ދައްކަންވީ ހަމައެކަނި އެކަކު އަނެކަކަށް ނުބައި އަމަލުތައްކުރާ ދެމަފިރިންގެ ވާހަކައެއް ނޫނެވެ. ދެމަފިރިން ގުޅިގެން އެކުގައި އުޅޭ ދެމަފިރިންނަށްވެސް މައްސަލަތަކާއި ދަތިތައް ކުރިމަތިވެއެވެ. ދެމަފިރިން އެކުގައި ތިބެ ކަންބޮޑުވެ ދައުހިއްލައި އެދަލުން ތެމިފޯވާންޖެހޭ ޙާލަތަށް އެބަދެއެވެ.
އަހުރެންގެ އޮތީ އެންމެ ސުވާލެކެވެ. ކިތަންމެ ގިނަ މައްސަލަތަކެއް ކުރިމަތިވިނަމަވެސް، ކިތަންމެ ބޮޑު މުޞީބާތެއް ކުރިމަތިވިނަމަވެސް ދެމަފިރިން އެކަކު އަނެކަކަށް ނަޞޭޙަތްތެރިވާއިރު "ކަންބޮޑުނުވާށެވެ! ﷲ ތަޢާލާ ވޮޑިގެންވަނީ އަހަރެމެންނާއިއެކުގައި" ކަމަށް ބުނެވޭނީ ކިތައް ދެމަފިރިންނަށް ހެއްޔެވެ؟
މިޙާލަތުގައި މިދިމާވާގޮތަކީ ދެމަފިރިން ދިރިއުޅެނީ ލޯބިން އެކުގައެވެ. ވަފާތެރިކަމާއިއެކުގައެވެ. ނަމަވެސް ދެމަފިރިންގެ ކިބައިގައި ﷲ ތަޢާލާއަށް ލޯތްބާއި ކިޔަމަންތެރިކަން ނުއޮންނަނީއެވެ! ﷲ ތައާލާ އަންގަވާފައިވާ ގޮތަށް ކަންކަން ނުކުރެވެނީއެވެ. ކިޔަމަންތެރިވެ އަޅުކަންނުކުރެވެނީއެވެ! އެހެންކަމަށްވާނަމަ ކިތަންމެ ބޮޑު ކަމެއް ކުރިމަތިވިނަމަވެސް ތިބެންޖެހޭނީ ﷲ ތަޢާލާގެ ޙަޟްރަތުން މަދަދުލިބޭނެކަމާއިމެދު ކަންބޮޑުވެފައެވެ.
އެއިގެ ބަދަލުގައި ދެމަފިރިން އެކަކު އަނެކަކުދެކެ ލޯބިވާވަރަށްވުރެ ބޮޑަށް ދެމަފިރިންވެސް ނިކަން ﷲ ތަޢާލާ ދެކެ ލޯބިވެބަލާށެވެ! ރަސޫލް ﷺ ދެކެ ލޯބިވެބަލާށެވެ! ކީރިތި ޤުރްއާނާއި ސުންނަތަށް ލޯބިކޮށްބަލާށެވެ! ކިޔަމަންތެރިވާންވީ ގޮތުގައި ﷲ ތަޢާލާއަށް ކިޔަމަންތެރިވެބަލާށެވެ! ރާގު މުޅިން ބަދަލުވެގެންދާނެއެވެ! ކަންކަން މުޅިން ބަދަލުކޮށްލެވޭނެއެވެ! ހިތްވަރުގަދަވެ އިތުރު ބާރު ލިބިގެންދާނެއެވެ.
އެއިރުން އެކަކު އަނެކަކަށް ބުނެވޭނެއެވެ! "ކަންބޮޑުނުވާށެވެ! ﷲ ތަޢާލާ ވޮޑިގެންވަނީ އަހަރެމެންނާއިއެކުގައެވެ." ވަރަށް ޔަޤީންކަމާއިއެކު ބުނަމެވެ. މިފަދައިން ބުނެވެން ތިބި ކޮންމެ ދެމަފިރިއަކުވެސް ތިބޭނީ އުފަލުން ހިތްހަމަޖެހިގެންނެވެ. ކަންބޮޑުވެ ގައިން އޮށްދާ ހިއްލާކަށް ނުޖެހޭނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
