ބައެއް މީހުންނަށް ޤަބޫލުކުރެވިފައި އޮންނަނީ ޞަދަޤާތްކުރުމަކީ ތިމާއަށް ފުދިއިތުރުވުމުން ކުރަންޖެހޭ ކަމެއް ކަމަށެވެ. ނަމަވެސް ޙަޤީޤަތަކީ އެއީއެއް ނޫނެވެ. ނަރަކައިން ސަލާމަތްވާން އެދޭ މީހާއަށް އޮތީ ހައިހޫނުކަމުގައި ހުރެގެންވެސް އަތުގައި އޮތް އެއްޗަކުން ބައެއް ޞަދަޤާތްކުރުމެވެ.
އެކަން އެނގެނީ "ކަދުރުއޮށެއްގެ އެއްފަޅި ނަމަވެސް ޞަދަޤާތްކޮށް ނަރަކައިން ސަލާމަތްވުމަށް" ކުރައްވަވާފައި އޮތް ޙަދީޘްފުޅުންނެވެ.
ޞަދަޤާތްކުރުމަކީ ތަނަވސްކަން ލިބިގެން ތިބޭ މީހުން ކުރަން އޮތް ކަމެއް ކަމަށާއި މިލިއަނުން ފައިސާ އަތުގައި ނެތްނަމަ ޞަދަޤާތް ކުރަން ނުޖެހޭނެކަން ވިސްނައިދެނީ ޝައިޠޯނާއެެވެ! އެންމެން ގޮވައިގެން ނަރަކައަށް ވަންނަން ޝައިޠޯނާކުރާ މަސައްކަތުގެ ތެރެއިންނެވެ. ވީމާ ޝައިޠޯނާގެ އެމަޅީގައި ނުޖެހި ސަލާމަތްވާށެވެ!
ޙާލުގައި ޖެހިފައިވާ މީހަކަށް އެހީތެރިވުމުން ދެއްވަވާނެ މަތިވެރި ޘަވާބު ނިކަން ދެކިބަލާށެވެ!
މީސްތަކުންނޭވެ! ފެންބޮވައިގެންފައި އޮތް ކުއްތާއަކަށް ފެންދިން ޔަހޫދީ ކަސްބީ އަންހެނަކު ނަރަކައިން ސަލާމަތްކުރެއްވެވިކަން ޙަދީޘްފުޅުން އެނގެން އެބައޮތެވެ. އޭނާއަކީ އެންމެ ނުބައި ފާފަތަކުން ފުރިގެންހުރި އަންހެނެކެވެ. ނަމަވެސް އޭނާއަށް ކުރެވުނު ހުރިހާ ފާފަތަކެއް ފުހެވިގެން އެދިއައީ، ފުއްސަވައި އެދެއްވެވީ ޙާލުގައި ޖެހިފައިވާ ޖަނަވާރަކަށް އެހީތެރިވުމުންނެވެ.
ވީމާ އެނގިގެން މިދަނީ ކިތަންމެ ބޮޑު ފާފައެއް ކުރެވިފައިވީނަމަވެސް ޙާލުގައި ޖެހިފައިވާ މީހަކަށް އެހީތެރިވުމުގެ ގޮތުން ކުރެވޭ ކިތަންމެ ކުޑަކުޑަ ޢަމަލަކުންވެސް ނަރަކައިން ސަލާމަތްކުރައްވަވައި ސުވަރުގެ ވައްދަވައިފާނެކަމެވެ. ވީމާ އެއްވެސް ހެޔޮޢަމަލަކީ ކުޑަ ޢަމަލެއްކަމަށް ބަލައި ނުކޮށް ދޫކޮށްނުލާށެވެ!
- ޝައިޚް މުޙައްމަދު ހޮބްލޮސް
