޮ އަމަލުތައް މަދުވެ ތިބާއަކީވެސް ނަރަކައަށް ދާން ޖެހިދާނެ މީހެއް ކަމުގައި ހެދޭތޯ ބެލުމެވެ. އިބިލީހާއި އެކު ނަރަކައަށް ވެއްދޭނެ މީހުންގެ އަދަދު ވީހައި ގިނަ ކުރުމެވެ. އެއިގެ ތެރޭގައި ތިބާވެސް ހިމެނުމެވެ.
ވީމާ މިއީ ކޮންމެ މުސްލިމަކުވެސް ވަރަށް ބޮޑަށް ސަމާލުކަން ދޭންޖެހޭނެ ކަމެކެވެ. ބިރުވެތިވާން ޖެހޭނެ ކަމެކެވެ. އިބިލީހުގެ ބަހަށް ނުހެއްލޭށެވެ. މާފަށް އެދެންޖެހޭ އެންމެންގެ ކިބައިން އަވަހަށް މާފަށް އެދޭށެވެ! މާފަށް އެދުމުން މާފު ނުކުރުމަކީ ތިބާގެ މައްސަލައެއް ނޫނެވެ. އެއީ އެމީހާގެ މައްސަލައެކެވެ. މާފަށް އެދުމުން ތިބާގެ ވާޖިބު އަދާކުރެވުނީއެވެ. ވީމާ މާފު ނުކޮށްފާނެ ކަމަށް ބަލައި މާފަށް ނުއެދު ހުރުމެއް ނެތެވެ!
ކުށެއް ކުރެވިފައިވާނަމަ އަވަސްވެގަންނަންވީ މާފަށް އެދުމަށެވެ. ކުށަށް މާފަށް އެދެން ކުޑަކަކޫ ޖަހަން ޖެހުނުނަމަވެސް އަވަހަށް ޖަހާށެވެ! ނުހަނު ފަސޭޙައިން ތެދުވެވޭނެއެވެ! އެކަން ނުކުރުމުން ބަދަލުދޭންޖެހި ނަރަކައަށް ވަންނަން ޖެހިއްޖެ ނަމަ ނަރަކައިގަ ޖަހާ ޗޭނަކުން ސަލާމަތެއް ނުވެވޭނެއެވެ! ވީމާ ނަރަކައިގެ އަލިފާނުން ސަލާމަތްވުމަށްޓަކައި އަޅުކަންކުރަމުން ގެންދާ ފަދައިން މީސްތަކުންގެ ކިބައިން މާފުހޯދަން މަސައްކަތްކުރަމުން ވެސް ގެންދަންވާނެއެވެ.
- އިސްލާމީ ތިލަފަތުގެ ދަރުސަކުން
--އިސްލާމީ ތިލަފަތުގެ ދަރުސަކުން
