ބުނެވޭ ގޮތުން ޢަބްދުﷲ ބިން މަސްއޫދު (ރޢ) އަކީ 6 ވަނައަށް އިސްލާމްވެވަޑައިގެންނެވި ޞަހާބީއެވެ. އަދި ނުހަނު ތުއްޕުޅުއިރުގައިވެސް ތެދުވެރިކަމުގެ ނަމޫނާ ދެއްކެވި ޞަހާބީއެކެވެ.
އެކަލޭގެފާނުގެ ޒުވާން ކުޑަކުއްޖެއްގެ ދުވަސްވަރުގައި ގިނައިން އުޅުއްވެވީ މައްކާގެ ރަށްބޭރުގައި ބަކަރި ހުއިހެއްޕުވުމަށެވެ. މިފަދައިން މަސައްކަތުގައި އުޅުއްވަނިކޮށް ކަރުހިއްކައިގެން ތިއްބެވި ދެ ބޭކަލަކު ވަޑައިގެން ކިރުފޮދަކަށް އެދިވަޑައިގަތުމުން ވިދާޅުވީ "އެއީ ތިމަންނާގެ ބަކަރި ނޫން ކަމަށެވެ. އަދި ބަކަރިތައް ތިމަންނާ އާ ޙަވާލުކޮށްފައިވަނީ ހަމައެކަނި ބަލަހައްޓަން ކަމަށެވެ."
އެދެބޭކަލުންވެސް އިތުރަށް އެއްވެސް ޝަކުވާއެއް ނުކުރައްވަވައި ޢަބްދުﷲ ބިން މަސްއޫދު (ރޢ)ގެ ނިންމެވުމަށް އިޙްތިރާމްކުރައްވައި ވަޑައިގަތީއެވެ. ޢަބްދުﷲ ބިން މަސްއޫދު (ރޢ) ގެ ހިތްޕުޅުގައި ރަސޫލް ﷺ އަށް ލޯބިފުޅު އުފެދެން ފެށީ އެދެބޭކަލުންނަކީ ރަސޫލް ﷺ އާއި އަބޫބަކުރުފާނުކަން އެނގިވަޑައިގަތުމުންނެވެ! އިސްލާމްވެވަޑައިގަތުމަށްފަހު ބަކަރިހުއިހިއްޕެވުމުގެ ބަދަލުގައި ޢަބްދުﷲ ބިން މަސްއޫދު (ރޢ) ދެމިހުންނެވީ ސީދާ ރަސޫލް ގެ ޚިދުމަތުގައެވެ.
ކޮންމެއަކަސް މިމަތިވެރި ޞަހާބީ، ޢަބްދުﷲ ބިން މަސްއޫދު (ރޢ) އެންމެ ބޮޑަށް ހިތާމަފުޅު ކުރައްވަވާކަމަކީ ކުރީ ދުވަހަށްވުރެ އެދުވަހު ކުރެއްވެވުނު ހެޔޮ ޢަމަލުތައް މަދުވެދާނެ ކަމަށްޓަކައެވެ. އަދި އެކަލޭގެފާނު އެންމެ ބޮޑަށް ހިތާމަފުޅު ކުރައްވަވާ ދުވަހަކީ ކުރީ ދުވަހަށްވުރެ މަދުން އަޅުކަން ކުރެއްވޭ ދުވަހެވެ.
ވިސްނައިލާށެވެ! ޢަބްދުﷲ ބިން މަސްއޫދު (ރޢ) ފަދަ ޞަހާބީންގެ މިފަދަ ބަސްފުޅުތަކުން ޢިބްރަތް ޙާޞިލުކޮށް އެފަދަ އިރުޝާދުތަކަށް އަމަލުކުރާ ބައަކަށް މެނުވީ ސަލާމަތްކަމެއް ނެތެވެ.
