ކޮންމެ ކަމަކާއި ޒަމާނާއި ގުޅުވުމަކީ އަހަރެން ޤަބޫލުކުރާކަމެއް ނޫނެވެ. އަހަރެން ޤަބޫލުކުރާ ގޮތުގައި ޖެހިގެން މިއުޅެނީ ޒަމާން ފަސްވުމުގެ މައްސަލައެއް ނޫނެވެ. މީސްތަކުންނަށް މާބޮޑަށް ފާސްޓްފޯވާޑުވެވުނީއެވެ. ކޮންމެ ކަމެއްވެސް ކުރަން ބޭނުންވަނީ އެންމެ ބާރުމިނުގައި އިންޓަރނެޓުން ކަންކަން ކުރެވޭ ސްޕީޑްގައެވެ. ﷲ ތަޢާލާގެ ޙަޟްރަތުން ކަންކަމަށް އެދެވެނީވެސް ހަމަ އެ ސްޕީޑްގައެވެ.
އެދޭ ކަމެއް ކިރިޔާވެސް ލަސްވެލައިފިނަމަ ޝަކުވާތައް ގިނަވެއެވެ. މިއީ ވަރަށް ބޮޑު ގޯހެކެވެ. އަހަރެމެންނަށް އޮތީ ބޭނުންވާ ކަންކަމުގައި އެދި ދެންނެވުމެވެ. ހިއްމަވައިދެއްވަވާނެ ވަގުތު އެއީ ﷲ ތަޢާލާއަށް ޚާއްޞަވެގެންވާ ކަމެކެވެ.
ބޭންކުގެ އެކައުންޓުގައި ހުންނަ ތިބާގެ އަމިއްލަ ފައިސާ ނަގަން ދިއަ ނަމަވެސް ބައެއް ފަހަރު އެތައް ގަޑިއިރެއް ވަންދެން ކިޔޫގައި މަޑުކުރަން ޖެހޭ ނޫން ހެއްޔެވެ؟ އެއީ ތިބާ ނަގަން ގޮސް ހުރީ ތިބާގެ އަމިއްލަ ފައިސާ ކަމުގައިވާއިރުވެސް މެއެވެ.
ވީއިރު ﷲ ތަޢާލާގެ ޙަޟްރަތުން ކަމަކަށް އެދި ދުޢާކުރާއިރަށް ވަގުތުން އެކަމެއް ހިންމަވައި ދެއްވެވުމަށް އެދެވޭނީ ވެސް ކިހިނަކުން ހެއްޔެވެ؟. ކެތްތެރިވާން ދަސްކުރާށެވެ! ﷲ ތަޢާލާ ވޮޑިގެންވަނީ ކެތްތެރިންނާއިއެކުގައިކަން ޔަޤީންކޮށްގެން ހުންނަ މީހާއަށް އަބަދުވެސް މެދުވެރިވާނީ ހެޔޮ ގޮތްތަކެވެ. އިން ޝާ ﷲ
- މުފްތީ މެންކުގެ ދަރުސަކުން
