އުފާވެރި ޙާލަތާއި ދަތި އުނދަގޫ ޙާލަތު މިންވަރު ކުރައްވަވަނީވެސް ﷲ ތަޢާލާކަން އަހަރެމެން މިތިބީ ޤަބޫލުކޮށްގެންނެވެ. އެއްވެސް މީހަކަށް އަހަރެމެންނަށް ދެރައެއް ނުދެވޭނެކަމާއި ﷲ ތައާލާ މާކުރިންސުރެ ލިޔުއްވަވާފައި ނުވާ ކަމެއް ކުރިމަތިނުވާނެކަން ވެސް މިތިބީ ޤަބޫލުކޮށްގެންނެވެ.
ވީމާ ދަތި އުނދަގޫ ނުވަތަ ހިތްދަތި ޙާލަތެއް ކުރިމަތިވިނަމަވެސް އޮތީ ﷲ ތަޢާލާއަށް ދުޢާކުރުމެވެ. އެގޮތުން މި ބުނެދެނީ ކުރިމަތިވާ ދަތި އުނދަގޫ ކަންކަން ފަސޭހަކުރައްވަވައި ދެއްވެވުން އެދި ކުރަން ކީރިތި ޤުރްއާނުގައި ބަޔާންވެގެންވާ ދުޢާއެކެވެ. ދުޢާއަކީ ކުރު ދުޢާއެކެވެ. ނަމަވެސް އެކުލެވިގެންވާ މާނަ ކިތަންމެހައިވެސް ފުޅައުވެގެންވެއެވެ.
﴿رَبَّنَا آتِنَا مِن لَّدُنكَ رَحْمَةً وَهَيِّئْ لَنَا مِنْ أَمْرِنَا رَشَدًا﴾ [سورة الكهف ۱٠]
މާނައީ: "އަޅަމެންގެ ވެރިރައްބެވެ. އިބައިލާހުގެ ހަޟުރަތުން އަޅަމެންނަށް ރަހުމަތެއް ދެއްވާނދޭވެ. އަދި އަޅަމެންގެ ކަންތައް ފަސޭހަކޮށްދެއްވާނދޭވެ."
- އިސްލާމީ ތިލަފަތުގެ ދަރުސަކުން
