އުމުރުގެ އެއްވެސް ދުވަސްވަރެއްގައި ތިމާއަށް ﷲ ތަޢާލާ އާއި ދުރުވެވޭކަމަށް އިޙްޞާޞްކުރެވޭނަމަ އެއީ އެންމެ ހިދުކޮޅެއްވެސް ލަސްނުކޮށް ވަގުތުން ފިޔަވަޅުއަޅަންޖެހޭނެ ކަމެކެވެ. އެކަންނުކޮށް ލަސްކޮށްފިނަމަ ދެމެދަށް ޝައިޠޯނާ ވަދެގަންނާނެއެވެ. ފުރުޞަތު ނަގާލުވައިފާނެއެވެ.
ﷲ ތައާލާ އާއި ދުރުހެލިވެވޭނަމަ އެކަނި އިނދެ އެކަން މެދުވެރިވާ ސަބަބާއިމެދު ވިސްނާށެވެ! އެސަބަބު އެކުގައި ނައްތައިލާށެވެ! އެކަމުގައި ދީނީ ޢިލްމުވެރިންނާއި ހެޔޮލަފާ އެކުވެރިންގެ އެހީތެރިކަންވެސް ހޯދާށެވެ!
ވަރަށް ގިނަ ފަހަރަށް މިފަދަ ޙާލަތު މެދުވެރިވަނީ ތިމާ ބޭނުންވާ ގޮތަށް ކަންކަން ޙާޞިނުކުރެވުމުންނެވެ. ކުރާ ދުޢާ ޢިޖާބަކުރެއްވެވުން ލަސްވުން ފަދަ ކަންކަމުގައެވެ. އަދި ނުބައި އެކުވެރިންނާއިއެކު އުޅެވުން ފަދަ ސަބަބުތައް މެދުވެރިވުމުންނެވެ. މީގެ އިތުރުން އަޅުކަމާއި ދުރުވެވުމުންނާއި ތިމާ ޢާންމުކޮށް ކުރަމުން އަންނަ އަޅުކަން ކުރުމުގަ ފަރުވާކުޑަކުރެވުމުންވެސް މިފަދަ ގޮތްތައް މެދުވެރިވެއެވެ.
ޔަޤީންކުރަންވީ ކަމަކީ ﷲ ތަޢާލާ އާއި ދުރުހެލިވެގެން ޙަޤީޤީ އުފަލެއް ނުލިބޭނެކަމެވެ. ޙަޤީޤީ ކުރިއެރުމެއްވެސް ނުލިބޭނެކަމެވެ. ޙަޤީޤީ އުފަލާއި ކާމިޔާބީ ޙާޞިލުވުން އޮތީ އެމީހަކަށް ﷲ ތަޢާލާ އާއި ކުއްތަންވެވުނު ވަރަކުންނެވެ.
- މުފްތީ މެންކްގެ ދަރުސަކުން
