އަހަރެމެންގެ ތެރެއިން ގިނަބައަކަށް ނަމާދުކުރެވެނީ އެއީ ކޮންމެހެން ކުރަންޖެހޭ ކަމަކަށްވާތީ ވާޖިބު އަދާކުރުމަށެވެ. ނަމާދުކުރުމަށް ލޯބިޖެހިގެނެއް ނޫނެވެ. އެއީ ކުރާހިތުން ކުރާ ކަމެއްގެ ގޮތުގައެއް ނޫނެވެ. ނަމާދުގައި ޚުޝޫޢަތްތެރިނުވެވޭ އަދި ފަރުވާ ކުޑަކުރެވޭ އެންމެ ބޮޑު އެއް ސަބަބަކީވެސް އެއީއެވެ.
ނަމާދުކުރާއިރު އެންމެ މުހިންމު އެއްކަމަކީ އެއީ ތިމާކުރާހިތުން ކުރާކަމަކަށްވުމެވެ. ޝައުޤުވެރިކަމާއިއެކު ނަމާދުކުރެވޭނީ އެއިރުންނެވެ. މިގޮތުން ނަމާދުކުރަން ހިތްޖައްސުވައި ޝައުޤުވެރިކުރުވަން ކުރެވިދާނެ ބައެއް ކަންކަން ފާހަގަކޮށްލާނަމެވެ.
1 ނަމާދުކުރަނީ ކީއްވެގެން ކޮން ފަރާތަކުން އަމުރުފުޅުކުރައްވަވައިގެން ހިތްމައްޗަށް ގެންނާށެވެ! އަދި ކުރާ ނަމާދު ނަމާދަކަށްވާނީ ﷲ ތަޢާލާ ޤަބޫލުފުޅުކުރައްވަވާ ފެންވަރުގައި ކުރެވިގެންކަން ހިތްމައްޗަށް ގެނެސް ވީހައި ބޮޑަށް ނަމާދުފުރިހަމަކުރަން ސަމާލުކަންދޭށެވެ!
2 ތިމާ ހުއްޓިމިހުރީ ﷲ ތަޢާލާގެ ޙަޟްރަތުގައިކަން ހިތްމައްޗަށްގެނެސް ވީހައި ބޮޑަށް ކިޔަމަންތެރިކަން އަދާކުރާށެވެ!
3 ކޮންމެ ރަކްޢަތެއްގައިވެސް ސޫރަތުލްފާތިޙާކިޔަވާއިރު އެއީ ތިމާ އާއި ﷲ ތައާލާ އާއި ދެމެދުގައި ކުރެވޭ ސީދާ މުޢާމަލާތެއްކަން ޤަބޫލުކޮށްގެން ވީހައި ފުރިހަމައަށް ސޫރަތް ކިޔަވާށެވެ! އަދި ތިމާ އާޔަތްތައް ކިޔެވުމުން ﷲ ތަޢާލާ ވަގުތުން ބަސްވަޙީކުރައްވަވާކަން ވެސް ހިތްމައްޗަށް ގެންނާށެވެ!
4 ވީވަރަކުން ސަޖިދަ ދިގުކޮށް ތިމާ ބޭނުންވާ ކަންކަމަށް ސަޖިދައިގައި ދުޢާކުރާށެވެ! އެކަމުގެ ސަބަބުން ސަޖިދަކުރަން ޝައުޤުވެރިކަން އިތުރުވެގެންދާނެއެވެ.
5 ނަމާދުގައި ކިޔާ ތަކެއްޗާއި ޢާންމުކޮށް ކިޔަވާ ސޫރަތްތަކުގެ މާނަދަސްކުރާށެވެ! ކިޔާތަކެތީގެ މާނަ އެނގި ހިތްމައްޗަށް ގެނައުމަކީ ނަމާދަށްދެވޭ ސަމާލުކަން އިތުރުވެގެންދާނެ ކަމެކެވެ. އަދި ތިމާ އާއި ނަމާދާއި ދެމެދަށް ވަންނަން ޝައިޠޯނާއަށް ހުރަސްއެޅިގެންދާނެ ކަމެކެވެ.
6 ޚުޝޫޢަތްތެރިކަމާއިއެކު ނަމާދުކުރުމުގެ ކުޅަދާނަކަން ދެއްވެވުން އެދިގެންނާއި ހިތުގައި ނަމާދުކުރުމަށް ލޯބި އިތުރުކުރައްވަވައި ދެއްވެވުން އެދި ދުޢާކުރަންވާނެއެވެ.
މިކަންކަމުގައި ހިފަހައްޓައި ޢަމަލުކޮށްފިނަމަ ނަމާދުކުރުމަށް ހިތުގައި ލޯބިއިތުރުވެގެންދާނެއެވެ. އަދި ޚުޝޫޢަތްތެރިކަމާއިއެކު ނަމާދުކުރަންވެސް މަގުފަހިވެގެންދާނެއެވެ. އިން ޝާ ﷲ
- ޝައިޚް ސުލައިމާން ހާނީގެ ދަރުސަކުން
