ތިބާގެ ހުރިހާ އެކުވެރިންނާ ޢާއިލާގެ އެންމެން ތިބާއާއިމެދު ގޯސްކޮށް ކަންކަން ކުރިނަމަވެސް ތިބާ އެންމެންނަށް ތިބާއަށް ވެވުނުހައި ރަނގަޅަކަށް ކަންކަން ކުރަމުން ގެންދާށެވެ! އެއްވެސް މީހަކަށް ރަނގަޅަށް ކަންކަން ކުރަންވީ އެމީހަކަށްޓަކައެއް ނޫނެވެ. ﷲ ތައާލާ އެކަމަށް އަމުރުފުޅުކުރައްވަވާފައި އޮތުމުންނެވެ.
މީސްތަކުންނަށް ރަނގަޅަށް ކަންކަން ކުރުމުން އެމީހެއްގެ ދަރަޖަ ﷲ ތަޢާލާގެ ޙަޟްރަތުގައި އުފުލިގެނދާ ކަމެކެވެ. އެމީހާގެ ސޫރަ ރީތިވެގެންދާކަމެކެވެ. ވީމާ ބައަކު ޢަމަލުކުރާ ގޮތާއިމެދު ކަންބޮޑުވެ ތިބާގެ ސޫރަ ހުތުރުވެގެންދިއަ ނުދޭށެވެ!
މީސްތަކުންނާއިމެދު ޢަމަލުކުރާއިރު އެއީ ތިމާގެ ހެޔޮކަން އެމީހަކަށް ޙައްޤު މީހަކުތޯ ނުވަތަ ނޫންތޯ ބެލުމުގެ އެއްވެސް ބޭނުމެއް ނެތެވެ. ކޮންމެ މީހަކާއިމެދުވެސް ހެޔޮކޮށް ހިތަން ﷲ ތައާލާ އަންގަވާފައި އޮތްއޮތުމަށް ޢަމަލުކުރާށެވެ!
ޢިބްރަތް ޙާޞިލުކުރަންވީ ސުންނަތުންނެވެ. ރަސޫލް ﷺ އަށް ނުބައިކޮށް ކަންކަންކުރި އެއްވެސް މީހަކާއިމެދު ނުބައިކޮށް އެއްވެސް ކަމެއް ކުރައްވަވާފައެއް ނުވެއެވެ. އެމީހުންނާއިމެދުވެސް އަމަލުފުޅުކުރެއްވެވީ ހެޔޮކޮށެވެ. ނަތީޖާއެއްގެ ގޮތުން ގިނަބައެއްގެ ހިތްތައް ރަސޫލް ﷺ ގެ މައްޗަށް ލެނބި، އިތުރު އެކަލޭގެފާނަށް ލޯބިޖެހި އިސްލާމް ދީން ޤަބޫލުކުރިއެވެ! ﷲ ތައާލާއަށް އީމާންވެ ފަހުން އިސްލާމް ދީނަށް ނަޞްރުދޭ ބައަކުކަމުގައިވެގެން ދިއައެވެ.
ހަމައެކަނި އެޒަމާނުގައެއް ނޫނެވެ. ހަމަ މިޒަމާނުގައިވެސް ދަނީ އެކަން ފެންނަމުންނެވެ. ތިމާއާއިމެދު ނުބައިކޮށް ކަންކަންކުރާ މީހުންނަށް ރަނގަޅަށް ކަންކަން ކުރުމުން އެމީހުންގެ ހިތް ބަދަލުވެ ހެޔޮކޮށް އަމަލުކުރާތަން ފެންނަމުންދަނީ މަދަކުންނޭނެވެ. ހަތުރުންގެ ގޮތުގައި ތިބޭ މީހުން މިތުރުންނަށް ބަދަލުވެގެންދަނީވެސް މަދަކުންނޫނެވެ.
ވީމާ ތިމާ އާއިމެދު ކިތަންމެ ގޯސްކޮށް ކަންކަންކުރާ މީހަކަށް ނަމަވެސް ހެޔޮކޮށް ކަންކަން ކުރާށެވެ. އެކަމުގެ ޘަވާބަށް ﷲ ތަޢާލާގެ ޙަޟްރަތުން އެދޭށެވެ. އެކަމުގެ ފައިދާ ފެންނާނެތެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
