އިންސާނުން ކަމުގައިވީތީ ފާފަކުރެވުން އެއްފަރާތުގައި ބާއްވާށެވެ! އަހަރެން ފާހަގަކޮށްލަން ބޭނުންވަނީ ޤަޞްދުގައި ކުރެވޭ އެންމެ ބޮޑުފާފައެވެ. އެއީ ކޮން ފާފައެއްކަމާއިމެދު ވިސްނައިލަނީވެސް މަދުމީހެކެވެ. އެހެނަސް އަހަރެން ވަރަށް ބޮޑަށް ވިސްނައިފީމެވެ.
އަހަރެންގެ ވިސްނުމަށް އައީ ޤަޞްދުގައި ކުރެވޭ އެންމެ ބޮޑުފާފައަކީ މަރާއިމެދު ޣާފިލުވުން ކަމެވެ. މަރުވާނެކަން ކޮންމެ މީހަކަށްވެސް ޔަޤީންކުރެވެއެވެ. އެކަންޔަޤީންކުރެވޭއިރު މަރަށް ތައްޔާރުނުވެ ހުންނަ ކޮންމެ ހިނދުކޮޅަކީ ކުރެވޭ އެންމެ ބޮޑުފާފަކަމުގައި ނޫނީ ނުވާނެއެވެ.
ސަބަބަކީ މަރަށް ތައްޔާރުވުމަކީ ހުރިހާ ފާފަތަކުން ސަލާމަތްވާން މަސައްކަތްކުރުން ކަމުގައިވާތީއެވެ. މަރަށް ތައްޔާރުވާން މަސައްކަތްކުރާ މީހާ މަސައްކަތްކުރާނީ އެންމެ ފާފައެއްވެސް ނުކުރުމަށެވެ. ވީހައި ގިނަ ހެޔޮ ޢަމަލުކުރުމަށެވެ.
ލޮބުވެތި އަޚުންނާއި އުޚުތުންނޭވެ! މަރުވާނެއެވެ. މަރުވުމުން މަސްގަނޑުވަޅުލެވޭނެއެވެ. އޮންނަންޖެހޭނީ އެކަނިމާއެކަންޏެވެ. ބިންގަނޑު އެމަސްގަނޑު ފިއްތައި ޗިސްޗިސްކޮށްލާނީ ކިތައްފަހަރުކަމެއް ނުއެނގޭނެއެވެ. މަލާއިކަތުންވަޑައިގެން ސުވާލުކުރައްވަވާނެތެވެ. އަދި އެހިށާބުން އެމީހާގެ ކައްވަޅަކީ ސުވަރުގޭގެ ބަގީޗާއަކަށް ނުވަތަ ނަކައިގެ ވަޅުގަނޑަކަށް ބަދަލުވެގެންދާނެތެވެ. މިކަންކަންވެސް އެންމެންނަށްވެސް އެނގޭނެއެވެ.
ހިތާމައަކީ ދުނިޔޭގައި ދުވަސްތައް ހޭދަކުރަމުންގެންދާއިރު މިބޮޑު ފާފަކުރެވުންމަތީގައި ދެމިތިބެވޭކަމެވެ.މަރުވުމަށް ތައްޔާރުވާން ކުރަންޖެހޭ ކަންކަން ނުކުރެވޭކަމެވެ.
ނަމާދުތައް އަޅައި ﷲ ތަޢާލާއަށް އަޅުކަންނުކޮށް އެބައަކާއިއެކު ތިބާ ވަގުތުތައް ހޭދަކުރި އެއްވެސް މީހެއްގެކިބައިން ތިބާ މަރުވުމަށްފަހު ކުރާނެ އެއްވެސް ފައިދާއެއް ނެތެވެ. އެފަދަ މީހުންނަކީ އެންމެކުޑަމިނުން ހެޔޮދުޢާއެއް ކޮށްލެވޭނެ ޙާލަތުގައިވެސް ތިބޭނެ ބައެއް ނޫނެވެ. ވީމާ މަރަށް ބިރުވެތިވެ މަރުވުމަށް ތައްޔާރުނުވާ މީހުންނަކީ އެކުވެރިންކަމުގައި ހަދައި އެމީހުންނާއިއެކު ވަގުތުތައް ބޭކާރުކޮށްނުލާށެވެ! ކޮންމެ ދުވަހަކީވެސް ވީހައި ފުރިހަމައަށް މަރަށް ތައްޔާރުވާ ދުވަހަކަށްހަދާށެވެ!
މިއީ އެންމެނެނަށް އަހުރެންކުރާ އާދޭހެކެވެ! އިލްތިމާސެކެވެ!
- ފާޠިމާ މައުމޫން
