ދިރިއުޅުމަކީ ރޭހެކެވެ. އެރޭހުގައި ވެއްޓޭފަހަރުވެސް އަންނާނެއެވެ. ވެއްޓިއްޖެނަމަ އޮތީ ވެއްޓުނުތަނުގައި އޮތުމެއް ނޫނެވެ. ހިތްވަރުކޮށްފައި ތެދުވެ ކުރިއަށްވުރެ ބާރަށް ދުވަން މަސައްކަތްކުރުމެވެ.
ތަޤްވާވެރިކަމުގައި ކުރިއަށްދާން މަސައްކަތްކުރާއިރުވެސް ތަފާތު މައްސަލތައް ކުރިމަތިވެ ފަސްޖެހެވޭތަނާއި ހުއްޓޭތަންވެސް އައިސްފާނެއެވެ. މިބުނި ވެއްޓުމަކީ އެއީއެވެ. އެފަދަ ޙާލަތެއް މެދުވެރިވެއްޖެނަމަ ފުރަތަމަކަމަކަށް އެކަން މެދުވެރިވި ސަބަބު ދެނެގަންނާށެވެ! އިޞްލާޙްކުރަންޖެހޭ ކަންކަން އިޞްލާޙުކުރާށެވެ! އަދި ކުރިއަށްވުރެ ބާރަށް ކުރިއަށްދާން މަސައްކަތްކުރާށެވެ! ތަޤްވާވެރިކަމުގައި ސާބިތުވެވޭނީ އެއިރުންނެވެ.
ދިރިއުޅުމުގެ ކަންކަމަށް އަންނަ ބަދަލުތަކާއި އަދި ކުރާ މަސައްކަތަށް އަންނަ ބަދަލުތަކުންވެސް މިބުނިފަދަ ޙާލަތުތައް މެދުވެރިވެދާނެއެވެ. މަސައްކަތްކުރަންވީ ކޮންމެ ޙާލަތެއް މެދުވެރިވި ނަމަވެސް އަޅުކަންކުރުމުގައި ފަސްނުޖެހި ކުރިއަށް ދިއުމަށެވެ. މިއަދަށްވުރެ ގިނައިން މާދަމާ އަޅުކަންކުރަން މަސައްކަތްކުރުމަށެވެ.
ބޭނުންވާ ކަންކަން ޙާޞިލުކުރަން މަސައްކަތްކުރަންވެގެން އަޅުކަމުގައި ފަރުވާކުޑަނުކުރާށެވެ! ކޮންމެ ކަމެއްވެސް ޙާޞިލުކުރެވޭނީ ﷲ ތަޢާލާ އެކަމެއް ހިންމަވައިދެއްވެވުމުންކަން ޔަޤީންކޮށްގެން ދިރިއުޅުމުގެ ކަންކަން ކުރިއަށްގެންދާ މީހާއަށް އަބަދުވެސް ދާނީ ކުރިއެރުން ލިބި ރަނގަޅު ގޮތްތައް މެދުވެރިވަމުންނެވެ. އިން ޝާ ﷲ
- މުފްތީ މެންކުގެ ދަރުސަކުން
