"ﷲ ތަޢާލާ ދެކެ ލޯބިވާން ކިތަންމެ ވަރަކަށްވެސް ބޭނުންވެއެވެ. އެކަން ކުރަން މަސައްކަތްވެސް ކުރަމެވެ. ﷲ ތަޢާލާ ދެކެ ލޯބިވެވުމުން އެކަން އެކަން އެނގޭނީ ކިހިނަކުން ހެއްޔެވެ؟
މިފަދަ ސުވާލުތައް ހިތަށް އަރާނަމަ ފުރތަމަ ވިސްނައިލަންވީ މީހަކު ދެކެ ލޯބިވެވުމުން ކަންކަން ކުރެވޭ ގޮތާއިމެދުގައެވެ. ގިނަގިނައިން އެމީހާ އާއި ބައްދަލުކުރަން ބޭނުންވާނެއެވެ! އެމީހާ އާއިއެކު ވީހައިގިނަ ވަގުތު ހޭދަކުރަން ބޭނުންވާނެއެވެ. އެމީހާ ރުޅިއަތުވެދާނެ އެއްވެސް ކަމެއް ނުކުރާށެއެވެ. އަސދި ކުރާނީވެސް އެމީހާ ރުހޭހައި ކަންތައްތަކެވެ. އަދި އެމީހާ ތިމާދެކެ ރުޅި އައިސް ތިމާ ދޫކޮށްލައިފާނެކަމަށް އަބަދުވެސް ހުންނާނީ ބިރުންނެވެ.
ﷲ ތައާލާ ދެކެ ލޯބިވެވުން ވެސް އޮތީ ހަމަމިފަދައިންނެވެ. ޢަމަލުކުރެވޭނީ އެއްގޮތަކަށެވެ. ފުރަތަމަ ކަމެއްގެ ގޮތުން ނަމާދުކުރާހިތްވާނެއެވެ. ނަމާދު ދިގުވާން ބޭނުންވާނެއެވެ. ސަބަބަކީ އެއީ ﷲ ތަޢާލާގެ ޙަޟްރަތުގައި ހުއްޓިހުރެވޭ ހުރެވުމަކަށްވާތީއެވެ. ނަމާދާއި ވަކިވާން ބޭނުމެއް ނުވާނެއެވެ!
ހަމައެއާއިއެކު ﷲ ތައާލާ ރުހިވޮޑިނުގަންނަވާނެ ކަންކަމެއް ނުކުރާނެއެވެ. ކުރާނީ ﷲ ތަޢާލާގެ ރުހިވޮޑިގަތުން އިތުރަށް ލިބޭނެ ކަންކަމެވެެ. އަދި ކުރެވޭ ފާފައަކާއި ގުޅިގެން ﷲ ތަޢާލާ ތިބާ ދޫކޮށްލައްވަވައިފާނެކަމަށް އަބަދުވެސް ހުންނާނީ ބިރުންނެވެ.
ހަމައެއާއިއެކު ކީރިތި ޤުރްއާނަށް ސަމާލުކަންދޭނެއެވެ. ކިޔަވަން ޝައުޤުވެރިވާނެއެވެ. ކިޔެވުމުގައި ފަރުވާތެރިވާނެއެވެ. އަދި އުނގެނި ޢަމަލުކުރެވޭނެއެވެ.
އެންމެކުޑަމިނުން މިމިންވަރު އެމީހެއްގެ ކިބައި ނެތްމީހަކީ ﷲ ތަޢާލާ ދެކެ ލޯބިވާ މީހަކުކަމުގައެއް ނުބެލެވޭނެއެވެ! ﷲ ތައާލާ ދެކެ ލޯބިނުވެވި އެމީހަކަށް ﷲ ތައާލާގެ ރުހިވޮޑިގަތުމާއި ލޯބިވެވޮޑިގަތުން ލިބޭނީ ކިހިނަކުންހެއްޔެވެ؟ ނަރަކައިން ސަލާމަތްވެވި ސުވަރުގެވަދެވޭނީ ކިހިނަކުން ހެއްޔެވެ؟
އަހުރެންގެ މިބަސްކޮޅު ކޮންމެ މީހަކުވެސް އެމީހެއްގެ އެކުވެރިންނާއި ހިއްޞާކޮށްލައި އެމީހުންނަށް ﷲ ތަޢާލާ ދެކެ ލޯބިވެވޭ މިންވަރާއިބެހޭގޮތުން އެއެމީހުންނާއި ސުވާލުކޮށްލާށެވެ! އަހަރެމެން އެންމެންގެ ހިތްތަކުގައި އެންމެ ބޮޑަށް ވަނީ ﷲ ތަޢާލާއަށާއި އެކަލާނގެ ރަސޫލާ ﷺ ގެމައްޗަށް އޮތްމލޯބިކަމުގައި ލައްވަވާނދޭވެ! އާމީން
- އިސްލާމީ ތިލަފަތުިގެ ދަރުސަކުން
