ޙަދީޘްފުޅުގައި އޮތީ "ﷲ ތައާލާގެ ޙަޟްރަތުގައި އެންމެ ލޮބުވެތިކަންބޮޑު (އެންމެ ބޮޑަށް ރުހިވޮޑިގަންނަވާ މީހުންނަކީ މީސްތަކުންނަށް އެންމެ ފައިދާކުރާނެ ކަންކަންކުރާ މީހުން" ކަމަށެވެ.
މިވަގުތު ރާއްޖޭގައި އެންމެ ބޮޑަށް ބޭނުންވެފައި އޮތް އެއްކަމަކީ ކޮވިޑް ބަލިން ސަލާމަތްވުމެވެ. ކޮވިޑްބަލިން ސަލާމަތްވެތިބުމަށާއި ބަލިފެތުރުން ކޮންޓްރޯލްކުރަން ރައްޔިތުންނަށް ކުރެވެން އޮތްކަމަކީ ﷲ ތަޢާލާގެ ޙަޟްރަތުން ވާގިއެދި، އެކަމަށް ދުޢާކުރަމުން ކޮވިޑް ފެތުރެެން މެދުވެރިވާ ސަބަބުތަކުގައި ހިފަހައްޓައިގެން ތިމާ އާއި އެހެންމީހުންގެ ސަލާމަތަށްޓަކައި މަސައްކަތްކުރުމެވެ. ބަލިފެތުރިދާނެ އެއްވެސް ކަމެއް ތިމާ ނުކުރުމެވެ. އަދި އެފަދަ ކަމެއް ނުކުރަން އެހެން މީހުންނަށްވެސް ހިތްވަރުދީ ހޭލުންތެރިކުރުވުމެވެ.
މިފަދައިން ޢަމަލުކޮށްފި މީހަކަށް ޢަމަލުއެކުރެވެނީ މިޙަދީޘްފުޅަށްކަމަށް އުންމީދުކުރެވިދާނެއެވެ. އަދި އެއީ ﷲ ތަޢާލާ އެންމެ ބޮޑަށް ރުހިވޮޑިގަންނަވާ އަޅުންގެތެރޭގައި ހިމެނުމަށް ކުރެވޭ މަސައްކަތަކަށްވުމަށް އުންމީދުވެސް ކުރެވިދާނެއެވެ.
ދެން އޮތީ ކޮވިޑުން ސަލާމަތްވުމަށްވެސް ހަމަ ކޮންމެ މުސްލިމަކަށްވެސް ކުރަން އޮތް އެންމެ ޔަޤީން ޢަމަލެވެ.
ﷲ ތައާލާގެ ވަހީބަސްފުޅު:
"އަދި ތިއަބައިމީހުންގެވެރި ރަސްކަލާނގެ ޙަޟްރަތުން ފާފަފުއްސެވުން ތިއަބައިމީހުން އެދޭށެވެ! އަދި އެކަލާނގެއަށް ތިއަބައިމީހުން ތައުބާވާށެވެ! އެއިރުން ކަނޑައެޅިފައިވާ އަޖަލު ހަމަވެއްޖައުމަސްދާންދެން، ރަނގަޅު ދިރިއުޅުމެއްގައި އެކަލާނގެ ތިއަބައިމީހުން ލަހައްޓަވާނެތެވެ!.." (ހޫދި: 3)
ރަސޫލް ﷺ ގެ ޙަދީޘްފުޅުގައިވަނީ ތައުބާވުންމަތީގައި ދެމިހުންނަ މީހަކަށް އެމީހަކަށް ކުރިމަތިވެފައިވާ މުޞީބާތުން، ހިތްދަތިކަމާއި ދައިތިއުނދަގުލުން ސަލާމަތްވެވޭނެ މަގު އޭނާއަށް ހީވެސް ނުކުރެވޭފަދަ ގޮތަކުން ދައްކަވާނެކަމަށެވެ.
ކޮންމެ މުޞީބާތަކުން ސަލާމަތްވުމަށްވެސް ކުރަން އޮތް އެންމެ މުހިންމު ކަމަކީ ތިމާ ތައުބާވެ ފާފަފުއްސަވައިދެއްވެވުން އެދި ދުޢާކުރުން (أستغفر الله ކިޔުން ގިނަކުރުން) ކަން އިބްން ޢައްބާސް އާއި އެހެންވެސް ޞަޙާބީންގެ ބަސްފުޅުތަކުން ވަރަށް ސާފުކޮށް އެނގެން އެބައޮތެވެ.
އިބްން ޢައްބާސް ވިދާޅުވެފައިވަނީ ތިމާއަށް ދަތިވެއްޖެ، މުޞީބާތަކަށްވެއްޖެ ކޮންމެ ކަމަކުން އަރައިގަތުމަށްވެސް أستغفر الله ކިޔުން ގިނަކުރުމަށްވުރެ ފައިދާކުރާނެ ކަމެއް އެނގިވަޑައިނުގަންނަވާ ކަމަށެވެ.
ވުޟޫކުރުން ގިނަކުރާށެވެ! އަތްދޮވުން ގިނަކޮށް މާސްކްވެސް އަޅާށެވެ! ދިރިއުޅުމުގައި ގައިދުރުކަން ބެހެއްޓުމަށްވެސް ސަމާލުކަންދޭށެވެ! މިފަދަ ސަބަބުތަކުގައި ހިފެހެއްޓުމާއިއެކު ތައުބާވެ أستغفر الله ކިޔުން ގިނަކުރާށެވެ! ކޮވިޑުންވެސް އެހެން މުޞީބާތްތަކުންވެސް ސަލާމަތްކުރައްވަވާނެތެވެ. އިން ޝާ ﷲ
- އަލަފް
