އަހަރެން ކައިވެނިކުރީ 2013 ވަނަ އަހަރުއެވެ. ކައިވެނިކުރެވުމާއިއެކު ދަރިއަކު ހޯދަން މަސައްކަތްފެށީމެވެ. އަހަރުވީއިރުވެސް ނުލިބުމުން އިންޑިއާއަށްވެސް ދިއައިމެވެ.
ޓެސްޓްކޮށްފައި ބުނީ އަނބިމީހާގެ މައްސަލައެއް ނެތްކަމަށާއި އަހަރެންގެ ސްޕާމް ކައުންޓް މާބޮޑަށް ދަށީކަމަށެވެ. އެމީހުން އެބަލާ މިންގަނަޑަކުން 40 މިލިއަނުގައި ހުންނަން ޖެހޭ އެއްޗެއް އަހަރެންގެ ހުރިކަމަސްވަނީ އެންމެ 1.5 މިލިއަނުގައެވެ. އެހެންވެ ފަރުވާއަށް ބޭސްލިޔެދިނުމުން 60،000 ރުޕީސްގެ ބޭސް ހިފައިގެން އައީ އެވެ.
ރާއްޖެ އައުމަށްފަހު ކަވާވެސް ޖެހީމެވެ. 4 ސެޝަން ނެގީމެވެ. 4 ސެޝަނަށްފަހުވެސް ނަތީޖާދެއްކީ ހަމައެފަދަ ގޮތަކަށެވެ. އެކަމަކާ ކަންބޮޑެއްވެސް ނުވަމެވެ. އެހެނީ ކޮންމެ ކަމެއްވެސް ކާމިޔާބުވާނީ ﷲ ތަޢާލާ މިންވަރުކުރެއްވެވުމުންކަން ޔަޤީންކޮށްގެން ހުންނާތީއެވެ. އެއްބައަކަށް އެއްގޮތަކުން ކާމިޔާބުވާކަންކަން އަނެއް ބައަކަށް އެގޮތަކުން ކާމިޔާބުނުކުރެވުމަކީ ދުނިޔޭގައި އަބަދުވެސް ކަންކަން ހިނގާގޮތެވެ. ކޮންމެއަކަސް އަހަރެން ހިމެނުނީ ކަވާޖަހައިގެން ކާމިޔާބުނުކުރެވުނު މީހަކަށެވެ.
އެހިސާބުން ދެން އަހަރެން ވިސްނީ ޑޮކްޓަރީ ފަރުވާ އާއި އެހެންވެސް ފަރުވާތައް ހޯދުން ހުއްޓާލާފައި ﷲ ތަޢާލާއަށް ދުޢާކުރަން ފެށުމަށެވެ. އެހެންވެ މިދިއަ ރޯދަމަސް ހައިތަނުގައި ދަމުނަމާދުކޮށް ދުޢާކުރަންފެށީމެވެ. ދުޢާކުރަން ފެށީވެސް އަދި ދުޢާކުރަމުން އައީ ވެސް ހަަމަ ވަރަށް ފުރިހަމައަށް އިތުބާރުކޮށްގެންނެވެ. ޔަޤީންކަމާއިއެކުގައެވެ.
މިއަދުނޫހުގެ ކިޔުންތެރިންނޭވެ! މިއީ ﷲ ތަޢާލާ ގަންދީ ހަދާތެދެވެ. އަހަރެމެން މިތިބީ އަހަރެމެންގެ ރަށުގައެވެ. މާލ؛ެއިން ދެކުނުގައެވެ. މިހާރު އަހަރެންގެ އަތުގައި ލޯބިލޯބި ދަރިއަކު އެބަ އޮތެވެ. ދެމައިންގެ ޙާލުވެސް ހަމަ ރަނގަޅެވެ. އަޅުގަނޑުގެ އެދުމަކީ ދަރިފުޅަށާއި މައިމީހާއަށް ތިއަބޭފުޅުންވެސް ހެޔޮ ދުޢާކޮށްދެއްވުމެވެ.
އަދި އަޅުގަނޑުގެ އިލްތިމާސަކީ އެއްވެސް ކަމަކީ ޙާޞިލުނުވާނެ ކަމެއް ކަަމަށް ނުބަލައި ﷲ ތަޢާލާއަށް ދުޢާކުރަމުން ގެންދިއުމެވެ. ދުޢާ ޢިޖާބަކުރައްވަވާނެގޮތަށް އަމަލުތައް ބަހައްޓައިގެން ތިބެ ދުޢާކުރުމެވެ. އުންމީދާއި ޔަޤީންކަމާއިއެކު ދުޢާކުރަމުން ގެންދިއުމެވެ! ދުޢާއަކީ އެންމެހައި މީސްތަކުންގެ ދުޢާ ﷲ ތަޢާލާ ޢިޖާބަކުރައްވަވައި ދެއްވެވުމެވެ.
އަދި އެއްކަމެއް ފާހަގަކޮށްލާނަމެވެ! އަޅުގަނޑަށް އެންމެ އަސަރުކުރި ކަމަކަށް މެދުވެރިވީ އަޅުގަނޑު މިކުރި މަސައްކަތަށް އެންމެ ބޮޑަށް ހިތްވަރުދޭންޖެހޭނެ މީހާ (ޢާއިލީގޮތުން) "ދަރިފުޅާ ތިއަކަމެއް ނުވިނޫންހޭ. އަނެއްކާވެސް އިންޑިއާއަށް ހިނގާށޭ!" ބުނުމުންނެވެ. މިކަން މިފާހަގަކޮށްލީ މިފަދަ އަޑެއް ކިޔުންތެރިއެއްގެ ކަންފަތަށް އިވުނު ނަމަވެސް އެއަޑު ބަލައިނުގަނެ ދުޢާކުރުންމަތީގައި ސާބިތުވުމަށް ބުނެލުމަށެވެ.
މިއަދުނޫހުގެ ކިޔުންތެރިއެއް
(މި ލިޔުމާއި ގުޅިގެން އިތުރަށް އެއްވެސް ކަމެއް އޮޅުންފިލުވަން ބޭނުންވާނަމަ އެކަމަށް މަގުފަހިކޮށްދޭން މިއަދުނޫހުން މަސައްކަތްކޮށްދޭނަމެވެ.)
