މިހާރަކަށް އައިސް ފަތިހު ހޭލުމާއި ފަތިސް ނަމާދުކުރުން މިވަނީ ޢާއިލާގައި ހުންނަ އުމުރުން އެންމެ ދުވަސްމީހާ އަށް އެކަނި ކުރަންޖެހޭ ކަމަކަށް ހަދައިފައެވެ. އެއީވެސް ވަރަށް މަދު ގެއެއްގައެވެ. ގިނަ ގޭގޭގައި ފަތިހު އެއްވެސް މީހަކު ހޭލުމަކީ ކުރަންޖެހޭ ކަމެއް ކަމެއް ނޫންކަމަށްވެސް ވަނީ ހަދައިފައެވެ.
މިނުބައި އާދައާއިއެކުވެސް ކޮންމެ މީހަކުވެސް ބޭނުންވަނީ އެމީހާއަށް އެންމެ ގިނަ ރިޒުޤް ލިބުމަށެވެ. އެމީހާގެ ގެއަކީ އެންމެ ރީތި އެންމެ ތަނަވަސްގެ ކަމުގައި ހެދުމަށެވެ.
ޢަޞްރު ނަމާދާއި ފަތިސް ނަމާދު ޖަމާޢަތުގައި ކުރަން ޚާއްޞަ ސަމާލުކަމެވެ. އެއީ އެދެވަގުތަކީ ކޮންމެ މީހަކު ބެލެހެއްޓުމުގައި ވެސް ތިއްބަވާ މަލާއިކަތުން ޑިޔުޓީ ބަދަލުކުރައްވަވައި ﷲ ތަޢާލާގެ ޙަޟްރަތަށް ވަޑައިގެން އެމަލާއިކަތަކު ބެލެހެއްޓެވި މީހަކާއިބެހޭ ގޮތުން ﷲ ތަޢާލާއަށް މައުލޫމާތު އަރުވާ ވަގުތެވެ.
ތިބާ އޮތީ ﷲ ތަޢާލާގެ އަމުރުފުޅަށް ނުކިޔަމަންތެރިވެ ކަންނެތްވެ ނިދަންކަން ﷲ ތަޢާލާ ދެނެވޮޑިގެންވާއިރުވެސް މަލާއިކަތުން ﷲ ތަޢާލާގެ ޙަޟްރަތުގައި އެދަންނަވަނީ ހަމަ ތިބާ އޮތީ ނުކިޔަމަންތެރިވެ ނިދަންކަމަށެވެ.
ވީމާ ވިސްނައިލާށެވެ! ﷲ ތަޢާލާ އަންގަވާފައިވަނީ ފަތިހު ތެދުވެ ފަތިސްނަމާދުކޮށް ރިޒްޤް ހޯދަން މަސައްކަތްފެށުމަށެވެ. ތިބާއޮތީ އެ އަމުރުފުޅަށް ކިޔަމަންތެނުވެ ކަންނެތްކަންމަތީގައި ނިދާށެވެ! އެހެންނަމަވެސް ތިބާ ބޭނުންވަނީ ތިބާ އެދޭ ހުރިހާ ކަންކަން ފުރިހަމަވުމަށެވެ. މިއީ ކިހިނަކުން އެދެވޭނެ ކަމެއް ހެއްޔެވެ؟
މިކަންކަމަށް ވިސްނުމަށްފަހު ނިކަން ބުނެބަލާށެވެ! ތިބާ ފަތިސް ނަމާދުނުކޮށް ނިދަން އޮތްނަމަ ތިބާއަށް ރިޒްޤް ޙައްޤުވާނެ ހެއްޔެވެ؟
މީސްތަކުންނޭވެ! ދޫނިތައްވެސް ފަތިސްވުމުން ނިދާކަށް ނުތިބެއެވެ. އަވަހަށް ހޭލައި ރިޒުޤް ހޯދަން މަސައްކަތްފަށައެވެ. އެމަންޒަރު ކޮންމެ ދުވަހަކު އަހަރެމެންގެ ލޯތަކަށް އެބަ ދައްކަވަތެވެ! އެއީ އަހަރެމެން އެކަންކަމަށް ވިސްނައި ފިކުރުކުރުމަށެވެ. ވީމާ ކޮންމެ ދުވަހަކު ދައްކަވާ މިފަދަ ކަންކަމަށް ވިސްނައި ފިކުރު ނުކުރެވޭނަމަ އަހަރެމެންނަށް ދެއްވެވި ސިކުނޑީގެ ބޭނުމަކީ ކޮބައިހެއްޔެވެ؟
ވީމާ ފަތިސްވުމުން ނިދީންހޭލައި ނަމާދުކުރުމަކީ ގޭގައި ހުރި އެންމެ މުސްކުޅި މީހާ ކުރަންޖެހޭ ކަމަކަށް ނުހަދާށެވެ! ރިޒްޤް ތަނަވަސްވުމަށް އެދޭނަމަ އެންމެން ހޭލާށެވެ! ކުރިން ހޭލެވުނު މީހަކު ދެންތިބި އެންމެން ހޭލައްވާށެވެ! އެންމެންވެސް ފަތިސްނަމާދުކޮށް ޛިކުރުތައް ކިޔަވާށެވެ! ރިޒުޤަށް އެދި ދުޢާކުރާށެވެ! ﷲ ތަޢާލާގެ ރުހިވޮޑިގަތުން ލިބި ރިޒްޤް ތަނަވަސްކުރައްވަވައި ދެއްވަވާނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
