ޔާ ﷲ! އިނބަ ﷲ އީ ފާފަފުއްސަވައިދެއްވެވުމުގައި އެންމެ ދީލަތިވަންތަ ރަސްކަލާނގެއެވެ. އަދި އިނބަ ﷲ އީ ރަޙުމްކުރެއްވެވުމުމުގައި އެންމެ އޯގާތެރިވަންތަ ރަސްކަލާނގެއެވެ!
ޔާ ﷲ! އަޅަމެން މިތިބީ އިނބަ ﷲ ގެ ޙަޟްރަތަށް ޙާޟިރުވެއެވެ. އަޅަމެންނަށް ކުރިމަތިވެފައިވާ މުޞީބާތްތައް އިނބަ ﷲ ދެނެވޮޑިގެންވަމުއެވެ. އެމީހަކަށް ކުރިމަތިވެފައިވާ ދަތިތަކާއި ހިތްދަތިކަން އިނބަ ﷲ ވަކިވަކިން ދެނެވޮޑިގެންނުވާ ހަމައެކަކުވެސް އަޅަމެންގެ ތެރެއަކު ނުވެއެވެ.
ޔާ ﷲ! އަޅަމެންނަށް ރަޙުމް ކުރައްވަވާނދޭވެ! އަޅަމެންގެ ފާފަތައް ފުއްސަވައިދެއްވަވާނދޭވެ! އަޅަމެންގެ ތެރެއިން ހަމައެކަކަށްވެސް އިނބަ ﷲ ގެ ރަޙްމަތްފުޅު މިންވަރުނުކުރައްވަވައި ދޫނުކުރައްވަވާނދޭވެ!
ޔާ ﷲ އެންމެހައި ބޮޑެތި ބަލިތަކުންނާއި ކުދިކުދިބަލިތަކުންވެސް އަޅަމެންނަށް ރައްކައުތެރިކަން ދެއްވަވާނދޭވެ! އިނބަ ﷲ އަޅަމެންނަށް މިންވަރުކުރައްވަވާ ނިޢްމަތްތަކަށް ޙަސަދަވެރިވާ މީހުންގެ ޙަސަދައާ އެސްފީނާއިން އަޅަމެން ސަލާމަތްކުރައްވަވާނދޭވެ! އަދި އަޅަމެންގެ މައްޗަށް ޙަސަދަވެރިނުވާނެވަރަށް އެމީހުންނަށް ނިޢްމަތްތައް އިތުރުކުރައްވަވައި ދެއްވަވާނދޭވެ!
ޔާ ﷲ! އަޅަމެންނަށް ރިޒްޤް ދެއްވަވާނދޭވެ! އަދި އިނބަ ﷲ ދެއްވަވާ ރިޒުޤަށް ފުދިގެން ތިބުމުގެ ކެތްތެރިކަން އަޅަމެންނަށް ދެއްވަވާނދޭވެ! ދުނިޔޭގެ އެދުންތަކަށް ދަހިވެތިވުމާއި ދަރަނިވެރިވުމުގެ ނުބައިކަމުން އަޅަމެން ސަލާމަތްކުރައްވަވާނދޭވެ!
ޔާ ﷲ! އަޅަމެންގެ އާޚިރަތް ބާއްޖަވެރިކުރަން މަސައްކަތްކުރުމުގެ ތައުފީޤް އަޅަމެންނަށް ދެއްވަވާނދޭވެ! އަދި އަޅަމެންގެ އެންމެ ފަހު މަންޒިލަކީ ޖަންނަތުލްފިރުދައުސްކަމުގައި ލައްވަވާނދޭވެ! އާމީން
