މިރޭވެސް މިފަށަނީ ވަރަށް ޢިބްރަތްތެރި ހާދިސާއެއްގެވާހަކައިންނެވެ. ދެމަފިރިން އެކުގައި ދަމުނަމާދުކޮށް ދުޢާކުރުމުން ކުރާ ފައިދާ އެނގިގެންދާ ވާހަކައަކުންނެވެ. މިފަދަ ވާހަކަތައް ކިޔައިދިނުމުން ހަމައެކަނި އަޑުއަހަންވީއެއް ނޫނެވެ. ފައިދާކުރާނީ ޢިބްރަތްހާޞިލުކޮށް ޢަމަލުކރުމުންނެވެ.
އެދެމަފިރިންނަށް ލިބިފައިވަނީ ހަމައެންމެ ދަރިއެކެވެ. އުމުރުން 10 އަހަރުގައި ކެންސަރު ޖެހުނީއެވެ. ބައްޔަށް ފަރުވާކުރަމުން ގޮސް އަތްމަތި ހުސްވީއެވެ. އަތްމަތި ހުސްވުމުން ގެދޮރު މޯގޭޖްކޮށްފައި ލޯނުވެސް ނަގަންޖެހުނެވެ. ދަރިފުޅުގެ ފުރާނަ ސަލާމަތްކުރަން ބޭނުންވާތީ އެކަންވެސް ކުރީއެވެ.
ކުރެވުނު މަސައްކަތުން ދަރިފުޅު ބަލިން ސަލާމަތްވިއެވެ. ނަމަވެސް ލޯނެއް ނުދެއްކުނެވެ. ގެދޮރު ވިއްކަން ޖެހޭ ޙާލަތަށް ކަންކަން ދިއައެވެ.
ދަރަނި އަދާކުރެވޭތޯ ދެމަފިރިންނަށް ކުރެވުނުހައި މަސައްކަތްތަކެއް ކުރިއެވެ. ނަމަވެސް ކަންކަން ދިއައީ ފޭލްވަމުންނެވެ. އެހީތެރިކަން ލިބޭނެ ކަމަށް އުންމީދުކުރި އެއްވެސް މީހެއްގެ އަތުން އެއްވެސް އެހީތެރިކަމެއް ނުލިބުނެވެ. ނަމަވެސް ދެމަފިރިންވެސް ﷲ ތަޢާލާގެ ޙަޟްރަތުން އުންމީދު ކަނޑައެއް ނުލައެވެ. ގެންދިއައީ ކެނޑިނޭޅި ދުޢާކުރަމުންނެވެ! ރޭގަނޑުގެ ދަމުނަމާދަށްފަހު ފަތިސްވަންދެން ދެމަފިރިން ތިބެނީ ހޭލައި ދުޢާކުރުންމަތީގައެވެ.
އެންމެފަހުން ލިބުނު ކޯޓުގެ އެންމެ ފަހު ޗިޓަށް ދެމަފިރިން ކޯޓަށް ދިއައީ ގެ ވަގުތުން ނީލަން ކިޔައިފާނެ ކަމަށް ބަލައި އެދުވަހުން ދުވަހަށް ގެއިން ނުކުންނަން ޖެހުނު ނަމަވެސް ނުކުމެވޭ ގޮތަށް ތައްޔާރުވެސް ވެގެންނެވެ.
ކޯޓަށް ވަންނަނިކޮށް މީހަކު ގޮވައިލުމުން ބަލައިލިއިރު ފިރިމީހާ އާއިއެކު ކޮލެޖުގައި އުޅުނު ވަރަށް އެކުވެރި ދަރިވަރެކެވެ. ޒަމާންތަކަކަށްފަހު ބައްދަލުވީއެވެ. ހާލު އަހައިލުމުން ޖެހިގެން އުޅޭ މުޞީބާތުގެ ވާހަކަ ކިޔައިދިނެވެ. އަދި އޭނާގެ އަތުގައި އޮތް ޗިޓް ދައްކައިލާފަ ހެޔޮދުޢާކޮށްދިނުމަށް އެދުނެވެ.
އެކުވެރިޔާ ޗިޓަށް ބަލައިލުމަށްފަހު އެނބުރި އަންނާނެކަމަށް ބުނެފައި ދިއައީއެވެ.
ޝަރީއަތް ފެށުނުތަނާ ފެނުނީ ކުއްލިއަކަށް އެކުވެރިޔާާ އައިސް ކޯޓްރޫމަށް ވަންތަނެވެ. ޤާޟީގެ އިޒުނައާއިއެކު އޭނާ ވާހަކަ ދައްކަން ފެށިއެވެ. "ޢިއްޒަތްތެރި ފަނޑިޔާރުއެވެ! މިހިނގާ ޝަރީޢަތުގައި ދައުވާ ލިބޭ މީހާއަކީ އަޅުގަނޑާއިއެކު ކޮލެޖުގައި ކިޔަވަން އުޅުނު ވަރަށް ގާތް އެކުވެރިއެކެވެ. އޭނާގެ ދަރަނީގެ އަދަދު ވިދާޅުވާށެވެ! އެކުވެރިޔާ ދަރަނިން ސަލާމަތްކުރުމަށްޓަކައި އަޅުގަނޑު މިހުރީ ހަމަ މިވަގުތު އެ ދަރަނި ކޯޓަށް އަދާކޮށް ނިންމާށެވެ!"
މިހިރީ ހަމަ މިޒަމާނުގައި ހިނގަމުންދާ ކަންކަމެވެ. މީހެއްގެ ދުޢާ އިޖާބަ ކުރައްވަވާނީ ކޮން ގޮތަކުން ކޮން ވަގުތަކުކަން އަހަރެމެން އެކަކަށްވެސް ނުއެނގޭނެއެވެ. މަތިން އެކަމުގެ ވަގުތުޖެހުމާއިއެކު އެކަމެއް އޮންނާނީ ވެނިމިފައެވެ!
ލޮބުވެތި އަޚުންނާއި އުޚުތުންނޭވެ! ދިރިއުޅުމުގައި ކުރިމަތިވާ ދަތިތަކާއި ގުޅިގެން ދެމަފިރިން އެކުގައި ދަމުނަމާދުކޮށް ދުޢާކުރަން އަބަދުވެސް ނަޞޭޙަތްތެރިވަމުންމިދަނީ އެކަމުންކުރާނެ ފައިދާ ބޮޑުކަމުންނެވެ. ދިރިއުޅުމުގައި ކުރިމަތިވާ ކޮންމެ ކަމެއް ކާމިޔާބުކުރަންވެސް ދެމަފިރިން ގުޅިގެން ލޯބިން ދިރިއުޅެމުން މަސައްކަތްކުރާނަމަ އެކަމަށް ﷲ ތަޢާލާ ލޯބިވެވޮޑިގެންވެއެވެ. ވީމާ ކުރިމަތިވާ ކަންކަންވެސް ހިންމަވައިދެއްވަވާނެތެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
