"ތިމަންމެން ފިލާވަޅުތައް ދަސްކުރަމުއެވެ. ޛިކްރުތަކާއި ދުޢާތައް ވެސް ދަސްކުރަމުއެވެ. ދަރުސްތައްވެސް އަޑުއަހަމުއެވެ. ނަމަވެސް އިސާހިތަކު ހަނދާންނެތިގެންދެއެވެ. ޙައްލަކީ ކިބައިހެއްޔެވެ؟" މިއީ ވަރަށް ގިނަ ބައަކުކުރާ ސުވާލެކެވެ.
ހެޔޮ ޢަމަލުތައް ކުރަން ހަނދާންނެތޭނަމަ އެއީ ޝައިޠޯނާގެ ކިބައިން އަންނަކަމެކެވެ. "..އަދި އެމަހުގެ މަތިން ތިމަން ހަނދާންކުރުން ނެތިކޮށްލީ ޝައިޠޯނާ ފިޔަވައި އެހެން އެއްޗެއް ނޫނެވެ..." (އަލްކަހްފި: 63)
ހެޔޮ ޢަމަލުތައް ކުރަން ހަނދާންކުރަން މިޖެހެނީ ޝައިޠޯނާ އާއި ދެކޮޅަށެވެ. ހަނދާންކުރަން މަސައްކަތްކުރާއިރަށް އެކަން ހަނދާން ނައްތައިލަން ޝައިޠޯނާ މަސައްކަތްކުރާނެއެވެ. ވީމާ ހަނދާންކުރުމުގެ ބައި ވީހައި ތާޒާކޮށް ބަހައްޓަން މަސައްކަތްކުރަންޖެހޭނެއެވެ.
އެކަމަށްޓަކައި ކުރަން އޮތް އެންމެ މުހިންމު ކަމަކީ ބޭކާރު ކަންކަމަށް ނުވިސްނުމެވެ. ތިމާ އާއި ގުޅުން ނެތްކަމަށް ނުވިސްނުމެވެ. ބޭކާރު ވާހަކަދެއްކުން މަދުކުރުމެވެ. ސިކުނޑީގައި އެފަދަ ކަންކަން ހަރުލައި ނުހުންނާނީ އެއިރުންނެވެ.
ތިމާއާއި ނުބެހޭ ކަންކަމާއި ނުބެހުމަކީ އީމާންކަމުގެ ތެރެއިންވާކަމެއްކަމަށް ޙަދީޘްފުޅުގައި އޮތީ އެސަބަބަށްޓަކައެވެ. ނަމަވެސް މިއަދުގެ ޙާލަތަށްބަލައިފިނަމަ ތިމާގެ އަމިއްލަ ކަންކަމަސްވުރެ ބޮޑަށް ކަންބޮޑުވެވިގެން އުޅެނީ އެހެން މީހުންގެ ކަންކަމާއިމެދުގައެވެ. ގިނައިން ދެކެވެނީ އެހެން މީހުންގެ ކަންކަމުގެ ވާހަކަތަކެވެ.
"..ތިއަބައިމީހުން ﷲ އަށް ތަޤްވާވެރިވާށެވެ! ﷲ، ތިއަބައިމީހުންނަށް އުނގަންނަވައިދެއްވަވާނެތެވެ. ﷲ އީ، ކޮންމެ ކަމެއް މޮޅަށް ދެނެވޮޑިގެންވާ ރަސްކަލާނގެއެވެ." (އަލްބަޤަރާ: 282)
ނިންމާލަމުންވެސް ބުނަމެވެ. ހެޔޮ ކަންކަން ހަނދާންނެތޭނަމަ ފާފަކުރުން ހުއްޓައިލާށެވެ! ތަޤްވާވެރިކަން އިތުރުކުރާށެވެ! ޝައިޠޯނާއާއި ދުރުހެލިވާށެވެ! ތިބާގެ ހިތާއި ވައިވެސް ނޭޅެވޭހިސާބުދުރަށް ޝައިޠޯނާ ފޮނުވައިލާށެވެ! ދީނުގެ ކަންކަންވެސް އަދި ދުނިޔަވީ ޢިލްމުވެސް ޙާޞިލުކުރެވޭނީ އެއިރުންނެވެ.
- މުފްތީ މެންކުގެ ދަރުސަކުން
