ތަޤްވާވެރިކަން ލިބިގަންނަން މަސައްކަތްކޮށްފިނަމަ ކޮންމެ މީހަކަށްވެސް އެނިޢްމަތް ދެއްވަވައެވެ. ގިނަބައަކަށް އުނދަގޫކަމަކަށްވެފައި އޮންނަނީ އެ ނިޢްމަތް ދެމެހެއްޓުމެވެ. އެހެންކަމުން މިބަޔާންކުރަނީ ތަޤްވާވެރިކަމުގައި ސާބިތުކަމާއިއެކު ދެމިހުރުމަށް ފަސޭހައިން ކުރެވިދާނެ 3 ކަމެކެވެ.
ފުރަތަމަކަމަކީ ކީރިތި ޤުރްއާނާއި ގުޅުން ބަދަހިކުރުމެވެ. އެއީ ހަމައެކަނި ޤުރްއާން ކިޔެވުން ކަމުގައި ނުހަދާށެވެ. މާނަވެސް ކިޔާށެވެ. ޚާއްޞަކޮށް ތަފްސީރުކިޔާށެވެ. އެއިރުން ކަންކަން އޮޅުންފިލާވަރު މާބޮޑުވާނެއެވެ. އަދި އެވާހަކަތައް ކިޔަން ފެށުމުން ކިޔަން ޝައުޤުވެރިކަންވެސް އިތުރުވާނެއެވެ އިން ޝާ ﷲ
ދެވަނަކަމަކަށް ކޮންމެ ދުވަހަކުވެސް ދެ މީހަކާއި ބައްދަލުކޮށް ހެޔޮކޮށްހިތާށެވެ! ހިނިތުންވުމާއިއެކު ބައްދަލުކުރާށެވެ. އަދި ބައްދަލުވުމުން އޯގާތެރިކަމާއިއެކު ޢަމަލުކުރާށެވެ! ތަނަވަސްކަން ހުރިނަމަ އެހީތެރިވެދޭށެވެ. އެހީތެރިވެދެވެން ނެތްނަމަ ހެޔޮ ނަޞޭޙަތްދޭށެވެ! ﷲ ތަޢާލާ އާއި އެކަލާނގެ ދީނަށް ނަޞްރުދެވޭނެ ކޮންމެވެސް ވާހަކައެއް ދައްކާށެވެ.
އެއިރުން ތިބާވާނީ ﷲ ތަޢާލާގެ ދީނަށް ނަޞްރުދޭން މަސައްކަތްކުރާ ވަރުގަދަ ފަހުލަވާނަކުކަމުގައެވެ.
ތިންވަނަކަމަކަށް ޢާއިލީ ގުޅުމާއި ރަޙިމުގެ ގުޅުން ދަމަހައްޓައި އިތުރުކުރަން މަސައްކަތްކުރާށެވެ. ޢާއިލީ ގުޅުން މާނަމިކުރަނީ ދެމަފިރިންގެ ގުޅުމަށެވެ. ދަރިންނާއި ބާއްވަންޖެހޭ ގުޅުމަށެވެ. ރަޙިމުގެ ގުޅުން ކަމުގައި މިބުނަނީ މައިންބަފައިންނާއި އަޚުންނާއި އުޚުތުންގެ މެދުގައި އޮންނަންޖެހޭ ގުޅުމަށެވެ.
މިކަންކަން ކުރަމުން ފަރުޟުއަދާކޮށް، ސުންނަތުގައި ސާބިތުވެ ހުންނަ މީހާގެ އީމާންކަން ދާނީ ވަރުގަދަވަމުންނެވެ. ތަޤްވާވެރިކަން ދުވަހެއް ދުވަހަކަށް ދާނީ އިތުރުވަމުންނެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
