ﷲ ތަޢާލާ މަލާއިކަތުންނާއި އެބަ ސުވާލުކުރައްވަވައެވެ! "ތިމަން ﷲ ގެ ޙަޟްރަތުން އެމީހުން ބޭނުންވަނީ ކޮންކަމެއް ހެއްޔެވެ؟"
ޖަވާބުގައި މަލާއިކަތުން "އެމީހުން ބޭނުންވަނީ ސުވަރުގެ" ކަމަށް ދެންނެވުމުން "އެއީ އެމީހުންނަށް ސުވަރުގެ ފެނިގެންތޯ؟" ވެސް ﷲ ތަޢާލާ ސުވާލުކުރައްވަވަތެވެ. މިސުވާލުތައް ކުރައްވަވަނީ އެއްވެސް ޙާލެއްގައި މީސްތަކުން ބޭނުންވާ ކަންކަން އެނގިވޮޑިނުގަންނަވާތީއެއް ނޫނެވެ. ކޮންމެ މީހަކު ބޭނުންވާ ކަންކަން ވަކިވަކިން ދެނެވޮޑިގެންވާ ޙާލުގައެވެ.
ހަމައެއާއިއެކު ކޮންމެ ރެއެއްގެ ފަހު ދަންފަޅީގައި 3 ވަނަ އުޑަށް ފައިބައިވަޑައިގެން "މީސްތްކުންގެ ތެރެއިން ތިމަން ﷲ ގެ ޙަޟަރަތުން ފާފަފުއްސެވުމަށާއި އެހެންވެސް ކަންކަމަށް އެދި ދަންނަވަނީ ކޮންބައަކުތޯ؟" ސުވާލުކުރައްވަވައި އަދި އެމީހުންގެ ބޭނުންތައް ފުއްދަވައި ދެއްވަވާނެކަމަށް އެބަވަޙީކުރައްވަވައެވެ.
މީސްތަކުންނޭވެ! ﷲ ތަޢާލާ މިހައި ދީލަތިވަންތައިރު އަހަރެމެންނަށް ބޭނުންވާ ކަންކަމުގެ ވާހަކަތައް ނުދަންނަވައި މިތިބެނީ ކީއްވެގެން ހެއްޔެވެ؟ ދަންނަވާށެވެ! ދަންނަވަންވީ އަތްފޯރާފަށުން ބޭނުންވާ ކަންކަމަށް އެކަންޏެއް ނޫނެވެ. ޖަންނަތުލްފިރުދައުސް ދެއްވެވުމަށެވެ. ޖަންނަތުލްފިރުދައުސްވަނީ 7 ވަނަ އުޑުގެ މަތީގައެވެ. ވީމާ ކަންކަމަށް އެދެންވީ 7 ވަނަ އުޑާއި ހަމައިންނެވެ. 7 ވަނަ އުޑުގެ މަތީގައި ވޮޑިގެންވާ ﷲ ތަޢާލާގެ ޙަޟްރަތުގައެވެ.
ބަޔާންމިކުރި 2 ޙާލަތުންވެސް އެނގިގެންދަނީ މީސްތަކުންގެ ބޭނުންތައް ފުއްދަވައި ދެއްވެވުމަށް ﷲ ތަޢާލާ ބޭނުންފުޅުވެ ވޮޑިގަންނަވާ މިންވަރެވެ. އަހަރެމެންނަށް އޮތީ އަހަރެމެންގެ ބޭނުންތައް ﷲ ތަޢާލާ ފުއްދަވައިދެއްވަވާނެ ގޮތަށް އަހަރެމެންގެ ޢަމަލުތައް ބަހައްޓައިގެން ތިބެ ދުޢާކުރުމެވެ! ހިންމަވައި ދެއްވަވާނެކަން ޔަޤީނެވެ. އެއީ ޝައްކުކުރަން އޮތްކަމެއް ނޫނެވެ!
- ސިރާޖް ވައްހާޖްގެ ދަރުސަކުން