ތިމާގެ ވަގުތުތައް ހޭދަކުރި ގޮތާމެދު ޖަވާބު ނުދީ ޤިޔާމަތް ދުވަހު ގުޑައިވެސް ނުލެވޭނެއެވެ. އެހެނީ ޤިޔާމަތް ދުވަހު އެމީހަކު ހުރި ފިޔަވަޅުމަތިން ގުޑައިލެވޭނީވެސް 4 ސުވާލަކަށް ޖަވާބު ދީފައެވެ. އެއީ "1 އެމީހާގެ ޢުމުރު ހޭދަކުރީ ކޮން ކަމެއްތޯ؟ 2 އެމީހަކު އުނގެނިފައިވާ ޢިލްމުން އޭނާ ކުރީ ކޮން ކަމެއްތޯ؟ 3 އެމީހެއްގެ މުދައު ހާދަކުރީ ކޮން ކަމެއްގައިތޯ؟އާއި އެތަކެތި ހޭދަކުރީ ކޮންކަމަށްތޯ؟ 4 އޭނާގެ ހަށިގަނޑު މުސްކުޅި ކުރުވީ ކޮން ކަމެއްގައިތޯ؟" އެވެ.
އެހެންކަމުން އުމުރުގެ ދުވަސްތައް ފާއިތުވެގެންދާއިރު ވަގުތު ހޭދަކުރި ގޮތަކާއިމެދު ވަރަށް ބޮޑަށް ސަމާލުކަންދޭންވާނެއެވެ.
މިއީ އިސްލާމް ދީނުގައި ކަން އޮތް ގޮތް ނަމަވެސް މިއަދުގެ ޙާލަތަށް ބަލައިފިނަމަ އެއްދުވަހުން އަނެއް ދުވަހަށް ވަގުތު ހޭދަކުރުން އިތުރުކުރަމުން މިގެންދަނީ ސޯޝަލް މީޑިއާގައި އާއި ކޮފީ މޭޒުތަކުގައާއި ރެސްޓޯރަންޓްތަކުން ކެއުމުގައެވެ. ހެޔޮއަމަލުކުރަން ވަގުތު އިތުރު ކުރާމީހުންގެ ނިޞްބަތް ހމަ ސަތޭކައަކުން އެންމެ އެކެއް ކަމުގައި ބުނުމަކީ ދޮގަކަށްނުވާނެއެވެ. އެހެންކަމަށްވާނަމަ ﷲ ތަޢާލާ ކުރައްވަވާ 4 ސުވާލަށް ޖަވާބު ދެވޭނީ ކޮންގޮތަކަށްތޯއެވެ؟
އަހަރެމެންނަށް ކޮންމެ ދުވަހަކުވެސް މިކުރެވޭކަމަކީ ސޯޝލް މީޑިއާގަ އެދުވަހު ކުރެވުނު ޕޯސްޓްތަކުގެ އަދަދާއި ސޯޝަލް މީޑިއާގައި ލިބުނު ލައިކާ އިތުރުވި "ފްރެންޑުން"ގެ އަދަދު ބެލުމެވެ! އެކަންކަންކޮށްގެން ނަރައިން ސަލާމަތްވާނެ ނަމަ ހާދަގިނަ ބައަކު ސަލާމަތްވާނެތާއވެ!
ސުވަރުގެ އެދޭމީހާ ކޮންމެ ދުވަހަކުވެސް ހިސާބުބަލަންވީ އެދުވަހު ކުރެވުނު ހެޔޮ އަމަލުތަކުގެއެވެ. މަސައްކަތް ކުރަންވީ ކުރާ ޕޯސްޓްގެ އަދަދު އިތުރުކުރާކަށްވެސް ނޫނެވެ. އަދި ފްރެންޑުން އިތުރުކުރާކަށް ވެސް ނޫނެވެ. މަސައްކަތްކުރަންވީ ކުރާ ހެޔޮ އަމަލަތުގެ ޢަދަދު އިތުރުކުރުމަށެވެ.
- އިސްލާމީ ތިލަފަތގެ ދަރުސަކުން
