މަރަށް ތައްޔާރުވާ މީހާ، މާނައަކީ ކޮންމެ ވަގުތަކުވެސް ތިމާ މަރުވެދާނެކަމަށްބަލައި އެކަމަށް ތައްޔާރަށް ހުންނަން މަސައްކަތްކުރާ މީހާއަށް ޙާޞިލުކުރަން އެންމެ މުހިންމުވާނެކަމަށް އަހުރެންނަށް ފާހަގަކުރެވެނީ 3 ކަމެކެވެ.
އެއީ ކުރެވިފައިވާ ފާފަތައް ފުއްސަވައި ދެއްވެވުމާއި ދަރަނިން ސަލާމަތްވެފައިވާ މީހަކުކަމުގައިވުމާއި އެއްވެސް މީހެއްގެ ޙައްޤަކަށް އަރައިގަނެވިފައިވާނަމަ އެޙައްޤު އަދާކުރުމެވެ.
އެމީހެއްގެ ފުރާނަ ހިއްޕަވަން ރަޙްމަތުގެ މަލާއިކަތުން ސުވަރުގޭގެ ފޭރާމާއި ހުވަނދު ހިއްޕަވައިގެން ފައިބާ ވަޑައިގަންނަވާނީ އެމީހަކީ ސުވަރުގެވަންތަ އަޅަކަށްވާނަމައެވެ. ސުވަރުގެވަންތަ އަޅަކަށްވެވޭނީ އެމިހާގެ ފާފަތައް ﷲ ތަޢާލާ ފުއްސަވައިދެއްވެވުމުންނެވެ.
ދެން އޮތީ ދަރަންޏާއި މީސްތަކުންގެ ޙައްޤުތަކެވެ. އެކަންކަން ދުނިޔޭގައި ހަމަނުޖެއްސިވާނަމަ، ދަރަނި އަދާނުކުރެވި، މީސްތަކުންގެ ޙައްޤުތައް އަދާނުކުރެވިވަނިކޮށް މަރުވެއްޖެނަމަ ޙައްޤު ލިބެންޖެހޭ މީހާ މާފުނުކޮށްފިަނަމަ ޖެހޭނީ ޤިޔާމަތްދުވަހު ބަދަލުދޭށެވެ! އަދި ދުނިޔޭގައި ހުރެ މާފުނުކޮށްފިނަމަ ޤިޔާމަތް ދުވަހު މާފެއް ނުކުރާނެއެވެ. އެދުވަހު ހަމަ ކޮންމެ މީހަކަށްވެސް އުޅެންޖެހޭނީ ތިލަފަތުގައި ހެޔޮކަމުގެ ކޮޅަށް ބަރުކުރެވެން އޮތް ކޮންމެ ކަމަކުން ބަރުކުރުމަށެވެ.
ވީމާ މިއީ މިކަންކަމަށް އެދި ކުރެވިދާނެ ދުޢާއެކެވެ!
ޔާ ﷲ! މިއަޅާއަށްވެސް ވަނީ ވަރަށް ގިނަ ފާފަތަކެއް ކުރެވިފައެވެ. މިއަޅާގެ ފުރާނަ ހިއްޕެވުމުގެ ކުރިން ނުފުއްސަވާ އެންމެ ފާފައެއްވެސް ނުބާއްވަވާނދޭވެ! ހުރިހާ ފާފަތަކެއް ފުއްސަވައިދެއްވަވާނދޭވެ! އަދި ދަރަނިވެރިއެއްގެ ގޮތުގައިވަނިކޮށް މިއަޅާގެ ފުރާނަ ނުހިއްޕަވާނދޭވެ! މިއަޅާ ދަރައިފިނަމަ އެދަރަނި އަދާކުރުމުގެ ކުޅަދާނަކަން މިއަޅާއަށް ދެއްވަވާނދޭވެ! އަދި މަރުވުމުގެކުރިން މީސްތަކުންގެ ޙައްޤުތައް އަދާކުރުމުގެ ކުޅަދާނަކަންވެސް މިއަޅާއަށް ދެއްވަވާނދޭވެ! އާމީން
- އިސްލާމީ ތިލަފަތުގެ ދަރުސަކުން
