ތަފާތު މައްސަލަތައް ކުރިމަތިވެ ކަންބޮޑުވުން އިތުރުވެ މާޔޫސްބަލީގައި އުޅެމުންދާ މީހުން ގިނަވަމުން އަންނައިރު އެމީހުންނަށް ދޭންވީ "7 ޑޯޒް ފަރުވާ" ކީރިތި ޤުރްއާނުން ފެންނަން އެބައޮތެވެ! 7 އާޔަތުގައެވެ. ހެޔޮ ގޮތުގައި ވިސްނައިފިނަމަ މި 7 އާޔަތުން ޝިފާ ލިބިގަނެވޭނެއެވެ. އެއީ އެއްވެސް ޝައްކެއް އޮތް ކަމެއް ނޫނެވެ!
1 "އަދި އެއްވެސް ނަފްސަކަށް އެނަފްސަކަށް ކުޅަދާނަވެގެންވާ މިންވަރަށް މެނުވީ، ތިމަން ރަސްކަލާނގެ ތަކްލީފެއް ނުޖައްސަވަމެވެ...." (އަލްމުއްމިނޫން: 62)
2 "...އެއުރެން ނުބައި މަކަރުވެރި ރޭވުންތައް ރާވަތެވެ. އަދި ﷲ، (އެއުރެންގެ ރޭވުންތައް، ބާޠިލްކުރައްވަވައި، އެއުރެންނަށް ކެހިލިބޭނެ ގޮތަށް) ތަދްބީރުކުރައްވަވަތެވެ.ﷲ އީ މަކަރުވެރިންނަށްވުރެ، ތަދްބީރުކުރެއްވެވުން މޮޅު ރަސްކަލާނގެއެވެ..." (ސޫރަތުލްއަންފާލް: 30)
3 "..ހަމަކަށަވަރުން، ﷲ އީ، ތިއަބައިމީހުންނަށް ނަޞްރު ދެއްވަވާ އެހީތެރިވަންތަ ރަސްކަލާނގެކަން ތިއަބައިމީހުން ދަންނާށެވެ! އެހީތެރިވެވޮޑިގެންވާ ކަލާނގެ މޮޅުކަމާއެވެ! އަދި ނަޞްރުދެއްވަވާ ކަލާނގެ މޮޅުކަމާއެވެ!" (ސޫރަތުލްއަންފާލް: 40)
4 "ﷲ އީ، އީމާންވި މީހުންނަށް އެހީތެރިވެ، ވާގިވެރިވެވޮޑިގެންވާރަސްކަލާނގެއެވެ. އެކަލާނގެ އަނދިރިކަމުގެ ތެރެއިން އަލިކަމަށް އެއުރެން ނެރުއްވަވައެވެ..." (އަލްބަޤަރާ: 257)
5 "..އަދި ތިއަބައިމީހުން ތިބި ކޮންމެ ތަނެއްގައިމެ، އެތަނާއި ދިމާއަށް (ޙުރުމަތްތެރިވެގެންވާ މިސްކިތާއި ދިމާއަށް) ތިއަބައިމީހުންގެ މޫނުތައް ކުރިމަތިކުރާށެވެ! އެއީ، އެއުރެންގެތެރެއިން އަނިޔާވެރިވި މީހުން ފިޔަވައި އެހެން މީހުންނަށް ތިއަބައިމީހުންގެ ތިއަބައިމީހުންގެ މައްޗަށް ދައްކާނޭ ޙުއްޖަތެއް ނެތުމަށްޓަކައެވެ. ފަހެ، ތިއަބައިމީހުން އެއުރެންދެކެ ބިރުނުގަންނާށެވެ. އަދި، ތިމަންރަސްކަލާނގެއަށް ތިއަބައިމީހުން ބިރުވެތިވާށެވެ!..." (އަލްބަޤަރާ: 150)
6 "އަދި ހަމަކަށަވަރުން، އެކަލާނގެ ތިމަންމެންނަށް ތިމަންމެންގެ މަގުތައް ދައްކަވާފައިވާއިއރު، ﷲ އަށް ތިމަންމެން ވަކީލް ނުކުރަންވީ ކީއްވެގެން ހެއްޔެވެ؟ އަދި ތިއަބައިމީހުން ތިމަންމެންނަށް ދިން އުނދަގީޫތަކަށް ހަމަކަށަވަރުން، ތިމަންމެން ކެތްތެރިވާހުށީމެވެ. އަދި ވަކީލުކުރާމީހުން ހަމަކަށަވަރުން ﷲ އަށް ވަކީލްކުރާހުށިކަމެވެ." (އިބްރާހީމް: 12)
7 "..އަދި އެއްވެސް ނަފްސަކަށް އެނަފްސެއް މަރުވާނީ ކޮންބިމެއްގައިކަމެއް ނުއެނގޭނެތެވެ. ހަމަކަށަވަރުން ﷲ އީ، މޮޅަށް ދެނެވޮޑިގެންވާ، ޚަބީރުވަންތަ ރަސްކަލާނގެއެވެ!" (ލުޤްމާން: 34)
މި 7 އާޔަތަށް ވިސްނައި ފިކުރުކުރުމުން އެނގިގެންދާނީ ކޮންމެ ކަމެއްވެސް މެދުވެރިވާނީ ﷲ ތަޢާލާގެ މިންވަރުފުޅުންކަމާއި އަނިޔާވެރިންނަށް ދެވޭނެ އެއްވެސް ގެއްލުމެއް ނެތްކަމެވެ. އެންމެހައި ބާރުތައް ލިބިވޮޑިގެންވަނީ ﷲ ތަޢާލާއަށް ކަމެވެ. ކޮންމެ މުޞީބާތަކުންވެސް އެމީހަކު ސަލާމަތްކުރެއްވެވުމަށް ﷲ ތަޢާލާ ކުޅަދުންވަންތަވެވޮޑިގެންވާ ކަމެވެ. ހަމައެއާއިއެކު ﷲ ތަޢާލާގެ ޙަޟްރަތުން ނޫނީ ވާގިއެދުމެއް ނެތްކަމާއި ވަކީލްކުރާ އަޅުންނަށް ހިންމަވައި ދެއްވަވާނެ ކަމެވެ.
މިހެންގޮސް ހާސްވުމާއި ކަންބޮޑުވުމުގައި ހުރި މީހަކަށް އެކަންކަމުން ސަލާމަތްވުމަށް ހިތްވަރު ލިބުމުގެ ކުޅަދާނަކަން މި 7 އާޔަތުން ލިބިގެންދާނެއެވެ. ހަމައެކަނި ކޮށްލަންޖެހޭ ކަމަކީ "ޑޯޒް" ފުރިހަމައަށް ލިބިގަތުމެވެ. މާނައަކީ އީމާންކަން އެވަރަށް ވަރުގަދަކުރުމެވެ.
- އިސްލާމީ ތިލަފަތުގެ ދަރުސަކުން
