މިހާރަކަށް އައިސް ކައިވެނި ނުކުރެވި ލަސްވާނަމަ ގިނަ ބައަކަށް ޤަބޫލުކުރެވެނީ އެއީ އޭނާގެ ސިފަ ހުތުރުކަމުން ކަމަށާއި ރީތިވުމަށް ސިފަ ބަދަލުކުރަންޖެހޭނެ ކަމަށެވެ. އަދި ލާފޭރާމުގެ ފެންވަރުންކަމަށާއި މުޅު އަގުބޮޑު ފޭރާން ލާންޖެހޭނެ ކަމަށެވެ. އަގުބޮޑު ގަހަނާއަޅައި ޒީނަތްތެރިވެ އަގުބޮޑު ސެންޓުވެސް ޖަހަންޖެހޭނެ ކަމަށެވެ.
ޙަޤީޤަތަކީ މިއީއެއް ނޫނެވެ. އެއްވެސް މީހެއްގެ އަގުއަރާނީ އެމީހާގެ ބޭރުފުށުގެ ސިފައާއި ޒީނަތްތެރިކަމަކުންނޫނެވެ. ޒީނަތްތެރިވުމަށް ކުރެވޭ ކަންކަމަކުންވެސް ނޫނެވެ. އަގުއަރާނީ މީހާގެ ތަޤްވާވެރިކަމުންނެވެ. ތަޤްވާވެރިވިވަރަކަށް ﷲ ތަޢާލާގެ ޙަޟްރަތުގައި އެމީހާގެ އަގުދާނީ އުފުލެމުންނެވެ. ﷲ ތަޢާލާގެ ޙަޟްރަތުގައި މީހާގެ އަގު އުފުލިގެންދިއުމުން މީސްތަކުންގެ ކުރިމަތީގައި އެމީހެއްގެ ދަރަޖަ އުފުލިގެންދާނެއެވެ. ސިފަވެސް ރީތިވެގެންދާނެއެވެ.
ހިތާމައަކީ މިއަދު މިކަންކަން މީހުންނަށް ޤަބޫލުނުކުރެވޭކަމެވެ. ކޮންމެވެސް މީހަކު ޒީނަތްތެރިވެގެން ހުންނާތީ ތިމާވެސް ހަމައެގޮތަށް ޒީނަތްތެރިވެގެން ނޫނީ ކައިވެނި ނުކުރެވޭނެ ކަމަށް ޤަބޫލުކުރާކަމެވެ.
މިބުނާ ބަހުގެ ތެދުކަން އަމިއްލައަށް ބަލައިލަބަލާށެވެ! ދަންނަ މީހުންގެ ތެރެއިން ކާމިޔާބު ކައިވެނިތަކަށް ނިކަންވިސްނައިލަބަލާށެވެ! ކައިވެނި ކާމިޔާބުކުރެވެނީ ބޭރުފުށުގެ ޒީނަތްތެރިކަމުންތޯ ނުވަތަ ހިތުގެ ޠޯހިރުކަމުންތޯ ނިކަން އަމިއްލައަށް ބަލައިލަބަލާށެވެ! ބޭރުފުށުން ކިތަންމެ ވަރަކަށް ޒީނަތްތެރިވެގެން ހުރިނަމަވެސް ހިތުގެ ޠޯހިރުކަން ނެތްނަމަ ޒަވާޖީ ޙަޔާތް ކާމިޔާބުކޮށް އުފާވެރި ދިއުޅުމެއް ހޯދުމަކީ ޙާޞިލުކުރެވޭ ކަމެއް ނޫންކަމުގެ ހެކިތައް އެކަމަށް ބެލިވަރަކަށް ފެންނާނެއެވެ!
- މުފްތީ މެންކްގެ ދަރުސަކުން
