"ﷲ ތައާލާ ޙަރާމް ކުރެއްވެވި ކަމެއް ނުކޮށް ދުރުހެލިވުމުން ކުރާނެ ފައިދާ އަހަރެންނަށް މިދަނީ ކުރަމުން. މިޔުޒިކުން ކުރާ ޙަޤީޤީ ފައިދާއެއް ނެތް. ކުރާ ކުޑަ ފައިދާކޮޅަށްވުރެ ލިބޭ ގެއްލުން ހުރިހާ ގޮތަކުންވެސް މާބޮޑު. މިޔުޒިކް ޙަރާމްކުރައްވަވާފައި އެވަނީ އެކަމުގެ ސަބަބުން ލިބޭ ގެއްލުން ބޮޑުކަމުން!" މަޝްހޫރު ލަވަކިޔުންތެރިޔާ، މިހާރު ނަޝީދުކިޔުންތެރިޔާ ޢުމަރު
ކޮންމެ ކަމެއްގެ ޙަޤީޤަތް ވެސް އެންމެ ރަނގަޅަށް ތަޖުރިބާ ކުރެވިފައިވާނީ އެކަމެއްގެ ތެރޭގައި އުޅޭ އަދި އެކަމެއްކުރާ ބައަކަށްކަމަށް ބުނެވެއެވެ. އެގޮތުން ބަލައިފިނަމަ އިނގިރޭސިވިލާތަށް ނިޞްބަތްވާ ޢުމަރަކީ މިޔުޒިކްގެ ދުނިޔޭގައި އުދުހެމުން ދިއަ ޒުވާނެކެވެ. ލަވަކިޔުމާއި ޑީޖޭގެ ދުނިޔޭގައި އުދުހެމުންދިއަ މީހެކެވެ. އެތައް މިލިއަން މީހުންގެ ތާއީދު ލިބި އެކަމުގެ ހިތްހަމަޖެހުން ލިބެމުން އައި މީހެކެވެ.
ނަމަވެސް އޭނާ މިޔުޒިކްގެ ދުނިޔެ ދޫކޮށްލީ ﷲ ތަޢާލާއަށް ބިރުންނެވެ. "ﷲ ތައާލާ ކަމެއް ޙަރާމްކުރެއްވެވުމުން އެކަމަކާއި ދުރުވުމަކީ އެންމެ ފައިދާހުރި ގޮތްކަމަށް ޤަބޫލުކުރެވުމުންނެވެ."
އޭނާ މިޔުޒިކްގެ ދުނިޔެއަށް އަމިއްލައަށް އަލްވިދާޢުކީ ހުސްއަތާހުރެއެވެ. ނަމަވެސް މަހެއްހައި ދުވަހުގެ ތެރޭގައި އޭނާއަށްވަނީ އާމްދަނީ ލިބޭނެ މަގުވެސް ﷲ ތަޢާލާ ދައްކަވައިދެއްވަވައިފައެވެ.
ޢުމަރު ބުނަނީ މިޔުޒިކަކީ ކޮންމެ ޙަރާމްކަމެއް ކުރަން ހިތްހަމަޖެހުން ހޯދަން ބޭނުންކުރާ އެއްޗެއް ކަމަށެވެ. ނައިޓްކްލަބްތަކާއި ފާހިޝްޢަމަލުތައް ކުރާ ތަންތަނުގައާއި އިސްލާމް ދީން ހުއްދަނުކުރާ ބައްދަލުންތަކުގައާއި މަސްތުވުމަށް އަދި ސިކުނޑި މޮޔަކޮށްލައި ބާރުސްޕީޑްގައި ކާރުދުއްވުން ފަދަ ގެއްލުންހުރި ކޮންމެކަމަކަށް މިޔުޒިކް ބޭނުންކުރާ ކަމަށެވެ.
ޢުމަރުވަނީ މިޔުޒިކްކުޅޭ ސާމާނު ޙަރާމްކަން ބަޔާންކޮށް އެތަކެއްޗާއި ކައިރިނުވުމަށް އިލްތިމާސްކޮށްފައެވެ. "މުސްލިމުންގެތެރެއިން ގިނަބައަކު މިއަދު ވަނީ މިޔުޒިކްގެ ދުނިޔެއަށް ގެއްލިނިމިފަ. އެކަން ބަދަލުކުރުމަކީ ކުރަން ފަސޭހަކަމެއް ނޫން. ނަމަވެސް އެކަން ބަދަލުކުރަން ގިނަބައަކު ކުިރިމަތިލާންޖެހޭ. ގިނަބައަކު ނުކުމެ މަސައްކަތްކޮށްފިނަމަ ޙާލަތު ބަދަލުކުރެވޭނެ" ކަމަށްވެސް ޢުމަރު ބުނެއެވެ.
މިޔުޒިކާއިބެހޭ ގޮތުން ޢުމަރު އެދައްކާ ވާހަކަތައް އަޑުއައްސަވައިލައްވާށެވެ! އިސްލާމް ދީނުގައި މިޔުޒިކްގެ ކަންކަން އޮތްމަގުވެސް އެނގިވަޑައިގަންނަވާނެއެވެ. އަދި މިޔުޒިކް ޙަރާމްވެގެންވާ ސަބަބުތައްވެސް އެނގިވަޑައިގަންނަވާނެއެވެ.
ގުޅުންހުރި ވީޑިއޯ:
