ބައެއް މީހުން ކީރިތި ޤުރްއާން ކިޔަވައި ދީނުގެ ކަންކަމަށް ޢަމަލުކުރަމުންވެސް އެމީހުންގެ އަމިއްލަ ދިރިއުޅުމުގެ ކަންކަން އެމީހަކު އެފަހަރަކު ކުރަން ބޭނުންވި ގޮތަކަށްކޮށް އެބަ ނިންމައިލައެވެ. އެއީ އެމީހަކަށް ލިބިގެންވާ އަމިއްލަ އިޚްތިޔާރެއް ކަމަށް ބަލައިގެންނެވެ.
ކީރިތި ޤްރުއާނުގައި ބަޔާންވެގެންވާ އެއްވެސް ކަމެއް ކީރިތި ޤްރުއާނާއި ޚިލާފަށް ނިންމުމުގެ އެއްވެސް ބާރެއް އެއްވެސް މީހަކަށް ލިބިގެނެއް ނުވެއެވެ. އަމިއްލަ ދިރިއުޅުމުގެ ކަމެއްގައި ނަމަވެސް މެއެވެ. އަނބިދަރިންނާއި ޢާއިލާގެ ކަންކަމުގައިވެސްމެއެވެ. އެހެން މީހަކާއިއެކު ކުރާ މުޢާމަލާތެއްގައި ނަމަވެސް މެއެވެ.
ވީމާ އަމިއްލަ ހަޔާތާއި ދިރިއުޅުމުގެ ކަންކަން ނިންމާއިރުވެސް މިކަންކަމަށް ވަރަށް ބޮޑަށް ސަމާލުކަން ދޭން ޖެހޭނެއެވެ. އެއްވެސް ކަމަކާއިމެދު ތިމާއަށް އެއްވެސް މިންވަރަކަށް އޮޅުން އަރާނަމަ، ޝައްކުވާނަމަ ދީނުގެ ޢިލްމުވެރިންގެ އަރިހުން އޮޅުންފިލުވައި ކީރިތި ޤްރުއާނުގައި އޮންނަ ގޮތަށް ޢަމަލުކުރާށެވެ! އަނބިދަރިންނާއި ޢާއިލާގެ މައްސަލަތަކުގައިވެސްމެއެވެ.
އެއިރުން އެމީހަކަށް ﷲ ތަޢާލާގެ ރުހިވޮޑިގަތުން ލިބިގެންދާނެއެވެ. ދިރިއުޅެން ކުރާ މަސައްކަތުގައާއި ދެމަފިރިންގެ ކަންކަމުގައިވެސްމެއެވެ. އަމިއްލަ ދިރިއުޅުމުގެ ހުރިހާ ކަމެއްގައިވެސްމެއެވެ.
"ތިމަންރަސްކަލާނގެ އެއުރެންނަށް ފޮތް ދެއްވި މީހުން އެފޮތް ކިޔަވަންވީ ޙައްޤު ގޮތުގައި އެފޮތް ކިޔަވައި އުޅެތެވެ. އެއުރެން އެ ފޮތަށް އީމާންވެތެވެ. އަދި އެފޮތަށް ކާފިރުވާ މީހުން (ދަންނާށެވެ!) ފަހެ، އެއުރެންނީ ހަމަ ގެއްލެނިވެގެންވާ މީހުންނެވެ". (ބަޤަރާ ސޫރަތުގެ 121)
މިއީ ބަޤަރާ ސޫރަތުގެ 121 ވަނަ އާޔަތެވެ. މިއާޔަތުގައި "އެފޮތަށް ކާފިރުވާ މީހުން" ކަމުގައި ބަޔާން ކުރައްވަވާފައި އެވަނީ ކީރިތި ޤުރްއާނަށް އަމަލު ނުކުރާ މީހުންނަށެވެ.
"ތިމަންރަސްކަލާނގެ އެއުރެންނަށް ފޮތް ދެއްވި މީހުން އެފޮތް ކިޔަވަންވީ ޙައްޤު ގޮތުގައި އެފޮތް ކިޔަވައި އުޅެތެވެ. އެއުރެން އެ ފޮތަށް އީމާންވެތެވެ." އޮތް ބަސްފުޅުގަެ މާނައަކީ ޙައްޤު ގޮތުގައި އެފޮތް ކިޔެވުމަކީ އެފޮތަށް އީމާންވުން ކަމުގައި ބަޔާން ކުރެއްވެވުމެވެ. އެފޮތަށް (ޤްރުއާނަށް) އީމާން ވުމަކީ އެފޮތަށް ޢަމަލުކުރުން ކަމުގައި މެނުވީ ނުވެއެވެ.
ވީމާ ކީރިތި ޤްރުއާނުގައި ބާވައިލައްވަވާފައިވާ އެއްވެސް ޙުކުމްފުޅަކަށް އަމަލު ނުކުރުމަށްފަހު ޤައުމުތަކުގެ ވެރިންނަށްވެސް ދެއްކޭނެ އެއްވެސް ބަހަނާއެއް ނުއޮންނާނެއެވެ. އަދި ކިއެއްތަ! އެއްވެސް މީހަކަށްވެސް ދެއްކޭނެ އެއްވެސް ބަހަނާއެއް ނުއޮންނާނެއެވެ.
ކީރިތި ޤްރުއާނުގައި ބަޔާންވެގެންވާ ގޮތް ހާމަކުރުމުން އިތުރަށް ދެއްކޭނެ އެއްވެސް ބަހަނާއެއް ނުއޮންނާނެއެވެ! އޮންނާނީ ޢަމަލުކުރުމެވެ. އީމާންކަން ފުރިހަމަވާނީ އެއިރުންނެވެ!
- އިސްލާމީ ތިލަފަތުގެ ދަރުސަކުން
