މީހަކު ލޯބި ހުށަހަޅައިފާނެއެވެ! ހުށަހަޅާހައި މީހަކު ޤަބޫލުކުރާކަށް ނުޖެހޭނެއެވެ. ނަމަވެސް ޤަބޫލުކޮށްފިނަމަ، ކައިވެނިކުރަން ވައުދުވެއްޖެނަމަ އެ ވައުދު ދަމަހައްޓަންވާނެއެވެ. އެކަމަކީ ކޮފީއަކަށްދާން ބުނެފައި ނުދިއުންހައި ކުޑަކަމެއްގެ ގޮތުގައި ދެކެގެންނުވާނެއެވެ.
ހަމަ މިޒަމާނުގައިވެސް ވެވޭ ވައުދަކާއި ގުޅިގެން އަންހެންކުއްޖަކުވެސް ފިރިހެން ކުއްޖަކުވެސް 4،5 އަހަރުވެސް އިންތިޒާރުކޮށްފާނެއެވެ. އެތައް އަހަރަކު އިންތިޒާރުކުރާފަހުން ކައިވެނި ކުރެވެން ނެތްކަމަށް ބުނުމަކީ އިންތިޒާރުކުރި މީހާއަށް ދެވޭ ވަރަށް ބޮޑު އަނިޔާއެކެވެ. އެހެންވެ އެކަން ބެލެވެނީ އޭނާކުރި އުންމީދާއި އިންތިޒާރުގައި ހުޅުޖެހުން ފަދަ ކަމަކަށެވެ.
ކައިވެނިކުރެވެނީ ވެވޭ އެއްބަސްވުމެއްގެދަށުންނެވެ. މިޒަމާނުގައި ދެމަފިރިން އެއްބަސްވުމެއްގައި ސޮއިވެސް ކުރެއެވެ. ސޮއިކުރުމަށްފަހު އެތައް ދުވަހަކު އެކުގައި ދިރިއުޅެފައި އެއްބަސްވުން އުވައިލުމުންވެސް ކުރެވޭނެ ކަމެއް ނުއޮންނައިރު ވައުދެއް އުވާލުމުން ކުރެވޭނީ ކޮންކަމެއް ހެއްޔެވެ؟ ޖެހޭނީ ހަމަ ރޯން ހުންނަން ނޫންހެއްޔެވެ؟
ނަމަވެސް ރަނގަޅަށް ހަނދާންކުރާށެވެ! އަނެކާގެ އުންމީދުތަކާއި އިންތިޒާރަކީ ވަރަށް އަގުބޮޑު އެއްޗެކެވެ. އެއިގައި ހުޅުޖެހުމުން ކުރާ އަސަރު ފިހާރައެއް އަނދައިދިއުމުން ކުރާއަސަރަށްވުރެ މާބޮޑުވާނެއެވެ! ވީމާ ގިނަ ފަހަރަށް އޮންނަނީ އަނެކާގެ އުންމީދުތަކާއި އިންތިޒާރުގައި ހުޅުޖެހި މީހެއްގެ މުޅި ދިއުޅުމުގައި ހުޅުޖެހިފައެވެ. އަބަދު ހުންނަނީ އަނދައަނދައެވެ. ކިތަންމެ ތަނަވަހުގައި ދިރިއުޅެން ފުރުޞަތު ލިބުނު ނަމަވެސް ހިތަށް ލިބޭ ހިތްހަމަޖެހުމެއް އޮންނަ ކަމަކަށް ނުވެއެވެ.
މިއީ ފިރިހެނުންނަށް ނުވަތަ އަނހެނުންނަށް ބުނާ ބަހެއް ނޫނެވެ. އަންހެނުންނަށާއި ފިރިހެނުންނަށް ބުނާ ބަހެކެވެ. ﷲ ތައާލާގެ ރުހިވޮޑިގޮތުން ނުލިބި ހިތާމައިގައި އުޅެންޖެހުމަކީ ވަކި ޖިންސެއްގެ މީހަކަށް ކުރިމަތިވާނެ ކަމެއް ނޫނެވެ. ލިބުން ޙައްޤު ކޮންމެ މީހަކަށްވެސް ކުރިމަތިވާނެ ކަމެކެވެ.
ﷲ ތައާލާ ވަޙީކުރައްވަވާފައިވެއެވެ.
"...އެމީހެއްގެ އަހުދު އެމީހަކު ފުރިހަމައަށް އަދާކޮށް، ތަޤްވާވެރިވެއްޖެ މީހާ (ދަންނާށެވެ!) ފަހެ، ހަމަކަށަވަރުން، ތަޤްވާވެރިންދެކެ ﷲ ލޯބިވެވޮޑިގެންވެއެވެ." (އާލްޢިމްރާން: 76)
ވަޢުދާއި ހުވާ އުވައިލުމަކީ ވަރަށް ނުބައިކަންބޮޑު ފާފައެކެވެ. ހުވާ އުވައިލާ މީހުންނަށް ޤިޔާމަތްދުވަހު ﷲ ތަޢާލާ ބަސްވަޙީނުކުރައްވަވާނެތެވެ! އަދި ބައްލަވައިވޮޑިވެސް ނުގަންނަވާނެތެވެ! އާލް ޢިމްރާން ސޫރަތުގެ 77 ވަނަ އާޔަތްބަލާށެވެ!
- އިސްލާމީ ތިލަފަތުގެ ދަރުސަކުން
