ގިނަ އަދަދެއްގެ މައިންބަފައިން ދަރިންނަށް އަގުބޮޑު ކުޅޭތަކެތި ހޯދައިދެއެވެ. ނަމަވެސް ދަރިންނާއިއެކު ކުޅިވަރު ކުޅެ ދަރިންނަށް އުފާވެރިކަން ހޯދައިދޭން މަޑުކޮށްލާ މައިންބަފައިންނާއި ބެލެނިވެރިން ދަނީ މަދުވަމުންނެވެ.
ކުޅޭނެ ތަކެތި ކުދިންނަށް ބޭނުންވެއެވެ. އުމުރާއި ގުޅޭގޮތަށް ކުޅޭނެތަކެތި ދިނުމަކީ ކުދިންގެ ވިސްނުން ތޫނުވެ ރަނގަޅު ކަންކަންވެސް ކުދިންނަށް ދަސްވާކަމެކެވެ. އެހެންކަމާއިއެކުވެސް އެންމެ މުހިންމީ ކުދިންނާއިއެކު ކުޅިވަރުކުޅެލަން ވަގުތު ހޭދަކުރުމެވެ.
އެހެންކަމުން ޢިލްމުވެރިން ވިދާޅުވަނީ ކުދިންނަށް ދެވޭކުޅޭތަކެތީގެ ފައިދާ އެކުދިންނަށްކުރާނީ އެކުދިންނާއިއެކު ވަގުތު ހޭދަކޮށް ކުޅިވަރުކުޅުމުގައި ކުދިންނާއި ބައިވެރިވުމުން ކަމަށެވެ. ކުދިންނާއި ބައިވެރިވެ ކުޅޭނެ ވަގުތު ނުދެވޭނަމަ ދެވޭ އަގުބޮޑު ކުޅޭތަކެތިން އެކުދިންނަށް ކުރަންވާ ފައިދާ ނުކުރާނެ ކަމަށެވެ.
އަހަރެންނަށް އެނގޭކަމަކީ ރަސޫލް ﷺ ކުޑަކުދިންނާއި ބައްދަލުވެވަޑައިގަތުމުން ހިނިތުންވެވަޑައިގަންނަވާކަމެވެ. އެކުދިންނާއި ސަލާމްކުރައްވަވާ ކަމެވެ. އަދި އެކުދިން ކުޅެއުޅޭ ކުޅިވަރުތަކުގައިވެސް ބައިވެރިވެވަޑައިގެންނެވިކަމެވެ. އަދި ކުޑަކުދިން ހޯއްދަވައިގެންވެސް ކުދިންނާއިއެކު ކުޅިވަރުކުޅުއްވަވައި ހެއްދެވިކަން ޙަދީޘްފުޅުތަކުން އެނގެން އެބައޮތްކަމެވެ.
ވީމާ މިކަންކަމަކީ ސުންނަތުގެތެރެއިން ހުރި ކަންކަންކަމެވެ. އެކަންކަން ކުރުމުން ޘަވާބު ދެއްވަވާނެ ކަމެވެ.
ބައެއް މުސްލިމުންގެ ޙާލަތު މިއަދުހުރިގޮތުން ކުޑަކުދިންނާއި ބައްދަލުވުމުން ހިނިތުންވުމާއި ސަލާމްކުރުން ފަދަ ކަންކަމަކީ ކުރެވޭ ކަންކަމެއް ނޫނެވެ. އެކަން ޢާންމުވެފައިވާވަރަކީ ކުޑަކުދިންގެ ޙައްޤުތައް މީސްތަކުންނަށް ކިޔައިދީ އެކަމަށް ވަކާލާތުކުރާ ގިނަބައަކުވެސް އެކަންކަމަށް ފަސްޖެހެއެވެ. ސަބަބު އެނގޭނީ އެކަން އެގޮތަށްކުރާ ބައަކަށެވެ!
ދަރިންނާއިވެސް އަދި އެހެންކުދިންނާއިވެސް ބައްދަލުވުމުން ފުރަތަމަކަމަކަށް ސަލާމްކުރާށެވެ! އެއިރުން އެކުދިންނަށްވެސް އެކަންކުރަން ދަސްވާނެއެވެ. ސަލާމްކުރުމަކީ މުސްލިމުން ކުރަންޖެހޭ ކަމެއްކަން ހަމައެކަނި ފިލާވަޅުތަކުން ދަސްކޮށްދިނުމަކުން ނުފުދޭނެއެވެ. އެކަން އަމަލުނަކުރަންވާނެއެވެ. ކުދިންނަށް އެންމެ ފައިދާކުރާނެ ފިލާވަޅަކީ އަމަލުން ދަސްކޮށްދެވޭ ކަންކަމެވެ. ފޮތުން ދަސްކޮށްދެވޭ ފިލާވަޅުތަކަށްވުރެ ޢަމަލުން ދަސްކޮށްދެވޭ ފިލާވަޅުތަކުގެ ފައިދާ މާބޮޑުކަން އެއީ ތަޖުރިބާއިން އެނގެމުން އަންނަކަންކަމެވެ.
ވީމާ މައިންބަފައިންނާއި ބެލެނިވެރިން އަދި އެންމެންވެސް މިކަންކަމަށް ސަމާލުކަންދޭށެވެ! މިޖުތަމައުން އެކަންކަމުގެ ފައިދާ ފެންނާނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
