ދުނިޔޭގެ ގިނަބައަކަށް މާލީ ދަތިކަން ކުރިމަތިވަމުންދާ މިޙާލަތުގައި ތިބާއަށް އެފަދަ ކަމެއް ކުރިމަތިވެއްޖެނަމަ ފުރަތަމަކަމަކަށް ދިރިއުޅުމުގެ ފެންވަރުދަށްކުރާށެވެ! އެކަމަށް ލަދުނުގަންނާށެވެ! އެގޮތަށް އެކަން ނުކޮށްފިނަމަ ކުރިމަތިވާ ކަންކަމުން ގަންނަންޖެހޭ ލަދު މާބޮޑުވާނެއެވެ!
ނުލިބޭވަރަށް ޚަރަދުކުރަން މަސައްކަތްކުރާނަމަ ޖެހޭނީ މީހުންނަށް އާދޭސްކުރާށެވެ! އެއިރުން ޖެހޭނީ އޭނާއަށް އަޅުވެތިވާށެވެ! ދެންއޮތީ ދަރަނިވެރިވުމެވެ. ދަރަނި އަދާނުކުރެވުމަކީ ވެސް އަޅުވެތިވާންޖެހޭ ކަމެކެވެ. އަދި އިންތިހާއަށް ލަދުގަންނަންވެސް ޖެހިދާނެ ކަމެކެވެ.
ކުރިން ކައިއުޅުނު ފެންވަރުގައި ނުކައި ތިބުމަކުން ލިބޭނެ އެއްވެސް ގެއްލުމެއް ނެތެވެ. އަދި ކުރިނަ ކައިއުޅުނު މިންވަރަށް ނުކެއުމަކުންވެސް ގެއްލުމަކަށްނުވާނެއެވެ. ކުރަންޖެހޭނެކަމަކީ މިންވަރަށް އީމާންވާން ހިތް ހާނުވައިލުމެވެ.
ދަތިޙާލަތެއް މެދުވެރިވުމުން ދަރިންނަށް ވެސް އެކަން ހިއްޞާކުރާށެވެ! އެކަމަށް ލަދުނުގަންނާށެވެ! ދެރަވެސް ނުވާށެވެ! ދަރިންނާއި ކަންކަން ހިއްޞާާކުރުމުން އެކުދިންވެސް ތިބޭނީ ހަމަ ހަމަޖެހިލައިގެންނެވެ. އެންމެ މުހިންމުކަމަކީ ދަތިދުވަހެއް އަތުވެދާނެކަމަށް ބަލައި ދަރިން އަބަދުވެސް އެގޮތުގައި ތަރުބިއްޔަތުކުރުމެވެ.
ކަމަކަށް ބޭނުންވުމުން ތިބާއަށް އޮތީ ﷲ ތަޢާލާގެ މަގުގައި ސާބިތުވެހުރެ އެކަމެއް ޙާޞިލުކުރަން މަސައްކަތްކުރުމެވެ. ތިބާގެ އީމާންކަމާއި ކެތްތެރިކަމާއި އިޚްލާޞްތެރިކަން އިމްތިޙާންކުރައްވަވާނެތެވެ. އަވަސްއަރުވާލައި ތެޅިފޮޅިނުގަނެ ކެތްތެރިވެލާށެވެ! ކާމިޔާބުވާނެއެވެ!
ލިބޭ މިންވަރަށް ފުދިގެން ދިރިއުޅެން މަސައްކަތްކުރާ މީހުންނަށް ރިޒްޤް ތަނަވަސްކޮށްދެއްވަވާނެތެވެ! އިން ޝާ ﷲ
- މުފްތީ މެންކުގެ ދަރުސަކުން
