ސުންނަތް ރޯދަ ހިފުމަކީ އެކަންކުރަން ފަށައިގަންނައިރު ކުރަން ބުރަކަމަކަށްވެދާނެއެވެ. ނަމަވެސް ލިބެން އޮތް މަތިވެރި ނިޢްމަތް ހިތަށް ގެނައުމުން އެއީ އެއްވެސް ބުރަކަމަކަށްނުވާނެއެވެ. ސުންނަތް ރޮދަ ހިފަންފެށުމަކީ އެކަމަށް ދެވިހިފާކަމެކެވެ. ސަބަބެއް މެދުވެރިވެގެން ނުހިފުނުނަމަ އުނދަގޫވެސްވާ ކަމެކެވެ!
ހަނދާނަށް ގެންނަންވީ ސުވަރުގޭގައި ރޯދަވެރިންނަށް ޚާއްޞަ ދޮރުކޮޅެއްވާކަމެވެ. "އައްރައްޔާން" އެވެ ކިޔުނު ދޮރުކޮޅެވެ. އެ ދޮރުކޮޅުން ވަނުމަށް އެދޭ މީހާ، ރަމަޟާން މަހުގެ ރޯދަ ހިފުމުގެ އިތުރުން ސުންނަތް ރޯދަހިފުން ވެސް ގިނަކުރާށެވެ! ވީހާ ގިނަ ރޯދަހިފަން މަސައްކަތްކުރާށެވެ!
ދެން ވިސްނައިލަންވީ އެކަމަކަށް މުސްލިމުން އެންމެ ބޮޑަށް ބިރުގަންނަންޖެހޭ ކަންތަކަށެވެ. ނަރައިން ސަލާމަތްވުމަށެވެ. ޙަދީޘްފުޅުން އެނގެން އޮތީ ހިފާ ކޮންމެ ރޯދައެއް އެމީހަކާއި ނަރަކައަިގެ އަލިފާނާއި 70 އަހަރުގެ ރާސްތާއަށް ދުރުކޮށްދޭނެ ކަމެވެ. ވީމާ ނަރަކައިން ސަލާމަތްވުމަށްވެސް ވީހައި ގިނައިން ރޯދަހިފަން އެބަޖެހެއެވެ.
އެއްވެސް މީހަކަށް ﷲ ތަޢާލާ ދެއްވަވާނެ ނިޢްމަތްތަކާއިމެދު ބަހެއް ބުނުމަކީ އެއްވެސް މީހަކަށް ކުރެވޭނެ ކަމެއް ނޫނެވެ. ނަމަވެސް ފެންނަންހުރި ހަމަތަކުން ނިކަން ވިސްނައިލަބަލާށެވެ!
ސުންނަތް ރޮދަ ހިފާމީހަކުވެސް މިހާރަކަށް އައިސް މިހިފަނީ ޢުމުރުން ދުވަސްވެ މުސްކުޅިވުމުންނެވެ. އެދުވަސް އަންނަންދެން މަޑުކޮށްގެން ތިބެނީއެވެ. ނިކަން ބުނެބަލާށެވެ! އެންމެ ސުންނަތް ރޯދައެއް ނުހިފާ ދުނިޔޭގައި އުޅެނިކޮށް ދުނިޔެދޫކޮށް ދާންޖެހެނީ ކިތައް ޒުވާނުންނަށް ހެއްޔެވެ؟ އަދި ކިތައް މުސްކުޅިންނަށް ކަމާއިމެދުވެސް މިހާރު މިވަނީ ސުވާލުކުރަންޖެހިފައެވެ.
ރަސޫލް (ﷺ) ވިދިވިދިގެން 4 ، 5 ދުވަހު ސުންނަތް ރޯދަ ހިއްޕެވިއެވެ. ފަރިއްކުޅުއްވާނެ އެއްވެސް އެއްޗެއް އަތްޕުޅުގައި ނެތް ޙާލުކޮޅުގައިވެސްމެއެވެ. ރޭގަނޑުން 6، 7 ގަޑިއިރު ދަމު ނަމާދު ކުރެއްވެވިއެވެ. އެއަށްފަހު ހެނދުނު ﷲ ތަޢާލާގެ މަގުގައި ހަނގުރާމައަށް ނުކުމެވަޑައިގެން ޖިހާދު ކުރެއްވެވިއެވެ.
ރަސޫލް (ﷺ) މިކަންކަން މިފަދައިން ކުރައްވަމުން ގެންދެވީ ކޮންފަދަ ހާލުކޮޅެއްގައި ހުންނަވައިގެންކަން އެނގޭއިރު އަހަރެމެންނަށް މިހައި ގިނަ ގުނަ ނިޢްމަތްތައް ދެއްވެވުމުން މިކުރެވެނީ ކޮން ކަމެއް ހެއްޔެވެ؟ ސުންނަތް ރޯދައެއް ހިފޭހެއްޔެވެ؟ އެންމެ ކުޑަމިނުން ދަމުނަމާދެއް ކޮށްލެވޭ ހެއްޔެވެ؟ މުސްލިމުންގެ ތެރެއިން ފޯރުންތެރިކަން ލިބި އުފަލުގައި އުޅޭ މީހުންގެ ތެރެއިން މަދު މީހަކަށް ނޫނީ ސުންނަތް ރޯދައެއް އޮތްކަން ވެސް އެނގޭބާވައެވެ!
ސުންނަތް ރޯދަ ޤަވާއިދުން ހިފާ މީހަކަށް މަހަކު 11 ރޯދަވެސް ހިފަން ޖެހިދާނެއެވެ. އެއީ 4 ހޯމަ އާއި 4 ބުރާސްފަތި 8 ދުވަހުގެ އިތުރުން މަހުގެ 13، 14، 15 ތިން ދުވަހު ރޯދަ ހިފައިފިނަމައެވެ. މަހުގެ 13،14، 15 ތިން ދުވަހުން ކުރެ ދުވަހެއް ހޯމަ، ނުވަތަ ބުރާސްފަތި ދުވަހަކާއި ފައްތަރުވެއްޖެނަމަ ހިފަން ޖެހޭ ރޯދަ މަދުވެދާނެއެވެ.
- އިސްލާމީ ތިލަފަތުގެ ދަރުސަކުން
