ލީނާ އަކީ އުމުރުން އެންމެ 8 އަހަރުގެ ކުޑަކުއްޖެކެވެ. ބައްޕަ މަސައްކަތްކުރަނީ ޤައުމުން ބޭރުގައެވެ. މަންމަ ވަނީ މަރުވެފައެވެ. މާމައަށް ވަނީ ކެންސަރު ޖެހިފައެވެ. ގޭގަ ވެރިކަންކުރަނީ އެއްވެސް ރަޙުމެއް ކުލުނެއް ނެތްތަނުގައި ޒައްރެއްގެ މިންވަރަށް އިންސާނިއްޔަތުކަންވެސް ނެތް ދޮންމަންމައެވެ.
އެދުވަހުވެސް އާދައިގެމަތިން ހެނދުނުން ފެށިގެން ލީނާ ހޭދަކުރީ މަގުމަތީގައި ސަލާންޖެހުމަށެވެ. މާމަ އާއި ދެމައިން ކައިބޮއިހެދުމަށާއި މާމައަށް ބޭސްގުޅައެއް ނަމަވެސް ގަނެވޭތޯއެވެ.
"މާމާއެވެ. މިއަދުވެސް ލިބުނީ ވަރަށް މަދު ފައިސާކޮޅެކެވެ. ދެން މީހެއްގެ ދަބަހެއް ހޮވީމެވެ. އެއިގައި ވަރަށް ބައިވަރު ފައިސާ އެބަހުއްޓެވެ."
"ދަރިފުޅާއެވެ. ކިތަންމެ ބައިވަރު ފައިސާއެއް ނަމަވެސް އެއީ އަހަރެމެންގެ އެއްޗަކަށްނުވާނަމަ އަހަރެމެން ނުކައި ތިބެން ޖެހުނު ނަމަވެސް ބޭނުންކޮށްގެން ނުވާނެއެވެ. ތިއަ ދަބަސް ހިފައިގެންދާށެވެ. ވެއްޓިފައި އޮތްތަނުގައި މަޑުކޮށްލައިގެން އިންނާށެވެ. އެއިގެ ވެރިމީހާ އާއި ބައްދަލުވެއްޖެ ނަމަ ޙަވާލުކުރާށެވެ! އިރުއޮއްސެންވާއިރަށް ބައްދަލުނުވިނަމަ ފުލުހުންނާ ޙަވާލުކޮށްފައި ގެއަށް އަންނާށެވެ!
އެވަގުތު އެތަނަށް ދޮންމަންމަ އައެވެ. އަދި ގެނައި ފައިސާ މަދުވެގެން އެއްޗެތި ގޮވުމުން އެކަމަށް ކެތްނުކުރެވިގެން މާމަ ބަހެއް ބުނުމުން މާމަގެ ގައިގައި ކޮޅުފައިޖަހާފައި ދެމައިން ގެއިން ބޭރުކޮށްލީއެވެ.
ދެމައިން ގޮސް އެދަބަސް ފެނުނު ދިމާގައި މަގުމަތީގައި ތިއްބާ އެއްޗެއް ހޯދަމުން އަންނަ ގޮތަށް އައި މީހަކު އަރާހަމަވުމުން ހޯދާއެއްޗަކާއިބެހޭ ގޮތުން ސުވާލުކުރުމަށްފަހު ދަބަސް އޭނާ އާއި ޙަވާލުކުރިއެވެ.
ހަދިޔާއެއްގެ ގޮތުން ފައިސާކޮޅެއް ދިއްކޮށްލުމުން ލީނާ ބުނީ މީހަކަށް ހެޔޮކަމެއް ކޮށްދީފައި ބަދަލުގައި އަގުއަތުލަން ނުވާނެކަމަށް މާމަބުނެފައިވާ ކަމަށެވެ.
ލީނާގެ ވާހަކަ އަޑުއެހުމަށްފަހު އެދެމައިންނާއިމެދު އޭނާ ސުވާލުކުރުމުން ދެމައިންގެ ހާލުގެވާހަކަ އޭނާއަށް ލީނާ ކިޔައިދިނެވެ. އެވަގުތަކީ މާމަ ކެއްސައިގަނެގެން ބިންމައްޗަށް ވެއްޓުނު ވަގުތެވެ.
އޭނާ ދެމައިން ގޮވައިގެން ކާރުގައި ގޮސް މާމަ އެޑްމިޓްކުރީ ކެންސަރުބަލީގެ މީހުންނަށް ފަރުވާދޭ އެންމެ ފެންވަރު ރަނގަޅު ހޮސްޕިޓަލަކަށެވެ. ލީނާ ގެންދިއައީ އޭނާގެ ގެއަށެވެ. ކަންދިމާވިގޮތުން ބަލީގައި މާމަ މަރުވީއެވެ. ލީނާގެ ކަންކަން ބަލަހައްޓަމުން އައީ އޭނާއެވެ.
