ޖިންނިން އިންސާނުންނާ އަވަލާ 3 ޙާލަތެއްވެއެވެ. އެއިގެ ތެރެއިން ފުރަތަމަ ޙާލަތަކީ ތިމާ މީހަކަށް އަނިޔާވެރިވާ ވަގުތެވެ. ތިބާ މީހަކަށް އަނިޔާކުރާ ވަގުތަކީ ތިބާ އާއި އަވަލަން ޖިންނިން ޝައިޢުޤުވެރިވާ ވަގުތެވެ.
ސަބަބަކީ ޖިންނިންތެރޭގައި ވެސް އަނިޔާވެރިވާން ޝައުޢުޤުވެރިވާ ޖިންނިން ތިބެއެވެ. ވީމާ ތިބާ މީހަކަށް އަނިޔާވެރިވާތަން ފެނުމުން ތިބާ އާއިއެކުގައިވުމަށް އަނިޔށވެރި ޖިންނިން ބޭނުންވެއެވެ.
ދެވަނަ ޙާލަތަކީ ތިބާގެ ރީތިކަން ފެނުމެވެ. ކޮޓަރީގައި ނަމަވެސް ހެދުން ބާލާނަމަ ބިސްމިﷲ އާއި އެނޫންވެސް ޛިކުރުތައް ކިޔަން ޖެހެނީ އެސަބަބަށްޓަކައެވެ. ޖިންނިންގެ ނުބައިކަމުންނާއި އުނދަގޫތަކުން ސަލާމަތްކަން ލިބިގަތުމަށެވެ.
3 ވަނަ ޙާލަތަކީ ޖިންނިންގެ ކިބައިން ރައްކައުތެރިކަން ނުހޯދައި ކުރެވޭ ކަންކަމުން ޖިންނިންނަށް އަނިޔާ ލިބުމެވެ. ވީމާ ކޮންމެ ކަމެއްކުރިނަމަވެސް ބިސްމިﷲ ކިޔައި ﷲ ތަޢާލާގެ ރައްކައުތެރިކަން ހޯދަންވާނެއެވެ.
ހަމައެއާއިއެކު ޖިންނިންނަށް ތިބާގެ ހަށިގަނޑަށް ވަންނަން ފުރުޞަތު ފަހިވެގެންދާ ޙާލަތުތަކެއްވެއެވެ. އެއިގެ ތެރެއިން ފުރަތަމަ ޙާލަތަކީ ތިބާ ރުޅިގަދަވާ ވަގުތެވެ. ރުޅިގަދަވެ ރުޅި ކޮންޓްރޯލުން ނެއްޓުމަކީ ޖިންނިންނަށް ތިބާގެ ހަށިގަނޑަށް ވަންނަން ފުރުޞަތު ލިބިގެންދާ ކަމެކެވެ.
ދެވަނަ ޙާލަތަކީ ﷲ ތަޢާލާ ނޫންފަރާތަކަށް ތިބާ ބިރުވެތިވާ ވަގުތެވެ! އެއީ ތިބާގެ ހަށިގަނޑުގެ ތެރެއަށް ވަދެގަންނަން އެއެއްޗެތި ބަލަބަލައި ތިބޭ ފުރުޞަތެކެވެ. ވީމާ ކޮންމެކަމެއް މެދުވެރިވިނަމަވެސް އެ ޙާލަތުދެކެ ބިރުނުގަންނާށެވެ! އެޙާލަތު މެދުވެރިކުރެއްވެވި ﷲ ތަޢާލާއަށް ބިރުވެތިވާށެވެ! ކުރިމަތިވި ކަންތައް އެއީ އެހައި ބޮޑުކަމަކަށް ނުހަދާށެވެ!
3 ވަނަ ޙާލަތަކީ ފާހިޝް ޢަމަލުތައް ކުރާ ވަގުތާއި ބަރަހަނާ ފިލްމުބެލުން ކަމަށް ގެއްލިގެން ތިބޭ ވަގުތެވެ. ދެމަފިރިން ނަމަވެސް ޖިމާޢުވާއިރު ދުޢާކުރަން ސުންނަތުގައި އެއޮތީ އެ ސަބަބަށްޓަކައެވެ.
ހަމަ އެއާއިއެކު ފާޚާނާއަށް ވަންނައިރު އާއި ނުކުންނަމުން ޛިކުރު ކިޔަންވާނެއެވެ. ފާޚާނާއަކީ އެންމެގިނައިން ޖިންނި ޝައިޠޯނުން ބަނޑަހަޖަހައިގެން ތިބޭ ތަނެވެ.
ޖިންނި އަވަލުމުންނާއި ހަށިގަނޑުގެ ތެރެއަށް ވަނުމުން ސަލާމަތްކަން ހޯދޭނީ ތިމާއެކަމަށްޓަކައި ކުރަންޖެހޭ ރައްކައުތެރިކަމުގެ ފިޔަވަޅުތައް އެޅުމުންނެވެ. ފިޔަވަޅުތައް ނުއަޅައި އުޅޭނަމަ އެއްޗެތީގެ އުނދަގޫތައް ފޯރުން ގާތްވާނެއެވެ. ހަށިގަނޑުގެ ތެރެއަށް ވަދެގަންނަން ފަސޭހަވާނެއެވެ.
- އިސްލާމީ ތިލަފަތުގެ ދަރުސަކުން
