ކިތަންމެ ގިނަބައެއްގެ ތެރޭގައި ހުރިނަމަވެސް މުސްލިމުން ތިބެންވާނީ މުސްލިމުންގެ ގޮތުގައެވެ. އަދި ޢަމަލުތައް ބަހައްޓަންވާނީ ﷲ ތަޢާލާ އަންގަވާފައިވާ ގޮތުގައެވެ. ﷲ ތަޢާލާގެ ޙަޟްރަތުގަ ކޮންމެ މުސްލިމަކީވެސް ޚާއްޞަ މީހެކެވެ. އެޝަރަފް ދޫކޮށްނުލާށެވެ!
އެމީހުންނާއި އެއްގޮތްވާން ތިބާ އެއްކަމެއްކުރާއިރަށް އަނެއްކަމެއް ކުރަން ބުނާނެއެވެ! ﷲ ތަޢާލާ ރުހިވޮޑިނުގަންނަވާނެ ހުރިހާ ކަންކަން ކުރަން ބުނާނެއެވެ. އަދި އެހުރިހާ ކަމެއް ކުރިނަމަވެސް އެމީހުންގެ ހިތެއް ނުފުރޭނެއެވެ. ގެންދާނީ އިތުރަށް ކަންކަން ކުރަން ބުނަމުންނެވެ.
އެމީހުންނާއި އެއްގޮތްވާން ތިބާގެ ހައިސިއްޔަތު ދޫކޮށްލުމުން ގެއްލިގެންދާނީ ﷲ ތަޢާލާގެ ޙަޟްރަތުން ތިބާއަށް ލިބެން އޮތް މަތިވެރި ދަރަޖައެވެ. އެމީހުން ތިބާ ބާކީވެސްކޮށްލާނެއެވެ. އެނބުރިދާންޖެހޭނީވެސް ﷲ ތަޢާލާގެ ޙަޟްރަތަށެވެ. އެމީހުންނަށް ތިބާއަށް ކޮށްދެވޭނެ ކަމެއްވެސް ނުއޮންނާނެއެވެ! ތިބާގެ ބޭނުންތައް ފުއްދަވައިދެއްވެވުން ވަނީ ވެސް ﷲ ތަޢާލާގެ ޙަޟްރަތަށެވެ.
ނަޞޭޙަތަކީ ކޮންމެބައަކާއިއެކު އުޅެންޖެހުނުނަމަވެސް ތިބާގެ ސިފައާއި އަޅާހެދުން މުސްލިމެއްގެ ގޮތުގައި ބެހެއްޓުމެވެ. އަދި ކިތަންމެ ގިނަ ބައަކު ކުރިނަމަވެސް ﷲ ތަޢާލާ ރުހިވޮޑިނުގަންނަވާނެ އަމަލެއް ނުކުރުމެވެ. ދީނުގައި ސާބިތުވުމަކީ އެއީއެވެ.
- އިސްލާމީ ތިލަފަތުގެ ދަރުސަކުން
