ކޮވިޑްގެ މިޙާލަތާއި ގުޅިގެން މިސްކިތަށް ނަމާދަށް ނުދެވޭތީ މަސްޖިދު ސުންނަތް ނުކުރެވިގެން ގިނަބައަކު ކަންބޮޑުވެއެވެ. މަސްޖިދު ސުންނަތްކުރަން އާދަވެފައި ހުރި މީހަކަށް ނުކުރެވުމުން ހިތްހަމައެއް ނުޖެހެވޭނެއެވެ. ކަންބޮޑުވެވޭނެއެވެ. ހަށިގަނޑުން ބައެއް މަދުކަމަށްވެސް އިޙްޞާޞްކުރެވޭނެއެވެ.
އެފަދަ މީހުންނަށް ބުނެލަން އޮތީ ކަންބޮޑުނުވާށެވެ! އެމީހަކު ހުރި ކޮންމެ ތަނެއްގައި ހުރެގެން ކޮންމެ ވަގުތަކުވެސް ކުރެވެން އޮތް ނަމާދެއް އެބައޮތެވެ. "ތިމާ ﷲ ތަޢާލާއަށް އަޅުކަމުގެ ގޮތުން 2 ރަކްޢަތް ނަމާދެއް ކުރަން" ހިތަށް އަރުވައިގެން ހަމަކުރަމުން ގެންދަންވީއެވެ. ގިނަވެގެން ނުކުރެވޭނެ އަދަދެއްވެސް ނެތެވެ. އެންމެ 2 ރަކްޢަތް ކުރިނަމަވެސް ފުދޭނެއެވެ.
ﷲ ތައާލާއަށް ލޯބިން ނަމާދެއްކުރަން ބޭނުންވުމުން އެކަމަށް އެޅޭނެ އެއްވެސް ހުރަހެއް ނުއޮންނާނެއެވެ. ގިނަގިނައިން ކުރަންވީއެވެ. އެންމެ މުހިންމީ ސުންނަތް ނަމާދުކުރުންމަތީގައި ސާބިތުވުމެވެ. ދެމިހުރުމެވެ. މަސްޖިދު ސުންނަތަކީ މިސްކިތަށް އެރުމަށްފަހު ކުރަން އޮތް ނަމާދަކަށްވުމުން އެހެންތަނެއްގައި ހ7ުރެގެން ނުކުރެވޭނެއެވެ. ނަމަވެސް މިބުނިފަދައިން އެމީހަކު ބޭނުންވަރަކަށް ސުންނަތް ނަމާދުކުރެވޭނެއެވެ.
ކަމެއް ނެތި ފޫހިވެލިނަމަވެސް ހަމަކުރަންވީއެވެ. ނިޢްމަތެއް ލިބުނުނަމަވެސް އަދި ހިތާމައެއް ކުރިމަތިވި ނަމަވެސް ކުރަންވީއެވެ. ހިތާމައާއި ހިތްދަތިކަމުގެ ވަގުތުގައިވެސް އަދި ކަމަކުން ނަޞްރުލިބިވަޑައިގެންނެވިނަމަވެސް ރަސޫލް ﷺ ވަނީ 2 ރަކްޢަތް ނަމާދެއް ކުރައްވަވައިފައެވެ. ވީމާ ގިނަގިނަގިނައިން 2 ރަކްޢަތް ނަމާދުކުރަންވީއެވެ. އުފާވެރިކަމާއި ހިތްހަމަޖެހުން ލިބޭނީ އެއިރުންނެވެ.
- އިސްލާމީ ތިލަފަތުގެ ދަރުސަކުން
