ކަންނެތްވެ ރޭގަނޑު ނިދަން އޮންނަ މީހާއާއި ހޭލައި ވަގުތު ބޭކާރުކުރާ މީހުން އެނަގާލަނީ އެމީހުންނަށް ޙާޞިލުކުރެވެން އެންމެ އަގުހުރި ފުރުޞަތެވެ! އެއީ އެމީހުންނަށް ސުވަރުގޭގެ މަތީ މަޤާމުތައް ލިބުމުގެ ފުރުޞަތެވެ! އަދި ދުނިޔެއިްނވެސް އެމީހާ ބޭނުންވާ ކަންކަން ޙާޞިލުކުރުމުގެ ފުރުޞަތެވެ! އެހެނީ ސުވަރުގޭގެ މަތީ މަޤާމުތަކަށް ދިއުމުގެ ތަޅުދަނޑިއަކީ ސުންނަތްކަން ގަދަވެގެންވާ ދަމުނަމާދު ނުވަތަ ތަހައްޖުދު ނަމާދުކަމަށް ޢިލްމުވެރިން ބަޔާންކުރައްވަވައެވެ!
އެއީ ދަމުނަމާދުކުރާ މީހާގެ ފާފަތައް ފުއްސަވައިދެއްވެވުމުގެ ފުރުޞަތު އެތައްގުނައަކަށް އިތުރުވެގެންދާތީއެވެ. ހަމައެއާއިއެކު އެމީހަކަށް ﷲ ތައާލާ އާއި އެންމެ ފަސޭހައިން ކުއްތަންވެވި ގުޅުންތައް ބަދަހިކުރެވިގެންދާނެތީއެވެ! އެކަމުގެ ސަބަބުން ދުނިޔެއިންވެސް އެމީހަކު އެދޭ ކަންކަން ޙާޞިލުކުރެވިގެންދާތީއެވެ!
ދަމުނަމާދު ކުރެވޭނީ ހީވާގި މުރާލި މީހުންނަށެވެ! ތަޤްވާވެރިކަން ލިބިގެން ހުރި މީހަކަށެވެ. ވީމާ ސުވަރުގެއިން މަތިވެރި މަޤާމު ލިބުމަށް އެދޭނަމަ ދަމުނަމާދުކުރަން އާދަކުރާށެވެ! ދަމު ނަމާދުކުރަން އާދަކޮށްފި މީހަކަށް ފަތިސް ނަމާދުވެސް ދާނީ ކުރެވެމުންނެވެ. އެމިހެއްގެ މުޅި ހަޔާތް ދާނީ އެކަމުގެ ސަބަބުން އަލިވެ އުޖާލާވަމުންނެވެ.
ހަމަޔަޤީނުންވެސް އެނގޭ ކަމަކީ ސުވަރުގޭގައި ރަސޫލް (ﷺ) ވާނީ އެންމެ މަތީދަރަޖައިގައެވެ. ޤިޔާމަތް ދުވަހު ނުވަތަ ސުވަރުގޭގައި އިތުރު ރަސޫލް (ﷺ) ގެ އެންމެއަރިއަހުގައި ވުމަށް އެދޭ މީހާ ވީހައި ގިނައިން ސުންނަތް ނަމާދުކުރަން ޙަދީޘްފުޅު ކުރައްވަވާފައި އޮތުން އެކަމުގެ ދަލީލަކަށް ފުދެއެވެ.
"އަދި (ފަރުޟް ފަސްނަމާދުގެ އިތުރަށް) ކަލޭގެފާނަށް ޚާއްޞަ ނަމާދެއްގެ ގޮތުގައި، ރޭގަނޑުގެ ބައެއްގައި އެ ޤްރްއާން ކިޔަވައިވިދާޅުވެ، ތަހައްޖުދުނަމާދު ކުރައްވާށެވެ! އެކަމުން، ކަލޭގެފާނުގެ ވެރިރަސްކަލާނގެ، ޙަމްދުލިބިގެންވާ މަޤާމަކަށް ކަލޭގެފާނު ފޮނުއްވައިފާހުށްޓެވެ!" (އިސްރާ: 79)
ތަހައްޖުދު ނަމާދަކީ އަހަރެމެންގެ މައްޗަށް ފަރުޟެއް ނޫނެވެ. ގަދަވެގެންވާ ސުންނަތެކެވެ. އެ ސުންނަތް އަދާކުރުމުން ސުވަރުގޭގައި އަހަރެމެންގެ ދަރަޖަ އުފުލިގެންދާނެއެވެ. އެއީ އެއްވެސް ޝައްކެއް އޮތް ކަމެއް ނޫނެވެ. މިއާޔަތުން އަނަގައިދެނީ އެކަމެވެ. ކުރިން ބަޔާންކުރި ރަސޫލް (ﷺ)ގެ ޙަދީޘްފުޅުން އެނގިގެންދަނީވެސް ހަމަ އެކަމެވެ!
- އިސްލާމީ ތިލަފަތުގެ ދަރުސަކުން
