ޢަދުލުވެރިން ޤިޔާމަތްދުވަހުންވާހުށީ ނޫރުންވާ މިންބަރުތަކެއްގައި ކަމަށް ނަބިއްޔާ ﷺ ޙަދީޘްކުރައްވާފައިވެއެވެ. ވީމާ ދަރިންގެމެދުގައި ޢަދުލުވެރިވެގެން މިމަތިވެރި މަޤާމު މައިންބަފައިންނަށް ޙާސިލުކުރެވިދާނެއެވެ.
ލޯއްބާއި އަޅާލުމާއި ޚަރަދުކުރުމާއި އެހީތެރިވުންފަދަ އެންމެހައި ކަމެއްގައި ދަރިންގެ މެދުގައި ޢަދުލުވެރި އުސޫލެއް މައިންބަފައިން ގެންގުޅެންވާނެއެވެ. އެހެންނޫނީ ދަރިންގެ މެދުގައި ޙަސަދަވެރިކަމާއި ރުޅިވެރިކަމާއި ނަފްރަތު އުފެދޭނެއެވެ.
އެހެންބައަަކު ތިބި ތަނެއްގައި އަދި ވަކިން ޚާއްސަގޮތެއްގައި ދަރިފުޅުގެ ރަޙްމަތްތެރިން ތިބިތަނެއްގައި ދަރިފުޅަށް ގޯސްކޮށް ކުރެވުނު ކަމަކަށް އަޑުލައި ނަސޭހަތްދީ ނަހަދާށެވެ. އެކަމުގެ ސަބަބުން ދަރިފުޅު ލަދުގަނެ ނަފްސާނީގޮތުން ބަލިކަށިވެދާނެއެވެ.
ހިތާއި ސިކުނޑި ހަމަހިމޭންވެ، ހައިހޫނުކަން ފިލައި، ރުޅިމަޑުވެ ހިތްހަމަޖެހިފައި ހުންނަ ވަގުތެއްގައި ދެވޭ ނަސޭހަތުގެ މަންފާބޮޑުވާނެއެވެ.
ދަރިންނަށް ނަސޭޙަތްދިނުމަށް މުނާސަބު ވަގުތަކާއި ތަނެއް ޚިޔާރުކުރުމަކީ އެދޭނަސޭޙަތެއް ހިތުގެ ފުންމިނަށް ވާސިލުކޮށްދޭނެކަމެކެވެ. މުނާސަބު ވަގުތަކާއި ތަނެއް ޚިޔާރުނުކުރެވިއްޖެނަމަ އެނަސޭޙަތްވެގެންދާނީ އެއްކަންފަތުންވަދެފަ އަނެއްކަންފަތުން ނިކުމެގެންދާ އެއްޗަކަށެވެ.
ކަންކަމުގައި ކުޑަ ކުދިންގެ ލަފާ ހޯދުމާއި، އިޒްނަހޯދުމާއި، ކުޑަކުއްޖަކަށްވީތީ އެކުދިންގެ ޙައްޤުތަކަށް އިހުމާލުނުވުން ފަދަ ކަންކަމީ، ކުއްޖާގެ ނަފްސަށް އޮންނަ އިތުބާރު ބޮޑުވެ، ބޮޑެތިމީހުން އެކުއްޖާއަށް ޤަދަރާއި އިޙްތިރާމުކުރާ މުހިންމު ފަރުދެއްކަމުގެ އިޙްސާސްކުރެވޭނެކަމެކެވެ.
އަތުގައި ދޭނެ އެއްޗެއް ނެތި، އެއްޗެއް ދޭންކަމަށް ދަރިފުޅަށް ގޮވާ ގެނައުމަކީ މައިންބަފައިން ދަރިންނަށް ދަސްކޮށްދޭ ނުބައި ފިލާވަޅެކެވެ. ދަރިން މައިންބަފައިންގެ ކިބައިން ނަމޫނާ ލިބިިގަންނާނެކަން ހަނދާނުގައި އަބަދުމެ ބަހައްޓަންވާނެއެވެ.
"ގިނަގިނައިން ދަރިންނަށްޓަކައި ހެޔޮދުޢާކުރުން - ހެޔޮލަފާ ޖީލެއް ބިނާކުރުމުގެ އެންމެ ވަރުގަދަ ހަތިޔާރު"
- ޝައިޚް އަޙްމަދު ރިމާޒް