މާމަ މަރުވި ދުވަހު ލީނާއަށް ބުނެވުނެވެ. "މިދުނިޔޭގައި އަހަރެންގެ ހަމައެކަކުވެސް ނެތިދިއައީއެވެ." އޭނާ ބުންޏެވެ. "ނޫނެކެވެ. އެއްގޮތަކަށްވެސް އެހެނެއް ނުވާނެއެވެ. އަހަރެން މިހިރީއެވެ. ލީނާ ދުވަހަކުވެސް އެކަންޏެއް ނުވާނެއެވެ. އިން ޝާ ﷲ"
ލިނާއަށް އޭނާގެ ބައްޕަ ހޯދަން ކުރެވޭނެ ކަމެއް ނެތެވެ. ދިރިއުޅެން މިޖެހުނީ އެހެން ސިޓީއެއްގައެވެ. ބައްޕައާއި ގުޅޭނެ ނަންބަރެއްވެސް ލީނާއަކަށް ނުއެނގެއެވެ. ދޮންމަންމަގެ މޫނުދެކެންވެސް ލީނާ ބިރުގަނެއެވެ.
އޭނާއަކީ އަނބިމީހާ މަރުވުމުން އިތުރު ކައިވެންޏެއް ނުކުރަން ނިންމައިގެންހުރި ބިލިއަނަރެކެވެ. ދަރިއަކު ނެތެވެ. އެހެންވެ އޭނާ، ލީނާ ބަލަހައްޓަމުން އައީ އަމިއްލަ ދަރިއެއްގެ ގޮތުގައެވެ. ކިޔަވައިދީ ތަރުބިއްޔަތުކުރީ އޭނާގެ ވިޔަފާރިތައް ބަލަހައްޓާށެވެ!
23 އަހަރުފަހެވެ. ނޫސްތަކުގެ ފަލަސުރުޚީގައި ލިޔެވިގެންދިއައީ އޭނާގެ ހުރިހާ ކުންފުނިތަކުގެ ޗެއާޕަރސަނަކަށް ލިނާ ހަމަޖެއްސިވާހަކައެވެ. އަދި އޭނާ ދުނިޔޭގައި ނެތް ދުވަހަކުން އޭނާގެ ހުރިހާ މުދަލެއް ލީނާއަށް ހިނބައިންދިންކަމުގެ ވާހަކައެވެ.
އެއްދުވަހެކެވެ. ލީނާ ގެއަށްދާން ނުކުތްއިރު ދޮންމަންމަ އައިސް ހުއްޓެވެ. ބައްޕަވެސް މަރުވެއްޖެ ވާހަކަ ބުނެ ލީނާގެ އެހީތެރިކަމަށް އެދުނެވެ. އަދި ލީނާ، ލީނާއަކަށްވުމުގެ ފުރުޞަތު ލިބުނީ އޭނާގެ ސަބަބުން ކަމަށްބުނެ ލީނާގެ ސަމާލުކަން ހޯދަން މަސައްކަތްކުރިއެވެ.
ލީނާ ހިތަށް އެރިއެވެ. "އެބުނަނީ ވެސް ތެދެކެވެ. އަހަރެންނަށް މިފުރުޞަތު ލިބުނީ ދޮންމަންމަ އަހަރެމެން ދެމައިންގެ ގައިގައި ކޮޅުފައިން ޖަހައި ގެއިން ބޭރުކޮށްލީތީއެވެ. ނޫނެކެވެ. އެހެނެއްވެސް ނޫނެވެ. މާމަގެ ތެދުވެރިކަމުންނެވެ. އެހައި ދަތިޙާލުގައިވެސް މީހެއްގެ ފައިސާ ބޭނުންނުކޮށް ޙަވާލުކުރަން ބޭނުންވެގެން ކުރިމަސައްކަތުންނެވެ."
ލީނާ ދޮންމަންމައަށް 1000 ޑޮލަރު ދިނެވެ. އަދި އެއީ އެދުވަހު ދެމައިންގެ ގައިގައި ކޮޅުފައިން ޖަހައި ގެއިން ބޭރުކޮށްލުމުގެ އަގުކަމަށްވެސް ބުންޏެވެ. އަދި ދެން ބައްދަލުކުރަން ނައުމަށްވެސް އެދުނެވެ.
ކިޔުންތެރިންނޭވެ! ލީނާގެ މާމަ ލީނާއަށް ދަސްކޮށްދިން ގޮތުގައި ސާބިތުވާށެވެ! ނުކައި ހުރިނަމަވެސް މީހެއްގެ ފައިސާގައި ނުޖެހޭށެވެ! އަމާނާތް އެއިިގެ ޙައްޤުވެރިންނަށް އަދާކުރުމުން ﷲ ތަޢާލާ ދެއްވަވާ ނިޢްމަތް މާމަތިވެރިވާނެއެވެ.
(މިހާދިސާގެ މައްޗަށް ގިނަ ފިލްމްތަކެއްވެސް މިހާރުވަނީ އުފައްދައިފައެވެ.)
